Read Gangte EZEKIEL 40 Bible Online

EZEKIEL 40 - Gangte bible

EZEKIEL 40

¹Ka saltan uh kum sawmnih leh nga kum bul lam, ni sawmna, Jerusalem siet nung kum sawm le lina, zie ni ngêi chun LALPA khut chuh ka chungah a hung um a.

²Kilâkna achun Pathien in Israel gam ah ei pui a, tâng sang tak ah ei kawih ta a. Ka masang zawn achun in tampi, khawpi lim tawbang hi ka mu a.

³Zie tak achun ei pui naih deuh a, tichun mi khat, a mel latdan chuh sumeng bang mai in ka mu a. Amah chun tehna khau patngat chi leh, tehna mawlh a chawi a, kawtkhak achun a ding a.

⁴Amah chun ka kawmah, “Mihing chapa, na mit khan en inla, na bil dawh inla, ka hun etsak ding lam ah na lungthim nga chak ah; zie thil ka hun etsak ding zieka chuh taka hih puih a um na hi ngâl a: na muh chengcheng te chuh Israel inkawte kawm achun phuongdawk ah,” a ti a.

⁵Chun, ngaitie, Ho-In kimvel achun kulhbang ana um a, chun, mi khat chun tehna mawlh tawng gup a sau a chawi a; a tawng khat chuh tawng khat leh bel bawn chiet ahi. Chun, kulhbang sahdan a teh a, mawlh tawn khat ahi a; a san lam le mawlh tawn chan mah chuh ahi.

⁶Tichun, suohlam pang kawtkhak lampi achun a chieh a, a kalbi achun a chieh to a; kawtkhak lutna indan chuh a teh a, tehna mawlh tawn khata lien ahi.

⁷Zie khel achun lampi khat a um a, zie lampi pang tuok achun a gâl venna indan thum gêl gêl a um a. Chun, a sik tuoka zie indante chuh kitieh chiet a hi a, a dunglam tehna mawlh tawn khat a hi a, a vailam le tehna mawlh tawn khat mah a hi a, a kal a bângte chuh tawng nga a sah ahi. Gâl venna indan khel achun Ho-In lam nga a kisa, pindan lien zawtna lampi tehna mawlh tawn khata lien chuh a um a.

⁸Amah chun zie indan chule a teh a, tawng giet ahi.

⁹Ho-In naih pên a lampi tâwp pha a hi ta a, a kawt sahdan chuh tawng nih ahi.

¹⁰Suohlam kawtkhak, zawtna lampi panga indante chuh a lang a lang ah pindan thum a um a, a thuma chuh kitieh chiet ahi; a kawt bieng chule kitieh chiet ahi.

¹¹Kawtkhak zawtna lampi vailam chuh a teh kit a, tawng sawm a hi a; kawtkhak kal a chiehpai na vailam chuh tawng sawmlethum ahi.

¹²Gâl venna indan ma achun daidanna bang niemcha, tawng khata sah leh tawng khat mah a sang a um a. (Gâl venna indan chuh a lang a lang a tawng gup gel ahi.)

¹³Chun, indan bang tâwp apat, a indan bang lehlam tâwp tienga lampi kantan in, a letdan chuh a teh a, a kawt leh a kawt kikal chuh tawng sawmnih leh nga a kigamla ahi.

¹⁴Chun, Indan tawppen chuh huongcha a hi ta a. Zie indan chule a teh a, tawng sawmnih a lien ahi.

¹⁵Chun, a lutna kawtkhak pawlam pên bang apat, pindan tawppen tieng chun tawng sawmnga ahi.

¹⁶Pawlam indan bang achun tukvan neucha a um a, pindan sungnung zaw kal a bâng haw achun le tukvan a um chiet hi. Bang sungnung zaw achun lampi lam dawh in tum thing lim a um chiet hi.

¹⁷Chun, huongsung zawtna kawtkhak achun ei pui ta a. Bang pawnung zaw zawn achun indan sawmthum a um a.

¹⁸Chun, a mai lam leh a huongcha kimvel cheng chuh suongpek a kilem ahi. Huongcha pawnung zaw chuh huongcha sungnung zaw sanga niem zaw a kilem ahi.

¹⁹Tichun, kawtpi in nuoinung zawna kipat chun huongsung pawlam chan chun a teh a, suohlam leh mâllam le, a let zie chuh tawng zakhat ahi.

²⁰Chun, huongsung pawnung zaw kawtpi in mâllam pang a um chuh a dung leh a vai le a teh a.

²¹Chun, gâlven In thum te, a kal a bângte leh pindan liente chuh suohlam pang zawtna a tawh kitieh vek ahi. A sauhlam chuh tawng sawmnga a hi a, a vailam chuh tawng sawmnih ahi.

²²A indan liente a tum thing limte chuh, suohlam kawtkhak lampi tawbang vek ahi. Kalbi sagih a um to a; indan lien chuh a tâwp lam ah, huongcha lam dawh in a um hi.

²³Huong sungnung zaw lutna ding kawtpi in chuh kawtpi in dang tawh kizawn in a um zela, mâllam leh suohlam ale; chun, kawtpi in leh kawtpi in kikal chuh a teh a, tawng zakhat ahi.

²⁴Chun, simlam ah ei puikit a, chun, ngaitie! simlam pang achun kawtkhak ana um a. Tichun, a teh dân ngêi in a bang ka haw leh a huongcha chuh a teh a.

²⁵Zie tak achun le, a dangte bang mah khan a kimvel in tukvante a um a. a huongcha ale, a dung chuh tawng sawmnga a hi a, a vailam chuh tawng sawmnih ahi.

