Read Gangte EZEKIEL 36 Bible Online

EZEKIEL 36 - Gangte bible

EZEKIEL 36

¹“Chun, nang mihing chapa, Israel tânghaw kawm achun genlawk inla, Nang haw Israel tângte haw, LALPA thu hi ngaithau in!

²LALPA Pathien chun hiti hin a tii: Melma chun, ‘Hi’n a! tuona-tânga munsang ei uh a ahi tau ie,’ a hun tih ziek u chun,

³“Zieziekchun, genlawk inla, LALPA Pathien chun hiti hin a tii: Namte laka a dang haw a hun chan theihna ding u a ning tina a hun neh tuok u a, a hun sukhawm ziekun leh mi kamtamte holimna leh gen thanhuoi na hung hi tai.

⁴Zieziekchun, Aw Israel tângte haw, LALPA Pathien thu hi ngaithau in! LALPA Pathien chun tângte, muolte, luite, guom sungte, munkeusa haw leh khawpi hawmsa nung, namte laka a dang haw’n a suom u leh a nuihzatbuk teu kawm achun hiti hin a tii:

⁵“Zieziekchun, LALPA Pathien chun hiti hin a tii: Namte laka a dang haw leh Edom chengcheng, neih dinga ka gam, lunggil kipâk tak leh muhsitna lungthim pu-a gam chuh suksiet ding ti a, amau leh amau kipiete chung achun lungna mah mah in thu ka gen him ahi.

⁶“Zieziekchun, Israel gam chungchâng thu achun genlawk inla, tângte, muolte, luite leh guomte kawm achun LALPA Pathien chun hiti hin a tii: Ngaitiem u, namte sukzahchakna na thawk ziekun itthik lungnat puma na kawm u a thu ka gen ahi.

⁷Zieziekchun, LALPA Pathien chun hiti hin a tii: Na kimvel u a namte chun amau zahchâkna ngei pu’n au ti’n kihâksiel in ka khut ka tung ahi.

⁸Himahleh, nang haw chun, Aw Israel tângte haw, bâkte chuh hung selin tin un, ka mi Israel te dingin gahsuoh un lau, ka mite chuh In lam zuona hung vaikit ding ahi ahi tau hi.

⁹Ngaitiem u, nang u lama pang ka hi ngâla, nang u lam nga’ng ka ting, kalh chuop in um in na tin un, chi tuhin le um in lau.

¹⁰Na chung u ah mihing supung ing ka ting, Israel inkuon pumpi chuh, a bawnin: khawpi haw chuh luoh in um intin un, chun, mun siesa haw chuh sakphat in um in au.

¹¹Na chung u ah mihing leh gancha supung ing ka ting, hung pung intin un, lamzang in au; tuma lam guol khan luoh in hun umsak ing ka ting, a tunga na umdan sang u a kha bawn phazaw’n hun siem ing ka ting: khutichun, LALPA chuh ka hi tih he’n lau.

¹²Ahi, na chung ah mi chieh viel sak ing ka ting, ka mi Israel te ngêi chun hun luoh intin un, a gochan uh hin na tin un, a chateu sûn sak kha ta puo’n la.

¹³“LALPA Pathien chun hiti hin a tii: ‘Mihing na ne zo a, na nam chuh a chate na chansak sek,’ a hun tih ziekun,

¹⁴mihingte ne zo, na nam chuh a chate chansak kha ta puo’n la, LALPA Pathien chun a tii:

¹⁵namte muhsitna hun het sak kha ta puo’ng ka ting, mite gensietna thuok kha ta puo’n na tin, na nam chuh kisuih sak kha ta puon la, LALPA Pathien chun a tii, ti’n,” a ti a.

¹⁶Chun, LALPA thu chuh ka kawmah a hung tung kita,

¹⁷“Mihing chapa, Israel inkuon chuh amau gama a chen lai u khan a umdan u leh a thilhih hawu chun a subuok u a; a umdan u chuh kei dingin numei a thineih laia a buokna tawbang mai ahi a.

¹⁸Zieziekchun, gam chunga thisan a suoh u a, gam a sukbuoknau a milim hawu ziek chun a chung u ah ka lungnatna chuh ka buntha ta a,

¹⁹Khutichun namte lak ah ka thehzak a, gamtin ah a kikhen zak tau a: a umdan u leh a thilhih hawu dungzui in a chung u ah thu ka tan ta a.

