Read Gangte EZEKIEL 39 Bible Online

EZEKIEL 39 - Gangte bible

EZEKIEL 39

¹LALPA Pathien chun, “Nang mihing chapa, Gog chungah thu gen in la, Ngaitie, aw Gog, Rose, Meshek leh Tubal milien pên ka hun do na hi:

²Hun lehngat sak ing ka ting, hun pui zel ing ka ting; mâl tawppen apat in hun puidawk ka ting. Israel tânghaw achun hun pui tung ing ka.

³Na khut veilam apat in na thalpi subawng ing ka ting, na changlam apat in na thalchang chuh sukie’ng ka!

⁴Nang leh na sepaih hawn chengcheng leh, na kithuohpihte chuh Israel tâng achun thiu un na tin, vacha sasiel nete leh gamsate nek dingin hun pie’ng ka ting,

⁵Gamtalai-lak ah thi ding na hi tih ka gen ta ngâl a, tih hi, LALPA Pathien thugen ahi.

⁶Magog leh thielkal gama thamuong taka chêngte chung achun mei sawl ing ka; tichun, Kei hi LALPA Ka hi tih he ta’n au.

⁷Chun, ka mi Israel te lak achun ka min thiengtho sulang ing ka ting, ka min thiengtho sukbuok kit chuh phal ta puo’ng ka: tichun, namte chun Kei hi LALPA, Israel Mi Thiengtho chuh ka hi, tih he ta’n au,” ti’n.

⁸LALPA chun, “Ngaitiem u, a hungtung hi, hih guitung in um ngêi ina, tih hi LALPA Pathien thugen ahi; zie ni hi a hi ka na gen tâksa khah!

⁹Israel te chuh khawpi apat chun pawt un tin, gâlvan chuh chawm khawm un tin, mei ah tik un tin; tichun, phawte, thalpi leh thalchangte, tiengchate leh a phe te chuh kum sagih sung tik un au.

¹⁰Khutichun, gam lak thing puo puou un tin, gammâng thingte le phuk diek puo’n au, gâlvante chuh thing tih dingin mang ta ding a hi ngâl uh a. Amau susiete chuh susie thuk untin, amau suomte chuh suom thuk un au,” tih hi LALPA Pathien kamsuok ahi.

¹¹Chun, zie ni chuleh hiti hi hi’n tin, “Gog dingin Israel gam ah kivuihna ding pie’ng ka ting, tuipi suohlam, Abarim guom ngêi chuh: zie chun zinvielte chuh kituok khawm un tin, Gog leh a lawite chuh vui ding a hi ngâl uh a; tichun, zie gam chuh ‘Hamon-gog guom’ min vawh un au.

¹²Chun, Israel te chun a gam uh sukthienna dingin mithi luong chuh tha sagih sung vui un au!

¹³Ahi, gama mi chengcheng in vuih pih un tin, ka zawhna lopina ka latsak ni chuh a minthan niu hi’n a, tih hi LALPA Pathien kamsuok ahi.

¹⁴Chun, a gam uh thielngimna dinga luong vuih loh te hawldawk a vui ding a nasep a nei ding mi a chuom guot un tin, tha sagih zawh nung leh hawl pan un au.

¹⁵Ziehaw chun gamlaka a vakvielnau a mihing guhte a muh u chun, Gog sepaihte guoma chuh mithi vuite’n a vuih theihna dingun melchikna siem khum zel un au.

¹⁶A naih tuom achun sepaih min lo a kisa khawpi um ina. Khutichun, gam sung chuh sukthientho in um vek ta’n a,” ti’n.

¹⁷Chun, LALPA Pathien chun hiti hin a tii, “Nang mihing chapa, Vacha tincheng te leh gamsa tin chengte kawmah thugen inla, Hung pungkhawm unla, hung un, sa na nek u a, a thisan na dâwn theih na dingun ning tin apat in hung un! Israel tânga guolvakna lopitak, nanguh a dinga ka bawl kimvel achun hung kikhawm un ti’n.

¹⁸Lei chunga mi lopite sa neu un na tin, vaihawmte thisan chuh dâwn un na tin; belam chalte, belamno te, kelte, Bashan gama bâwngchal thau tak tak ahi ngâl u a.

¹⁹Nanguh dinga kithawihna guolvak ka bawl thau chuh vah set in neu un na tin, a thisan chuh kham khawp in dâwn un lau.

²⁰Tichun, sakawlte leh a chunga chuongte, sepaihte leh galdo mite sa chun, a khawp set un kivâk un au, tih hi LALPA Pathien kamsuok ahi,” ti’n.

²¹Tichun, “Namte laka chun ka lopina sulang ing ka ting, tichun namtin in ka thutanna diktak hih dinga ka thilhih theihna ka mat dân chuh etsak ing ka.

²²Zie ni akipat chuh Israel inkawte chun Kei hi LALPA a Pathien uh ka hi tih he tau in tin,

²³Chun, namte chun, Israel insung mite chuh ka chunga a gitlohna ziekuh a saltâng ahiu hi tih he ta’n au. Ka chunga a ginum loh bêk ziekun, amau haw apat in ka mai ka sel a, a melmateu khut ah ka pie a. chemzâm in a that vek tau hi.

²⁴A thientho lohnau leh, a bawhsietnau bang zelin a chungu ah ka hih a, amau apat in ka mai ka sel hi.

²⁵“Zieziekchun, LALPA Pathien chun hiti hin a tii: Tuhin, Jakob suonte chuh tung ding kit ing ka ting, Israel inkuon pumpi chungah lungsietna nei ing ka ting, ka min thiengtho chuh humbit ding ka hi.

²⁶Kuomah, a sulau umlo a, a gam a bit taka a chen tiengu lele, a bawhsietnau chengcheng, ka chunga a bawhsietna teu leh a zahhuoinau chuh hezing ta puo’n au.

²⁷Nam tamtak te kawma mi thiengtho ka hi tih sulang dingin, ka mite chuh a melmateu gam apat in puikit ing ka.

²⁸Namte lak ah salin ka sawl a, himahlele, khatchale nutsieh umlo a, a gam uh a ka puih khawm kit ziekin, Kei hi LALPA a Pathien uh ka hi tih he ta’n au.

²⁹Ka mipi, Israel te chung achun ka thagau sungtha’ng ka ting, amau apat in kiheimang kit ngei puo’ng ka, tih hi LALPA Pathien kamsuok a hi,” ti’n.