Read Gangte EZEKIEL 3 Bible Online

EZEKIEL 3 - Gangte bible

EZEKIEL 3

¹Chun, ka kawmah, “Mihing chapa, na ma a um kha ne’n; lehkhabuziel hi ne’n la, Israel inkawte kawm achun thu va gen ah” a ti a.

²Khutichun, ka kam ka ka a, lehkhabuziel chuh ei nêk sak ta a.

³Amah chun ka kawmah, “Mihing chapa, lehkhabuziel ka hun piek hi ne’n la, zie chun na gilpi suvah kêi in” a ti a. Khutichun, ka ne ta a, ka kam achun khuoizu tawbang in a thum a.

⁴Amah chun ka kawmah, “Mihing chapa, chieh inla, Israel insung mite kawm achun ka thu hi mang in va gen in.

⁵Pau chuom leh pau haksa haw kawma sawl na hi puoh ngâla; Israel insung mite kawma sawl na hi zaw ngâla.

⁶Nam thupi tak, a pau uh na het loh, pau haksa tak tak mangte kawmah ka hun sawl na hi puoi. Amau haw kawma chuh ka hun sawl hileh na thugen ngai ding ahiu hi.

⁷Ahihziekin, Israel insung mite chun na thu gen chuh ngaitha puo’n au, kei ei ngaitha ding ahi puoh ngâl u a, Israel insung mite vang lochal tak leh luhlul tak tak ahi ngâl u a.

⁸Ngaitie, amau tawbanga luhlul tak leh lungkhauh takin hun siem ing ka ting,

⁹Na chalpang chuh suong tâk tak, meisuong sanga tâk zaw’n siem ing ka ting, lau ki’n la, a hun etdan ziek un le lungkie diek ki’n, helchîng mi himahleu le” a ti a.

¹⁰Zielo chun le, ka kawmah, “Mihing chapa, na kawma ka thu gen ding chengcheng chuh na bil in ngaitha’n la, na lungthim ah khum in.

¹¹Chun, chieh inla, na chipih saltângte kawm va tung inla; ngaitha leu, ngaitha kileu, ‘Ziehi LALPA Pathien gen chuh ahi,’ ti’n gen inla, va hilh in” a ti a.

¹²Khutichun, Thagau in ei dawm kâng ta a, chun, ka nung lam ah van gi tawbang aw ngeih tak a, “A umna mun achun LALPA lopina chuh pahchak in um hen!” hun ti hi ka he a.

¹³Chun, thilhingte tha kihet tuoh lak laka a zap git u leh, a nung u a kangtalai keng gi leh van gi tawbang thawm gi nasatak le ka za a.

¹⁴Khutichun, Thagau in ei dawm kâng a, ei la mang ta a; lungna tak leh dahsasa’n ka chieh ta a, LALPA khut chuh ka chungah a hât ngâl a.

¹⁵Khutichun, Tel Abib a saltâng haw, Kebar lui panga chêngte kawm chuh ka tunga, a lak u achun lungdawng takin ni sagih ka chu a.

¹⁶Chun, ni sagih a beih phet chun hiti hi ahi a, LALPA thu chuh ka kawmah a hung tunga,

¹⁷Mihing chapa, Israel insung mite dinga gâlveng a ka hun guot na hi; khutichun, ka kam apat a thu na het cheng leh amau chuh ka thathenga na vaulawk ding ahi.

¹⁸Migilo kawmah, “Thi tei ding na hi” ka tih a, zie migilo chuh a hinna humbit dinga a phatlohna lampi nusieh dinga vaulawkna na neih loh a, a kawma vauna thu na gen loh a, zie mi phalo chuh a phatlohna a a thih chun a thisan phuba chuh nang kawma ngek ding ka hi.

¹⁹Ahihziekin, zie migilo chuh na vausa sa, a gitlohna a nutsieh loh a, a gitlohna lampi chuh a kiheimang san diek loh chun, a gitlohna achun thi’n tin, nangin vang chuh na hinna humbit hi zaw’n la.

²⁰“Chun, mi diktat chun a diktatna kiheimang sana thil phalo a hih a, a maa kipalna ka na kawih chun amah chuh thi’n a: vaulawkna na neih loh ziekin a gitlohna achun thin tin; a thil dik hihsa haw chuh hetzing hi puo’n a; a thisan phuba chu vang nang kawma ngek ding ka hi.

²¹Ahihziekin, mi diktat chuh gilo lo dinga na vaulawka a gitloh loh chun vaulawkna a khawksak ziekin hing in tin; chun, nangin le na hinna humbit in la” a ti a.

²²Chun, LALPA khut chuh ka chungah a um a, ka kawmah, “Kipan inla, phaicham ah chieh inla, zie tak achun hun hopih ing ka” a ti a. Khutichun, ka kipana, phaicham achun ka chieh ta a.

²³Chun, ngaitie, zie tak achun LALPA lopina chuh, Kebar lui panga ka muh tawbang lopina chuh, a na dinga, chun, kei chuh a khupin ka puk ta a.

²⁴Khutichun, thagau chuh keimah ah a hung luta, ka keng in ei din saka, ei hopih a, “Chieh inla, na In ah kikhak khum in.

²⁵Nang chuh aw, mihing chapa, khauhuol in hun khit intin un, hun kân intin un, a lak u achun va chieh thei ta puo’n la.

²⁶Na lei chuh na khadang ah beh sak ing ka ting, pau thei ta puo’n na tin, amau haw hilhgaihtu hi ta puo’n la, helchîng inkuon ahi ngâl u a.

²⁷Ahihziekin, na kawma thu ka gen tieng leh na kam hun kâk sak ing ka ting, a kawm u achun, ‘Ziehi LALPA Pathien gen chuh ahi’ na tih ding ahi. A ngaitha nuom in ngaitha hen la, a ngaitha nuom lo in ngaitha dah hen, helchîng inkuon ahi ngâl u a, a tii,” ti a na gen ding ahi.