Read Gangte EZEKIEL 32 Bible Online

EZEKIEL 32 - Gangte bible

EZEKIEL 32

¹Chun, hiti hi ahi a, kum sawm leh kum nihna, tha sawm leh tha nihna, zie tha ni khat ni chun, LALPA thu chuh ka kawmah a hung tunga,

²“Mihing chapa, Aigupta lengpa sûnna la phuok inla, a kawmah: Namte laka sakeibaknei vanglai tawbang, nang, Tuipi awlepi na bang zaw ie; na nak a tui haw hih phuon in; na keng in na chawkniek hi, na lui haw na hih ni’n zo tai.

³LALPA Pathien chun hiti hin a tii: Ka lên in hun khuh ing ka ting, nang mi tamtak tawh, ka lên in nang hun man ngêi un au.

⁴Hun nusieh ka nang, gam chungah, chung leng vacha cheng na chungah chuksak ing ka, Leichung a gamsa cheng taisak ing ka, nang hun ne’n.

⁵Na taksa chuh tâng tin chungah thehzak ing ka ting, na luongte chun guom tin sudim ing ka.

⁶Na thisan in gam chuh chap suok ina, tâng tin chanin, Guom tin le dim ina, nangmah in.

⁷Ka hun sukchimit tieng leh, vanpi tuom ing ting, a aksi cheng suthim ing ka, Nisa meipi’n tuom ka ting, Thapi’n a vak pawtsak puo’n a.

⁸Vanlaizawl a vak chengcheng suthim ing ka, na chung ah; Na gamsung ah thimna tunsak ing ka, tih hi LALPA Pathien kamsuok ahi.

⁹“Namte laka, na het khâk loh gamte laka, na chunga sietna ka tunsak tieng leh mi tamtak te lunggil chuh sulungkham ing ka ting.

¹⁰Ahi, mi tamtak nang mak hun sa’n siem ing ka ting, a masang u a ka chemzâm ka vai tieng leh nang haw zieka a lengteu chun le maksa’n tiza mah mah in au; na puk ni chuleh mitin in a hinnau chan ding lau in kithing kithing in au.

¹¹“LALPA Pathien chun hiti hin a ti ngâla: Babulon lengpa chemzâm chuh na chunga hung tung ding ahi.

¹²Na mite puk sak ing ka, namte laka lauh-um pente, gâl hatte chemzâm chun, Kilak in au, Aigupta mite lopina, Mangthai in au, a mipi chengcheng te chuh.

¹³Tui phatna muna a gancha cheng sumangthai ka, Mihing keng in pal niek ta puo’n tin, Gamsa’n le pal niek ta puo’n a.

¹⁴Tichun, a tui uh suchim ing ka ting, a lui u chuh thau guolin luon sak ing ka, LALPA Pathien chun a tii.

¹⁵Aigupta gam a hawma ka umsak a, A sunga um cheng ka sukbeih a, A sunga chêngte ka gawt mang tieng leh, LALPA chuh ka hi tih he’n au.

¹⁶Zie hi kah la amah a sûnna ding u chuh ahi; namtin chanute’n kap in zie hin Aigupta leh a mite chunga chun zie sûnna la hi sa’n au,” LALPA Pathien chun a tii.

¹⁷Chun, hiti hi ahi a, kum sawm leh nihna, zie tha ni sawm leh nga ni chun hiti hi ahi a, LALPA thu chuh ka kawmah a hung tunga,

¹⁸“Mihing chapa, Aigupta mite chuh kahkhum inla, amah leh nam minthangte chanute chuh Sheol chieh suk tate kawmah, lei mun nuoinung achun paih tha’n.

¹⁹A kawm u achun: “Melhawihna a kuo a na khelh um? Chieh suk inla, zektan loh te lak achun kuol zieng un, na tih ding ahi.

²⁰“Chemzâma thahsate lak achun puk in au; chemzâm chuh sah dawk ahi ta a, amah leh a mite chengcheng chuh kaidawk in.

²¹Sheol a um gâlhât mihatte chun amah leh amah ana panpihte chuh: A hung suk tau ie, chemzâma thah, zektan loh te tawh a kizam khawm tau ie, ana ti’n au.

²²“Asuria leh a sepaihte chengcheng chuh zie tak achun a um ui; a thân u chuh a kimvel achun a um hi; a bawnchau in thah, chemzâma thi vek ahiu hi.

²³A thân u chuh leinuoi thuk tak achun a uma, a thân kimvel achun a lawite a um u a a bawnchau in chemzâma thi vek, mihing gam ana sulaute, ahiu hi.

²⁴“Zie tak achun Elam chuh a um a, a thân kimvel achun a sepaihte a um ui; a bawnchau in chemzâma thi vek, lei mun nuoinung a zektan loh a chieh suk, mihing gam ana sulaute, kawkhuk a chieh sukte tawh zakcha khawm ahiu hi.

²⁵Mi thahte lak achun amah leh a lawite kuolna ding siem ahi a, a thân kimvel achun a sepaihte a um ui; a bawnchau in zektan loh, chemzâma thi vek ahiu; a lauh-umnau chun mihing gam ana sulau sek mahleh kawkhuk a chieh suk sate chuh tawh a zahchâknau a puou a, thahte lak achun siel ahi tau hi.

²⁶“Zie tak achun Mesek leh Tubal chuh a um ui; a thân kimvel u ah a sepaihteu a um ui; a lauh-umnau in mihing gam ana sulau sek na a, a bawnchau in zektan loh, chemzâma thah ahiu hi.

²⁷Amau chuh zektan loh mihat puksate, a gâlvanteu tawh Sheol a chieh sukte kawm achun kuol puo’n au: a chemzâmteu chuh a khapchâk u a, ahihziekin mihing gama mihatte lauh hi mahleu, a gitlohnau chuh a guh chung u ah um ina.

²⁸“Ahi, nang chuh, Aw Pharao, sukbawt in um in na tin, zektan loh, chemzâma thahte lak achun kuol inla.

²⁹“Zie tak achun Edom, a lengte leh a hotute chengcheng a um u a; a hât ten nau a, chemzâma thahte laka kuol sak ahiu hi; zektan loh mithi khuo a chieh sukte kawm achun a kuol ui.

³⁰“Mâllam a lengte, a bawn un, Sidon mite chengcheng, a hâtnau in mi a sulau sek nau a, thahte tawh zakcha takin a chieh suk ui; zektan loh in chemzâma thahte tawh a kuol u a, mithi khuo a kum suk tate chuh tawh a zahchâkna a thuok khawm tau ahi.

³¹“Zie te chuh Pharoah chun ana mu’n tin, a sepaihte cheng cheng tawh, Pharoah leh a sepaihte zieng chu le chemzâm a thah himahleu, lungkim lawh ta’n a,” LALPA Pathien chun a tii.

³²“Mihing gam ah gâl lauhna len sak in amah ka na mang na a, Pharaoh leh a sepaihte chengcheng chuh zektan loh, chemzâma thahte laka kuol sak hi’nau, Pharaoh leh a sepaihte chengcheng chuh,” tih hi LALPA Pathien kamsuok ahi.