²⁰Namte kawm a tun phet un, ka min thiengtho a subuok u a, mite chun, ziete hi LALPA mite chuh ahiu a, gam apat hung pawt ahiu hi uo, a tih bek sek uh.

²¹Himahleh, Israel insung mite’n namte laka a chiehna lam cheng u a a gensiet uh ka min thiengtho chuh ka ngaikhawk ahi.

²²“Zieziekchun, Israel inkuon kawma chun hiti hin ti’n: LALPA Pathien chun hiti hin a tii: Aw Israel inkuonte haw, nang haw ka hun khawksak ziek hilo in, namte laka na chiehna lam cheng u a na gensiet uh ka min thiengtho ka ngaihkhawk ziek zawa ziehi ka hih ahi.

²³Ka min lopi tak, namte laka gensieta um, amau haw lak ngeia na gensiet u chuh hih thiengtho ding ka hi; khutichun, a mitmuh u a nangmau a hih thientho a ka um tieng chuleh LALPA chuh ka hi tih he’n au, LALPA Pathien chun a tii.

²⁴Namte lak apat chun hun puidawk ing ka ting, gam tin apat chun hun puikhawm ing ka ting, na gam ngêi u a chun hun puilut ding ka hi ngâla,

²⁵Chun, na chung u ah tui chîm theh ing ka ting, hung thiengtho in na tin un, na buokna teu chengcheng leh na milim hawu lak apat chun hun hih thieng ing ka.

²⁶Lunggil thak hun pie’ng ka ting, chun, na sung u ah thagau thak kawih ing ka ting: na taksau apat a lunggil suong guola tâk chuh lamang ing ka ting, pheh guola nem lunggil hun pie zaw’ng ka.

²⁷Chun, na sung u ah Ka Thagau kawih ing ka ting, chun, ka dân siem chuh hun hawhsak ing ka ting, ka thutanna haw chuh zui in na tin un, hih inlau.

²⁸Khutichun, na pileputeu kawma ka gam piek achun chengin na. tin un, nang haw chuh ka mite hin na tin un, kei hi na Pathien u hing ka.

²⁹Na buoknau chengcheng apat in hun hukdawk ing ka ting, buh chuh thu pie’ng ka ting, supung ing ka ting, na chung u ah kiel kie ta puo’n a.

³⁰Na thing gahteu leh lo a na thawh gahteu supung ing ka ting, kiel zieka namte laka muolphona thuok ta puo’n lau.

³¹Khutichun, na umdan phaloteu leh na thilhih phaloteu chuh hezing ta’n na tin un, na gitlohnau leh na thil chîn tenum hawu ziek chun nangmau ngêi kiten ta’n lau.

³²Nang haw zieka ziehi hih ka hi puoi tih hi heu in, LALPA Pathien chun a tii. Aw Israel inkawte, haw. na umdan ziekun zakchau inla, khunchak zieng un!”

³³LALPA Pathien chun hiti hin a tii: “Na gitlohnateu chengcheng apat ka hun silthien ni chu leh, khawpi haw chuh hun luoh sak kit ing ka ting, mun siesa haw chuh sakphat kit hi’nau.

³⁴Chun, na nutsieh sau gam chuh kalh nêl hi ta’n a, a hawh malam cheng muh a a hawma umsa ana himahleh.

³⁵Khutichun, ‘Zie gam hawmsa nung hi Eden huon bang mai ahung hi kit ta a, chun, khawpi chim leh nutsieh leh suksieta um haw chuh tuhin kulh nei leh luoh kit ahi tau’, tin au.

³⁶Chun, kei LALPA hin mun chimsa haw chuh ka sapha kita, gam keusa chuh ka kiduohsak kit ahi tih na kimvel u a namte chun hen au. Kei, LALPA hin ka gen ta a, hih ngêi ding ka hi.”

³⁷Chun, LALPA Pathien chun hiti hin a tii: “Zie hi le amau dinga hih dingin Israel inkuon chuh Kei kidawtsak ing ka; belam hawn bang hiela amau chuh supung dingin.

³⁸Kithawihna thiengtho a mat ding gan hawn bang hielin, kut ni a Jerusalem gan hawn bang hielin, khawpi siesa nung haw chuh mipi tamtak in hung dim in tin; khutichun, LALPA chuh ka hi tih he ta’n au,” a ti a.