Read Gangte EZEKIEL 37 Bible Online

EZEKIEL 37 - Gangte bible

EZEKIEL 37

¹Chun, LALPA khut chuh ka chungah a uma, LALPA Thagau chun ei puidawk a. guom lailung tak ah ei kawih a: zie guom chuh guh a dim ahi a.

²A lak u achun ei pui viel viela, chun, ngaitie, guom achun a um lemlum mai u a, a gaw thei mah mah mai u a.

³Chun, amah chun ka kawmah, “Mihing chapa, zie guh haw hi a hing thei ding um?” a ti a. Chun, kei chun, “Aw LALPA Pathien, nang chauh in na hêi,” ka ti a.

⁴Chun, amah chun ka kawmah, “Zie guh haw kawm ahin thu gen inla, a kawm u ah, ‘Aw, nang haw guh gawte haw, LALPA thu hi ngaithau in!

⁵Zie guh haw kawma chun LALPA Pathien chun hiti hin a ti a: Ngaitiem u, nangmau ah hu lut sak ing ka ting, chun, hung hing inlau.

⁶Nangmau ah thagui kawih ing ka ting, pheh in hun tuom ing ka ting, vun in hun khuh ing ka ting, chun. na sung u ah hu kawih ing ka ting, hing inlau; chun. LALPA chuh ka hi tih he’n lau’, ti’n,” a ti a.

⁷Khutichun, thu ei piek guol chun thu ka gen ta a: chun thu ka gen lai chun thawm a hung uma, ngaitie, a gi sausau a, guh haw chuh amau kizawppih chiet tawh a sutuoh tau a.

⁸Chun ka vak et leh, ngaitie. amau achun thagui a hung uma, pheh in a tuoma, vun in a tuom ta a; hu vang chuh amau achun a um nai puoi.

⁹Khutichun, amah chun ka kawmah, “Huih kawm achun thu gen inla, mihing chapa, gen inla. huih kawm achun, ‘LALPA Pathien chun hiti hin a tii: Aw, hinna hu, kâwlmawng lite apat chun hung inla; zie a mithite hi ahung hin theih na dingun hat khum in,’ ti’n,” a ti a.

¹⁰Khutichun, thu ei piek guol chun ka genlawk a, hu chuh amau achun a hung lut ta a. a hing tau a, amau keng chietin a ding tau a, tichun, sepaih hawn thupi tak a hung hi tau a.

¹¹Khutichun, ka kawmah, “Mihing chapa, zie guh haw hi Israel inkuon pumpi ahiu a; ngaitie, amau chun, ‘I guhteu a gaw zo in, I kinepnau a bei zo ta a, gawt mang in I um tau’, a ti sek u a.

¹²Zieziekchun, genlawk inla, a kawm u ah, LALPA Pathien chun hiti hin a tii: Ngaitiem u, na thân hawu hawng ing ka ting, aw, ka mite haw, na thân u apat hun pawtsak ding ka hi; chun, Israel gam achun hun puilut ding ka hi.

¹³Chun, na thân hawu ka hawn a na thân u apat ka hun pawtsak tieng leh, aw, ka mite haw. LALPA chuh ka hi tih he’n lau.

¹⁴Chun, na sung u ah ka thagau kawih ing ka ting; hing un na tin, na gam ngêi uh ah hun kawih ing ka, chun, kei LALPA hin ka gen ta a; hih le hih ing ka tih hi LALPA kamsuok ahi,” a ti a.

¹⁵Chun, LALPA thu chuh ka kawmah a hung tung kita.

¹⁶“Nang, mihing chapa, mawlh khat la’n la, a chung achun, ‘Juda leh a kipapvaipih Israel chate a,’ tih zik inla: mawlh dang le la’n la, a chung achun, ‘Ephraim mawlh, Joseph leh a kipapvaipih Israel inkuon chengcheng te a,’ tih zikin.

¹⁷Chun, mawlh te nih mawng tuok chuh sutuoh inla, na khuta khat guola kilang dingin.

¹⁸Zie hi bang na tihna ahim, nei hilh thei die, kei uh? na mipite chun a tih u chun,

¹⁹a kawm u ah, ‘LALPA Pathien chun hiti hin a tii: Ngaitiem u. Joseph leh a kipapvaipih Israel phungte mawlh. Ephraim khuta um chuh lang ka ting, Juda mawlh tawh zawp ing ka ting, khatin siem ing ka ting, ka khut ah khat hung hi’nau’, na tih ding ahi.

²⁰“Chun, mawlh, a chung na zik haw kha a mitmuhna ngêi u a na khuta a um dinguh ahi.

²¹A kawm u ah, LALPA Pathien chun hiti hin a tii: Israel chate chuh a chiehnau namte lak apat chun ladawk ing ka ting, muntin apat in puikhawm ing ka ting, amau gam ngêi achun puilut ing ka.

²²Chun, zie gam achun, Israel tâng haw chung achun, nam khatin siem ing ka ting, a chunguh ah leng khat um in tin, nam nih hita puon tin un, lalgam le nih in kikhen khata puo’n au.

²³A milimteu, a thil tenumteu, a bawhsietna teu in kisubuok khata puo’n au: gitlohna a hihnau a chênna mun teu chengcheng apat chun hukdawk zaw’ng ka ting, silthieng ing ka: khutichun, amau chuh ka mite hi’n tin un, chun, kei a Pathien uh hing ka.

²⁴Ka suok David chuh a chung u ah leng hi’n tin, a bawn u a chungah belam chingpa khat um ina: ka dante zui intin un, ka dân siemte nit intin un, hih in au.

²⁵Na pileputeu ana chênna. ka suok Jakob kawma ka piek gam achun cheng intin un: zie tak achun kumkhuo’n cheng un tin, amau leh a chateu, a chateu chate le: ka suok David chuh kumkhuo’n a leng uh hizing ta’n a.

²⁶Zielo chun le, a kawm u ah chamna thuthun siem ing ka ting. Amau dingin kumkhuo thuthun hi’n tin, a kawm u ah pie’ng ka ting. amau chuh supung ing ka ting, amau lak achun kumkhuo’n ka ho-bûk dinsak ing ka.

²⁷Ka bâwkcha le a kawm u ah um intin, a Pathien uh hing ka ting, amau chuh ka mite hi’nau.

²⁸Ka Ho-In chuh kumlekhuo a dinga a lak u a a din tieng chu leh kei hi LALPA, Israel te hih thiengtho chuh ka hi tih heta’n au,” ti’n.