Read Gangte EZEKIEL 29 Bible Online

EZEKIEL 29 - Gangte bible

EZEKIEL 29

¹Ka saltannau kum sawmna, tha sawmna, ni sawmlenih ni chun LALPA thu chuh ka kawmah a hung tunga,

²“Mihing chapa, Aigupta lengpa Pharao lam nga’n la, amah leh Aigupta gam pumpi chungthu genlawk in.

³Gen in la, LALPA Pathien chun hiti hin a tii: Ngaiin, Aw Pharao, Aigupta lengpa ka hun do ahi, a luipite laka um, aw, awlepi lauh-um, ‘Nile Luipi hi keia ahi a, keimah a ding ngeia ka siem ahi’, tipa.

⁴Na khabe chun ngakuoi in hun kuoi ing ka ting, na luipi a nga haw chuh na phulip ah beh sak ing ka ting; na luipi haw lak apat chun na phulip a nga chengcheng chuh tawh hun luoi dawk ing ka ting;

⁵Thaleka hun nusieh ding ka hi, nang leh na luipi a nga chengcheng chuh gam talailak ah puk in na tin, na luong phawt hi puo’n tin, vuih hi hiel puo’n la; gamsa haw leh chung leng vachate kawmah a an dingun hun pie’ng ka.

⁶Israel inkuon dinga luong kung tawbang phet a hih ziekun, Aigupta gama chêngte chengcheng chun LALPA ka hi tih hun he’n au.

⁷Khut a ahun tûk u leh na bawnga, a liengko uh na sun ek a; kinelna a ahun mat u leh na bawnga, a kâwng uh a kithing chan chan a.

⁸Zieziekchun, LALPA Pathien chun hiti hin a tii: Ngaiin, na chungah chemzâm hun pan ing ka ting, na mite leh a ganchateu that ding ka hi.

⁹Chun, Aigupta gam chuh gam hawmngawn leh thawmhau hung hi’n tin, khutichun, kei hi LALPA chuh ka hi tih hun he’n au; ‘Luipi hi keia ahi a, ka siem ahi’, na tih ziek khan.

¹⁰Zieziekchun, nang leh na luipi haw chuh ka do takzet ahi; Migdol apat Suene chanin, Ethiopia gamgi tiengin, Aigupta gam chuh a keu leh a hawma siem ding ka hi.

¹¹Mihing keng in tawh khata puo’n tin, sa hawn le hawh khata puo’n au; kum sawmli sungin le luoh in um ta puo’n a.

¹²Aigupta gam chuh gam gaw haw laka khatin siem ing ka ting, a khawpi haw chuh khawpi haw lak ah kum sawmli sung gamgaw’n um in tin, luoh loh in um ina: Aigupta mite chuh namte lak ah thehzak ing ka ting, gamtin ah nawhzak ing ka.

¹³Zie ban achun, LALPA Pathien chun hiti hin a tii: Kum sawmli a beih tieng leh Aigupta mite chuh thehzak a hihnau mite lak apat chun puikhawm kit ing ka ting.

¹⁴Aigupta mite chuh a saltannau apat in puikit ing ka ting, a pienna gam un, Pathros ah vaihkit sak ing ka, chun, zie chun, nuoinung takin lal in au.

¹⁵Lalgam nuoinung pên hi’n tin un, namte lak ah kilalsak ta hiel puo’n a; namte chunga thu a neih kit tâk lohna dingin amau chuh suneu ding ka hi.

¹⁶Israel inkuon in a chungah ginchak zawhna nei ta puo’n tin, amau zui dinga kiheia a gitlohnau hetdawksak in pang zaw ta’n a. Khutichun, LALPA Pathien chuh ka hi tih he ta’n au, a tii,” ti’n.

¹⁷Chun, kum sawmnih leh kum sagihna, tha khatna, ni khat ni chun hiti hi ahi a, LALPA thu chuh ka kawmah a hung tunga,

¹⁸“Mihing chapa, Babulon lengpa Nebuknezar chun Tura lengpa dona ah a sepaihte hah mat in a manga; a lusip uh a chai hiela, a liengko uh a kawk hiela; ahih ziekin amah leh a sepaihte chun Tura dona apat chun lawkna bangmah a mu puou a.

¹⁹Zieziekchun, LALPA Pathien chun hiti hin a tii: Ngaiin, Aigupta gam chuh Babulon lengpa Nebuknezar kawma pie ding ka hi a, a neihlelam cheng chuh la mang intin, suom intin, kilak ina; chun, zie chuh a sepaihte lawh hi mai ina.

²⁰Ka na a sep ziekun, Aigupta gam hi a lawh dinga amah chuh ka piek ahi, LALPA Pathien chun a tii.

²¹Zie ni chuleh Israel inkuon dingin kikehdawk sak ing ka ting, a lak u ah chun na kam hun kat sak ing ka ting; tichun, LALPA chuh ka hi tih he’n au,” ti’n.