Read Gangte EZEKIEL 30 Bible Online

EZEKIEL 30 - Gangte bible

EZEKIEL 30

¹LALPA thu chuh ka kawmah a hung tung kita,

²“Mihing chapa, genlawk inla, LALPA Pathien chun hiti hin a tii: Kiu zak unla, Ehe, zie ni lâwm lâwm chu aw!

³Ni chuh a nai ta ie, LALPA ni chuh a nai ta ie, Meipi zin ni, Jentel te sietna ding ni chuh.

⁴Aigupta chungah chemsan hung tung ding ahi a, Ethiopia chungah lungthim natna, Aigupta a thahte a puk un, A hauhsaknau puok mang ahi a a kingakna cheng a chim zo tai.

⁵“Ethiopia, Put leh Lud, Arabia leh Libia namtin, Kub leh gam tin a kizawppih te chengcheng, Chemzâm in amau tawh pukkhawm un au.”

⁶LALPA chun hiti hin a tii: Aigupta panpihte le puk in au, a hatna a kisuonpih chule niem ina; Migdol apat Suene chanin chemzâm in puk vek in au, LALPA Pathien chun a tii.

⁷Gam sukhawm sa haw laka khat hin. tin, a khawpihaw chule khawpi gamtasa haw laka tel hi ta’n au.

⁸Aigupta gam meia ka hâla, a kizawppih chengcheng ka suksiet tieng leh LALPA chuh ka hi tih he’nau.

⁹Zie ni chuleh kei apat in thupuo te kintak in lawng in chieh intin, mi kiginglo Ethiopia te sulau dingin, Aigupta sietna ni chuleh, a chung u ah lunggil lungzînna tung ina; ngaitie, hung tung ding ahi tai!

¹⁰LALPA Pathien chun hiti hin a tii: Babulon lengpa Nebuknezar khut in Aigupta sepaih thahatna chuh subei ing ka.

¹¹Namte laka hiemngam pên, amah leh a sepaihte chuh gam susie dingin puihtung hi’nau; Aigupta chungah a chemzâm uh pan intin un, thahte luong chun gam chuh sudim in au.

¹²Nile luipi haw chuh sukang ka ting, gam chuh migilote khut ah zuok ing ka; gam leh a sunga um chengcheng chuh gamdang mite khut in sukeu ing ka, kei, LALPA hin ka gen ta ahi.

¹³“LALPA Pathien chun hiti hin a tii: Milim haw chuh susie’ng ka ting, Noph khuo apat a lim hawu chuh subei ing ka ting, Aigupta achun hotu himhim um ta puo’n au: chun, Aigputa gam achun lauhna umsak ing ka.

¹⁴Pathros chuh a hawm in um sak ing ka ting, Zoan chuh mei in hâl ing ka ting, No khuo chuh gawt ding ka hi.

¹⁵Aigupta kulhpi Sin chung achun ka lungnatna buntha’ng ka ting. No khuo a mite chuh gawt mang ing ka.

¹⁶Aigupta chuh mei in hâl ing ka ting, Sing chuh natna thuokin kilek kilek intin, No khuo kulhpi chuh chim vek intin: Noph khuo chun sun leh melma nei zing ina.

¹⁷Aven leh Piebeseth khuo tangval haw chuh chemzâm in puk intin un, numei haw chuh sala mat in um in au.

¹⁸Tehaphnehes achun khuo thim ina, zie a chuh Aigupta namkawl ka sukbawt a, a kisuonpih a hatna chuh ka suktawp tieng leh; amah chuh meipi’n tuom intin, a khawpi hawa mite chuh sala puih in um in au.

¹⁹Hitibang hin Aigupta gam ah gawtna tunsak ing ka ting, khutichun LALPA chuh ka hi tih hun he ta’n au.”

²⁰Chun, kum sawm leh kum khatna, tha khatna, zie tha ni sagih ni chun hiti hi a hung hi a, LALPA thu chuh ka kawmah a hung tunga,

²¹“Mihing chapa, Aigupta lengpa, Pharao bân chuh ka subawng a; chun, ngaitie, a hung hât kita chemzâm a mat theihna dingin, damdawi nuh sak leh tuom sak ahi puoi.

²²Zieziekchun, LALPA Pathien chun hiti hin a tii: Ngaitie, Aigupta lengpa, Pharao chuh ka do ahi; a bante nih, a bawng lo lam leh a bawng lam le, hekbawng ing ka ting, a khut apat in chemzâm chuh sukie’ng ka.

²³Aigupta mite chuh namte lak ah thehzak ing ka ting, gamtina nawhzak sik sek ding ka hi.

²⁴Chun, Babulon lengpa khut haw chuh suhat ing ka ting, a khut ah ka chemzâm chuh chawihsak ing ka; Pharao bân haw vang chuh subawng ing ka ting, amah chuh Babulon lengpa ma achun thihpih theih hiela liemte tau guolin tau ina.

²⁵Khutichun, Babulon lengpa bân haw chuh suhat ing ka ting, Pharao bân haw chu vang zawitha’n a; Babulon lengpa khuta ka chemzâm ka chawihsak a, Aigupta chunga a leh tieng leh LALPA chuh ka hi tih he ta’n au.

²⁶Chun, Aigupta mite chuh namte lak ah thehzak ing ka ting, gamtina nawhzak vek ding ka hi. Zie tieng chuleh, LALPA chuh ka hi tih he ta’n au,” ti’n.