Read Gangte EZEKIEL 41 Bible Online

EZEKIEL 41 - Gangte bible

EZEKIEL 41

¹Chun, indan lailung pên, Mun Thiengtho achun ei puilut a. Zie tak zawtna lampi chuh a teh a; a pang tuok chuh tawng gup a sah ahi a,

²Chun, a lutna chuh tawng sawm a lien ahi a, a siktuok achun bang, tawng nga gel a sah a um hi. A indan chuh a teh a, a dunglam chuh tawng sawmli a hi a, a vailam chuh tawng sawmnih ahi.

³Chun, indan sungnung pen achun a lut a, a lutna lampi chuh a teh a, tawng nih a sah ahi a, tawng gup a lien ahi a, a siktuok a bang chuh tawng sagih gel a sah ahi.

⁴Chun, indan sungnung chuh a teh a, a sungpi bân ah a dunglam chuh tawng sawmnih a vailam le tawng sawmnih ahi. Chun, ka kawmah, “Ziehi Mun Thiengtho pên chuh ahi,” a ti a.

⁵Chun, amah chun Ho-In bang chuh a teh a, a sânlam chuh tawng gup ahi a. Chuleh. Ho-In kimvela bang panga indan kibawlte chuh a vailam tawng li a lien ahi.

⁶Bang panga indante chuh sawng thum a hi a, a sawng tin achun indan sawmthum a um chiet hi. Zie indan zawlte chuh, Ho-In banga chuh kinga lo in, a kingakna ding, bang panga hung dawk dawk chuom achun a kinga zaw ahi.

⁷Chun, a sik indan kingaknate sauh dân dungzui chun, a lien to deuh deuh a, bang kimvela chuh lien to deuh deuh ahi. Ho-In pawlam banga, indan pawlam chung achun, kalbi nih lientak a kidawh to a, indan nuoinung pen apat in indan laita hawh in a sang pên chanin a kal toh theih hi.

⁸Chun, Ho-In kimvel achun suong kilem sang hi um in ka mu a, a sik indan suongvuih chuh, tawng gup zet a sang ahi.

⁹A sik indan pawlam bang sahdan chuh, tawng nga ahi a; a sik indan pawlam bang khel achun tawng nga a lepdawk a.

¹⁰Ho-In suong kilem sang leh, huongsung indante kikal chuh a kimvelin tawng sawmnih a lien ahi.

¹¹A sik indan kawtkhakte chuh mun awnglama hawn a hi a, khat chuh mâllam nga ahi a, a kimvela mun âwng chuh tawng nga a lien ahi.

¹²Chun, tumlam a Ho-In munsang khela in kisa chuh tawng sawmsagih a lien a hi a; zie In bang chuh a kimvelin tawng nga a sah vek ahi a, a dung chuh tawng sawmkuo ahi.

¹³Chun, amah chun Ho-In pawlam chuh a teh a, tawng zakhat a sau ahi. Ho-In nung lam apat a, a mai mun awngte kânphei a teh in, a tumlam pang tâwp tiengin, a sauh dân chuh tawng zakhat mah ahi.

¹⁴Ho-In maia chieh pai in, a siktuok a mun awngte tawh kigawm in, a sauh dân chuh tawng zakhat mah ahi.

¹⁵Chun, tumlam zuonin in letdan chuh a teh a, a huongsung sik nih tuoka a hulliep tawh kigawm in, tawng zakhat mah ahi.

¹⁶Chun, mun Thiengtho leh, Mun Thiengtho pên te, pawlam huongchate chuh thingpek kidap ahi a, a thum u chun a kimvel in hawn theih loh tukvan leh kalbi a nei a, a Inpi lutna kawtpi chanin, a tuong apat tukvan tiengin a puma thingpek kidap ahi.

¹⁷Ho-In bang sungnung pen chuh, a kawtkhak su chietin, tum thing kigeikuok leh Cherub te lim a kizêm vek ahi.

¹⁸Zie chuh cherub leh tum thing lim kikal hel zela kizêm vek ahi. Cherub leh Cherub kikal ah tum thing a um zela; tichun, Cherub te chuh mai nih nei chiet ahiu hi:

¹⁹Mihing mel bang pu chun, langkhat a tum thing lam chuh a nga a, sakeibaknei mel pu chun, lehlangkhat lampanga tûm thing lam chuh a nga a. Ziehaw hi bâng kimvel chenga chuh zik ahi a,

²⁰A tuong apat a kawt chung tiengin cherub leh tum thing lima zem vek ahi.

²¹Mun thiengtho kawtbiengte chuh ning li nei chiet ahi. Mun Thiengtho pên lutna masang achun thinga siem maichâm tawbang hi a um a,

²²tawng thuma sang, tawng nih a sau, tawng nih a lien, a ning khuomte, a kingakna leh a pang te chuh thinga siem vek ahi. Zie mipa chun ka kawmah, “Ziehi LALPA masanga dawhkhâng chuh ahi,” a ti a.

²³Mun Thiengtho lutna lampi tâwp tak achun kawtkhak a um a; chuleh, Mun Thiengtho pên a lutna lampi tâwp tak mah achun le kawtkhak a um kit hi.

²⁴Kawthaw chuh phel nih kisutuoh ahi a, a laia thep theih chiet ahiu a; kawt khat ah phel nih, a dangah phel nih mah ahi.

²⁵Banga vihkuok a kizik tawbang mah chuh, Mun Thiengtho lutna achun le tum thing lim leh Cherub te lim vihkuok a kizêm ahi a; huongcha pawlam achun thingpek sah tak tak a phah u a.

²⁶Chun, huongcha bang tuok haw leh thingpek kiphahna haw achun, tukvan hawn theih loh leh tum thing lim vihkuok a kizêm a um a, a Inpi sik indan leh thingpek kiphah chuh khutibang mah chuh ahi.