Read Gangte EZEKIEL 38 Bible Online

EZEKIEL 38 - Gangte bible

EZEKIEL 38

¹Chun, LALPA thu chuh ka kawmah a hung tunga,

²“Mihing chapa, Ros leh Mesek leh Tubal hotu, Magog gama Gog lam chuh nga’n la, a chungah genlawk in la,

³LALPA Pathien chun hiti hin a tii: Ngaiin, Ros leh Mesek leh Tubal hotupen, aw Gog, ka hun kilanpih ahi:

⁴Chun hêi kuol ing ka ting, na khabe ah ngakuoi in hun kuoi ing ka ting, hun khâi dawk ding ka hi; na sepaih hawn chengcheng te, sakawl haw leh sakawl sepaihte, gâlvan bukima kivan chengcheng te, sepaih tamtak, phaw lien leh phaw neu manga chemzâm keng chiet te haw chu tawh.

⁵Persia, Kush leh Put te chu tawh, a bawn u-a phaw leh thik lukhuk neite chuh;

⁶Gomer leh a sepaih hawn chengcheng te leh mâl tawpa Togarmah leh a sepaih hawn chengcheng te, na kawma mi tamtak haw chu tawh.

⁷Kigalging inla, ahi, ana kisazo in, nang leh na kawma umkhawm chengcheng te chu tawh; chun, a hotuu in pang in.

⁸Ni tamtak nung chu leh galdo dinga sap hin na tin, tunung kum haw achun chemzâm lak apat hukdawk, nam tamtak te lak apat lak khawmte umna gam, Israel tâng a hawma um zing sek haw chuh hun do ding na hi; namte lak apat puihdawk a um tu a a bawn u a lungmuong taka a umnau gam chuh.

⁹Chun, chiehto in na tin un, huihpi bang mai in hungtung in tin, meipi’n gam a tuom khepkhup tawbang hiel hi hin la, nang leh na kawma sepaih hawn chengcheng leh na kawma mi tamtak te chuh.

¹⁰Chun, LALPA Pathien chun hiti hin a tii: Zie ni chu leh hiti hi hi’n tin, na lunggil ah thil hung lut in tin, thil phalo hih guon na tin;

¹¹Khutichun, kulh neilo khuo haw gam chuh buluh ing ka ting, mi bit taka um hiet, hiet a bawn u a kulh nei lo a cheng, kulh kawtkhak leh a kamna thik neilote chuh do ing ka ting,” na lungthim gûkin ti’n la.

¹²Gâllâk thil leh thuomphuo haw la ding leh mun nutsiehsa haw luoh kitte leh namte lak apat puihkhawmsa, gancha leh thuomphuo hau a, lei lailung a chêngte chung achun na khut thak guon la.

¹³Sheba leh Dedan leh Tarshis sumkawlveite leh a sakeibaknei vanglaiteu chengcheng chun na kawmah, “Gâllâk thil la dinga hung na hi maw? Mi suom dinga na sepaihte chuh na hun puihkhawm ahi maw? Tangkaguote, sanate, gancha leh thuomphuo haw tamtak kilak ding na hi maw?” hun ti’n au, ti’n.

¹⁴Zieziekchun, mihing chapa, genlawk inla, Gog kawm achun, LALPA Pathien chun hiti hin a tii: “Zie ni, ka mi Israel te bit taka a um ding hun u chuh na he paw maw?

¹⁵Mâllam gam tâwp kawdawn, na mun apat chun hung in na tin, nang leh na kawma mi tamtak sakawl chunga chuong chiet, mi tamtak, sepaih hawn nasa tak mai chuh.

¹⁶Meipi’n gam a khuh mepmup bang hiel hin ka mi Israel te chungah hung in na tin; hiti hi hung hi’n tin, ni nunung haw achun ka gam do dingin hun pui ing ka ting, namte chun ei hen au, Aw Gog, a mitmuh u a nangmah a hih thientho a ka um tieng chu leh.

¹⁷Chun, LALPA Pathien chun hiti hin a tii: Malaia ka nasemte Israel thiemgau, zie laia kum tamtak sunga thu ana genlawk sek te’n amau do dinga ka hun puih ding thu ana gen sek u kha na him? ti’n,” a ti a.

¹⁸Himahleh, zie ni chu leh hiti hi hi’n tin, Israel gam do dinga Gog a hung tieng chu leh ka lungchang so zie chuh ka mel ah kilang ina, LALPA Pathien chun a tii.

¹⁹Ka lungnatna kuong dawk in, Zie ni chu leh Israel gam ah nasa takin lei kilîng ina;

²⁰Khutichun, tuisuohgiet a ngate, chung leng vachate, gamsate, lei chunga vak ganhing chengcheng, lei chunga mihing chengcheng te ka ma ah kithing intin un, tâng haw chuh sukniem in um intin un, kenliengte chuh chim intin un, kulh bâng chengcheng chim tha vek ina, ti’n ka gen ta a.

²¹Ka tâng chengcheng ah Gog dona dingin chemzâm sam khawm ing ka ting, mi cheng chemzâm chun a suohpihpa do ina, LALPA Pathien chun a tii.

²²Chun, hipi leh thisan suohna’n a chungah thu tan ka ting; amah leh a sepaih hawn haw leh a kawma mi tamtak te chung achun guohpi vanawn leh gielpi nasatak leh mei leh kât zuk sak ing ka.

²³Chun, ka lopi zie leh ka thientho zie sulang ing ka ting, chun, nam tamtak te mitmuh ah kisulang ing ka, chun, kei hi LALPA chuh ka hi tih he ta’n au.