Read Gangte EZEKIEL 4 Bible Online

EZEKIEL 4 - Gangte bible

EZEKIEL 4

¹Chun, “Nang, mihing chapa, bellei kihaltak lân la, na âng ah kawih inla, zie chun khawpi, Jerusalem khawpi lim ngêi chuh zikin.

²A kimvel achun kulh siem inla, muol pawng siem khum inla, sepaih giehbuk haw siem inla, kulh tah chimna haw khawpi kimvelin siem khum in.

³Chun, nangin thik pêk lân la, nang leh khawpi kikal achun thik bang dingin kawih inla; zie lam chuh nga’n la, huol bichilh a um hi’n tin, nangin na huol ding ahi. Ziehi Israel insung mite dingin etsakna hi ding ahi.

⁴“Chun, nang chuh na veilam pang delh in kuol inla, na chungah Israel insung mite gitlohna kawih ding ka hi. Khutia na kuol sung ni zah chuh a gitlohnau puo hin na tin.

⁵Kum khat gawtna a thawk sik un ni khat zel na kuol ding ahi a; ni zathum leh ni sawmkuo sung na kuol dingin ka guot ta ngâla. Zie tawbanga chuh Israel insung mite gitlohna chuh na puok ding ahi.

⁶Chun, ziehi na sukbutin tieng leh, changlam pang delh in ni sawmli sung kuol kit in na tin, Juda insung mite gitlohna chuh puo’n na tin, ni khat chuh kum khat tawh kituok zel dinga ka hun guot sak ahi.

⁷“Puonâk bân lip zetin Jerusalem huolna lam kha nga’n la, a sietna ding thu genlawk ah.

⁸Chun, ngaitie, khauhuol in hun khit chak ing ka ting, na huolna nite na sukbutin masangsieh kihei viel viel thei puo’n la.

⁹“Gehu tawh, buhpi tawh, be tawh, havai tawh, chang tawh, mîm buh lân la, bel khat ah kawih inla, chângthâk in siem in na tin na sik langkhat delha ni zathum leh ni sawmkuo na kuol sung cheng chuh zie chuh na nek ding ahi.

¹⁰Na an nek ding chuh teh khel khel hi’n tin, ni khat leh sekel sawmnih hi ding ahi a, hunbi nei taka na nek ding ahi.

¹¹Chun, tui le teh thawh a na dâwn ding ahi a, hin khat mun gup a khena mun khat hi ding ahi a, ni khat a khatvei na dâwn ding ahi.

¹²Chun, a mitmuhna ngêi u ah mihing êk gawp thingkhuoh a mang in kang in na tin, buhpi chângthâk nek a na nek ding ahi” a ti a.

¹³Chun, LALPA chun, “Zie tawbanga an buok chuh Israel chate chun ka nawhmangna ding Jentel te lak achun nen au” a ti a,

¹⁴Ziephet chun kei chun, “Katei, LALPA Pathien, ngaitie, khangdawng ka hih lai apat tu chan hin le ka kisubuok kha nai puoh a, ganhing thikam ahim, gamsa peh ahim, sa tenum ahim ka kam ah a lut kha nai puoi,” ka ti a.

¹⁵Ziephet chun, amah chun ka kawmah, “Ahih leh a phai, mihing êk thasang in bâwng êk ka hun pie a zie chuh manga na nek ding chuh na kan ding ahi,” a ti a.

¹⁶Zielo chun le amah chun ka kawmah, “Mihing chapa, ngaitie, Jerusalem achun hinna bulpi, an chuh hihsie’ng ka ting, teh det det in lau kawm takin ne’n tin un; chun, tui le teh det det in lungthim hawmvam kawm takin dâwn in au;

¹⁷An le tui a tâksap u a, a ki-ettuoh mai u a, a gitlohnau a chuh a manthai zawh vek na dingun.