Read Gangte EZEKIEL 31 Bible Online

EZEKIEL 31 - Gangte bible

EZEKIEL 31

¹Chun, kum sawm leh kum khatna, tha thumna, zie tha ni khat ni chun hiti hi ahi a, LALPA thu chuh ka kawmah a hung tunga.

²“Mihing chapa, Aigupta lengpa, Pharao leh a mite kawmah: Lopina ah kuo na bang hi?

³Ngaitie, Asuria chuh Lebanon-a sidar, Bâk hawih leh lim diei duoi, sang tak, A zik in vanlaizawl a dawt a.

⁴Tui thieng in a châwm a, a khang tultul a, luipite chun thingbul tin chuh a luon kimvel a, mun zâng thing chitin dâwn dingin a luong viel ui.

⁵Zanggam thing tin sangin a sang zawi a, A bawk a pha a, a bâk a sau a, tui thieng in nieng takin a châwm hi.

⁶Chung leng in a bawk lak ah bu a sep ui, Sa chitin a bawknuoi ah no a nei ui, a limnuoi ah nam lopi cheng a cheng ui.

⁷Tichun, a hawih, a lopina, a bâk sau zelin, A zung a dingin tui thieng nieng takin a um hi.

⁸Pathien huon a sidar thingte’n a dep zo puou a, A tuk zo puoi, a bâk, then thing bâkin, Chung Pathien huon a thing khat chale melhawihna a amah phazo a um puoi.

⁹Bâk tamtakin ka siem, a hawih ngêi, Chung Pathien huon a Eden thing tin chengin a awtchau ui,” ti’n.

¹⁰Zieziekchun, LALPA Pathien chun hiti hin a tii: A hung san mah mah a, thing dang cheng khela a zik a san zieka a lunggil in a sân dân chuh a chapo pih ziekin,

¹¹Namte laka mihat tak khuta chuh pie dawk ding ka hi: amah chun sawisa tei ding ahi; a gitlohna ziekin ka nawhdawk tai.

¹²Chun, gamdang mi, namte laka tizat-um pên te chun a phuk u a, a nusieh tau a: a bâk haw chuh tâng chung haw leh guom sung haw achun a kie lemlum a, zie gama luipi pang chengcheng achun a bâk haw chuh bawng lemlum in a um ui; leia mite chengcheng chuh a lim nuoi apat chun a pawtdawk u a, mah chuh a nusieh tau a.

¹³Thing luong chung achun chung leng vachate cheng intin un, a bâk lak achun gamsate chuh um in au:

¹⁴Tuia vak thing himhim, a san ziek u a, a ki-uon takloh u a, a zikuh thing tin chunga leng lo a, tui dawna hing thing himhim in zie chan chan chuh a phâk tâk lohna dingin: lei mun nuoinung pên a, Sheol a kum suk mihing chate laka chieh dinga, a bawn u a thi dinga guot ahi vek ngâl u a.

¹⁵LALPA Pathien chun hiti hin a tii: Sheol a a kum suk ni khan tuinak thuk haw chuh amah ka sun saka, lei nuoia tuinak haw chuh ka hukbing a, zie a tui tamtak haw chuh a luong ta puou a; Lebanon chuh amah ka sun saka, gama thing haw chengcheng chule a thim zo tau a.

¹⁶Thing puk git chun namte chule ka sulîng a, Sheol kumsuksa te kawma gawtmun a ka paihthak ni khan; Eden thing chengcheng te, Lebanon a thing phapen leh deihum pên haw, tui ne a hing chengcheng te chuh lei mun nuoinung pên achun thamuon in a um tau hi.

¹⁷Chemzâma thahte kawm achun zie thing haw chuh thing chu tawh, ahi, namte laka a lim nuoia cheng sek, a khut-le-kengte chu tawh, Sheol achun a kum suk tau hi.

¹⁸Eden thing haw lak ah lopina leh letna ah kuo a na kibatpih um? Ahihziekin, Eden thing haw chu tawh lei mun nuoinung pên a paihthak hi ding na hi, chemzâm a thah zektan loh te laka kuol ding na hi. Ziehi Pharao leh a khuo-le-tuite chengcheng chuh ahiu hi tih hi LALPA Pathien kamsuok ahi.