²⁶Chun, a kalbi sagih a um to a, huongcha lam dawh in a um a; a lang a lang a kawtbienghaw achun tum thing lim a um hi.

²⁷Chun, simlam achun huongsung masa zaw lutna ding kawtkhak a um a. a simlam kawtpi in kikalhaw chuh a teh a, tawng zakhat ahi.

²⁸Chun, amah chun simlam kawtkhaka, huong sungnung zaw achun ei puilut a. Kawtkhak chuh a teh a; zie chuh bang pawnung zaw dangte chu tawh a letdan kibang ahi.

²⁹Galven indante, a indan liente leh a bang sungnung zaw chuh a dangte tawh a letdan kibang a hi a; zie tak achun tukvante a um a, a huongcha ale, a kimvel in; a dunglam tawng sawmnga ahi a, a vailam tawng sawmnih leh nga ahi.

³⁰Chun, a kimvelin huongcha a um a, a dunglam chuh tawng sawmnih leh nga ahi a, a vailam chuh tawng nga ahi.

³¹A indan lien chun huong dangte lam a nga a; a kawtbienghaw achun tum thing limte a um a: a kaltohna achun kalbi giet a um hi.

³²Chun, amah chun suohlam huong sungnung zaw ah ei pui a. A kawt khat lampi chuh a teh a, zie chuh a dangte kha tawh a letdan kibang ahi.

³³Gâl venna indante, a indan liente, leh a bang sungnung haw chuh a dangte tawh a letdan kibang vek ahi. Zie tak achun a kimvelin tukvan a um a, indan liente achun le a um vek hi. A dunglam chu tawng sawmnga a hi a, a vailam chuh tawng sawmnih le nga ahi.

³⁴A huongchate chun huongsung pawnung zaw lama nga a, a kawtbieng tuok achun tûm thing lîm a um a; a kaltohna achun kalbi giet a nei hi.

³⁵Chun, amah chun mâllam kawtkhak achun ei puikit a, zie tak chuh a teh a, adangte tawh a letdan kibang ahi.

³⁶A gâl venna indante, a indan liente leh a huongchate, zie chun a kimvelin tukvan a um a: a dunglam chuh tawng sawmnga a hi a, a vailam chuh tawng sawmnih le nga ahi.

³⁷A indan lien chun huongsung pawnung zaw lam a nga a; a bang achun, alang a lang ah tum thing lim a um a: a kaltohna achun kalbi giet a um hi.

³⁸Huongcha pawnung zaw achun, mâllam panga kawtkhak lampi sungnung zaw tawh a kituohna dingin a zawp matna a uma. Indan lien huongcha lam dawh achun a kihawng a, zie tak achun hâlmang kithawihna gante chuh a sawp sek uh ahi.

³⁹Zie indan lien sung achun dawhkhâng le a um a, indan siktuok achun nih gel a um a, zie dawhkhâng chung achun hâlmang kithawihna hileh, gitloh thawihna hileh, sukkhelh kithawihna gancha chuh a thah sek uh ahi.

⁴⁰Mâllam kawtkhak lut toh na siktuok achun dawhkhâng, nih a um a. Chun, kawtpi in huongcha lehlam achun le dawhkhâng nih mah a um a.

⁴¹Tichun, kawtpi In sik lehlam pang achun dawhkhâng li a um a; chun, a lehlam pang ah dawhkhâng li mah a um a. Kithawihna gancha a thah sek nau chuh dawhkhâng giet ahi.

⁴²Chun, hâlmang kithawihna guonggalh masakna dingin dawhkhâng li, suong kisêk a siem, a dunglam tawng khat leh a lang, a vailam tawng khat leh a lang mah, a sânlam tawng khat a um a: zie tak achun hâlmang kithawihna leh, thillat thah na ding matchâkte chuh a kawih sek ui.

⁴³Chun, dawhkhâng gei achun a kimvelin thik gen, khutpêk bawka sau a vawh uh a, dawhkhâng chunghaw achun kithawihna ding thillatsa haw chuh a kawih sek uh ahi.

⁴⁴Chun, huongcha sungnung zaw achun ei puilut a: Ngaitie! huong sungnung zaw achun indan nih a um a, khat chuh mâllam kawtkhak bul ah, simlam nga’n a um a, khat chuh simlam kawt khat bul ah mâllam nga’n a um hi!

⁴⁵Amah chun ka kawmah, “Zie indan simlam nga hi, a Hobuk enkawl thiempute umna ahi;

⁴⁶Indan mâllam nga hi, maichâm enkawl thiempute umna ahi. Ziehaw hi Zadok chate, Levi chate laka zenviel nasem dinga LALPA umna mun naih thei dingte chuh ahiu hi,” a ti a.

⁴⁷Chun, huongcha sungnung zaw chuh a teh a, a dunglam tawng zakhat, a vailam tawng zakhat mah, ning li, kitieh chiet ahi. Ho-In chuh thanglam pang ah a um a, a mai achun Maichâm chuh a um a.

⁴⁸Chun, Ho-In lutna indan achun ei pui a, huongcha bâng haw chuh a teh chiet a, alehlam-a lehlam tawng nga a sah gel ahi a; a lutna chuh tawng sawm leh li a lien ahi, a siktuok chuh tawng nga a sah gel ahi a, a bang tuok chuh tawng thuma sah gel ahi.

⁴⁹A indan chuh, a dung tawng sawmnih, a vailam tawng sawmlenih a hi a, a lut tohna achun kalbi sawm a um hi. A kawtbieng bul langtuok achun khuom lien tak a um gel hi.