Read Gangte EZEKIEL 34 Bible Online

EZEKIEL 34 - Gangte bible

EZEKIEL 34

¹Chun, LALPA thu chuh ka kawmah a hung tunga,

²“Mihing chapa, Israel belampute chungah genlawk inla, genlawk inla, a kawm u ah, ‘LALPA Pathien chun belampute kawm achun hiti hin a tii: Israel belampu, amau leh amau kivâk chauh haw chung chuh agik ie! Belampu chun belam hawn chuh a vak dinguh hilo ahim?

³A nawitui khal na neu a, a mul in na kivan u a, a thau thau chuh na that u a, belam haw chuh na vak puoh ngâl u a.

⁴A zawngkhal haw la na suhat puou a, a damlo haw na sudam puou a, a keng bawng haw na tuom puou a, a vakmang haw na hun puikit puou a, a mang haw le na hawl diek puou a; khauh tak leh nunsie takin na enkawl zawu a.

⁵Belampu a um loh ziekin nawhzak in a um u a, a zak phet u chun gamsa hangte an ding chauh a hung hi tau a.

⁶Ka belamte chuh a vak zak u a, tâng tin leh muol tin ah a vakmang tau a; ahi, ka belamte chuh lei chung ahin a kithehzak zo tau a; amau chuh kuoma’n a ngaihsak puou a, a hawl puou hi,’ ti’n gen in,” a ti a.

⁷“Zieziekchun, nang haw belampute haw, LALPA thu hi ngaithau in:

⁸A hi’n a ka hin sung chuh, LALPA Pathien chun a tii, Belampu a um loh zieka, ka belampute’n ka belamte hawl lo a, ka belamte vak lo a amau leh amau a kivâk zawk ziekun, ka belamte chuh gamsate peh ding leh gamsate an ding chauh a hung hi mai tau a;

⁹Zieziekchun, Aw belampute haw, LALPA thu hi ngaithau in!

¹⁰LALPA Pathien chun hiti hin a tii: Ngaitiem u, belampute chuh ka kilanpih ahi; a khut u ah ka belamte lâksak ing ka ting, ka belamte a etkawlnau sutawp ing ka ting, belampute chuh amau leh amau kivâk ta hiel puo’n au; a kivâk nau ahih tâk lohna dingun, ka belamte chuh a kam u apat hukdawk ding ka hi ngâla,” ti’n.

¹¹LALPA Pathien chun hiti hin a ti ngâla: “Ngaitiem u, kei, keimah ngêi hin ka belamte chuh hawl ing ka ting, hawl dawk ing ka.

¹²A belam taizak haw laka a um laia belampu’n a belamte a hawl dawk guolin ka belamte hawl dawk ing ka ting; vannîm henla khuo thim lele a kithehzâk nau mun cheng u apat chun hukdawk ing ka.

¹³Chun, mite lak apat chun puidawk ing ka ting gam tin apat chun puikhawm ing ka ting, amau gam ngêi achun pui ing ka; Israel tâng chung haw, lui pang haw leh mi chênna mun chengcheng achun tat sak ing ka.

¹⁴Ham phatna mun haw achun tat sak ing ka ting, a kul u chuh Israel tâng sang haw chung achun um ina. Zie tak achun kul phatak sung ah bawk intin un, Israel tâng chunga hampa dâwng kiuhkeuh haw chun kivâk in au.

¹⁵Keimah ngêi hi a belampuu hi’ng ka ting, amau chuh bawh thip sak hiet hiet ing ka, LALPA Pathien chun a tii.

¹⁶“A vakmangte chuh hawl ing ka ting, nawhmang a um haw chuh puikit ing ka, a liem haw chuh tuom ing ka ting, a zawngkhal haw chuh suhat ing ka; himahleh, a thau leh a hat haw chuh subei ing ka ting; thu dik in chawm ing ka.

¹⁷“Chun, nang haw chungthu achun, Aw ka belam hawnte haw, LALPA Pathien chun hiti hin a tii: Ngaiun, belam leh belamte kal thu vaihawm sak ing ka ting, chun, belamchal leh kel kal thu vaihawm sak ing ka.

¹⁸Ham hing dip dep mun a tat leh tui chîm tak dâwn hi nanguh a ding huntawk lo ahi? Na hampa nêk mawk uh na pal siet maimai u a, na tui dâwn mâwk uh na pal niek maimai u hih?

¹⁹Ka belamte chun vang na tawh sa nung uh a neu a, na pal nieksa nung uh a dâwn uh ahi.

²⁰“Zieziekchun, LALPA Pathien chun a kawm u ah hiti hin a tii: Ngaiun, kei, keimah ngêi hin belam hât leh belam zawngkhalte kal thu tan ding ka hi.

²¹A zawngkhal haw chuh na pum u leh na liengko un na nek viel u a, na kiu in na siu a, na nawhmang sek u a;

²²Zieziekchun, ka belam hawn chuh humbit ing ka ting, gamsa peh mai hita puou un tin; belamte leh belam te kal achun vaihawm ding ka hi.

²³Chun, a chung u ah belampu khat kawih ing ka ting, ka suok David ngêi chuh; amah chun amau chuh vak intin, amau chingpa hi’n tin, amau chuh vak ina.

²⁴Chun, kei, LALPA hi a Pathien uh hing ka ting, ka suok David chuh a chung u a hotu hi’n a; kei, LALPA ngêi hin ka tih ahi ngâla.

²⁵Chun, amau tawh kichamna thuthun siem ing ka ting, gamsung apat chun gamsa haw chuh subei ing ka, thalek ale bit takin cheng intin un, gammâng nuoi ale bit takin ip tan au.

²⁶“Amau leh ka tâng kimvela mun cheng chuh vangsakna’n siem ka ting, a hun cha’n guoh zuk sak ing ka ting; vangsakna guoh haw zu’n a.

²⁷Chun, gama thing haw chun a gahteu suoh intin un, lei in le a gah suoh ina. A gam u achun bit takin um intin un, a namkawlteu ka sukbawt a, suok a siemte khut apat ka hukdawk tieng chu leh kei hi LALPA chuh ka hi tih he ta’n au.

²⁸Nam dangte nawh viel dingin um ta puon tin un, gamsate nêk zawh mai le hita puo’n au; bit takin cheng zaw ta’n tin un, kuoma’n sulau ngei ta puo’n au.

²⁹A thaichi phatna mun tak chuh amau pie’ng ka ting, khutichun, zie gam achun kiel in sumang ta puon tin un, nam dangte muhsitna le thuok ta puo’n au.

³⁰Khutichun, kei LALPA a Pathien uh hi a kawm u ah ka um hi tih he’n, Israel insung mite chuh ka mite ahiu hi tih he tan au, LALPA Pathien in a tii.

³¹“Chun, nang haw chuh ka belamte, ka gan tatna muna belamte chuh na hiu a; ka mite na hiu a, kei hi na Pathien u chuh ka hi, LALPA Pathien chun a tii,” ti’n.