Read Gangte EZEKIEL 42 Bible Online

EZEKIEL 42 - Gangte bible

EZEKIEL 42

¹Chun, amah chun, mâllam panga huongcha pawnung zaw sung achun ei puilut a, Ho-In mâllam panga in kisa khat achun ei puilut a. Ho-In panga In kisa khat achun ei kawih a. Zie chuh Ho-In tumlam pang tawpa In kisa apat a gamla lo cha ahi.

²Chun, mâllam panga In chuh tawng zakhat a sau, tawng sawmnga a lien ahi a.

³Huong sungnung zaw mun âwng chuh tawng sawmnih ahi a; huongcha pawlam zaw a suong kilem lam dawh in, dawhsawn sawng thum a um gêl gêl a.

⁴Chun, In haw kikal achun a sunga lutna tawng sawma lien, tawng zakhat a sau chiehpai na a um a, a kawtkhakte chuh mâllam nga ahi.

⁵A sawng chung haw a indante chuh, insawng nuoinung zaw leh a laita sang chun a neu zaw a, tumlam panga gamla deuha bawl a hih ziekin.

⁶Sawng thum a kisa ahi a, huongcha dangte guol khan khuom tampi a nei puoh a; A sawng laita sang chun a chungnung pên a neu zaw a, a laita chuh a nuoinung pên sangin a neu zaw a.

⁷Chun, indan sik pawlam achun huongsung pawnung zaw lam dawh in tawng sawmnga a sau bang a um a. Tawng sawmnga hal achun pindante a um hi.

⁸Huong sung pawnung zaw a indante tawng sawmnga a sau ahi ngâla; chun Inpi zula pên chuh tawng zakhat a sau ahi.

⁹Chun, zie In bang kisak patna nuoi taka suohlam pang tâwp achun, huongcha pawnung zaw a lutna chuh a uma, zie tak chuh pawlam bang kipatna ahi.

¹⁰Ho-In simlam pang, tumlam apat a gamla lo cha achun in khat a kibatpih tak a um a.

¹¹Indante mai lama chiehna chule, mâllam indante chiehna tawbang mah kha ahi: a dung leh a vaite, a pawtdawknate, a kawtte le kibang vek a, a kawt chuh simlam nga ahi.

¹²Zie indan te lutna ding chun, chiehpai na tawpa a suohlam bang bul achun kawtkhak a um hi.

¹³Tichun, amah chun ka kawmah, “Simlam leh mâllam a huongcha lehlam a mun âwng hi indan thiengtho ahi a. Zie mun chuh LALPA umna muna chieh sek thiempute’n thil thiengtho a nêknau mun ahi. Thil thiengthote a kawihkhawm u a, nek ding latna te. gitloh zieka kithawihnate, bawhsiet kithawihnate a lat dinguh a hi: a mun chuh Mun Thiengtho ahi ngâl a.

¹⁴Zie taka chuh thiempute a lut uh a, Mun Thiengtho apat a huongsung pawnung zaw a a pawt ding u chun; LALPA a zenvielnau silhlechen haw chuh zie taka chuh a kawih dinguh ahi, silhlechen thiengtho ahi ngâl a; zieziekchun, silhlechen danga kitheng in; mipite laka a pawtdawk chauh dinguh ahi.” a ti a.

¹⁵Tichun, Ho-In huong sungnung zaw a teh zawh tieng chun, suohlam panga kawtkhak achun ei pui a. Ho-In kimvel chuh a teh a.

¹⁶Chun, tehna mawlh chun suohlam pang chuh a teh a, tehna mawlh dungzui chun tawng zanga ahi.

¹⁷Chun, mâllam ah a kihei a, a hun teh kit a, tehna mawlh dungzui chun tawng zanga mah ahi.

¹⁸Tichun, simlam ah a kihei a, tehna mawlh chun a teh kit a, a tehna mawlh dungzui chun tawng zanga mah ahi.

¹⁹Chun, tumlam ah a kihei, a hun teh kit a, a tehna mawlh a teh chun tawng zanga mah ahi.

²⁰A sik li chun a teh a: a kimvel a bang a dunglam tawng zanga, a vailam tawng zanga ahin a; a kimvelin kulhbang nei ahi a, zie chuh Mun Thiengtho leh mipi umkhawmna kikhenna dinga siem ahi.