Read Gangte EZEKIEL 43 Bible Online

EZEKIEL 43 - Gangte bible

EZEKIEL 43

¹Zie nung chun amah chun, kawtkhak suohlam dawh achun ei pui ta a,

²tichun, ngaitie, Israel Pathien lopina, suohlam apat a hungtung chuh ka mu a: a thawm chuh tui tamtak gi tawbang ahi a, lei chuh a lopina’n a salhvak ta a!

³Kilâkna ka muh kilat dân chuh, Jerusalem khawpi susie dinga a hung leh, Kebar lui pang a kilâkna ka muh tawbang khah ahi a: chun, bawkkhup in tuol ah ka puk ta a.

⁴Tichun, LALPA lopina chuh suohlam panga kawtkhak hawh in Ho-In sung achun a hunglut a.

⁵Tichun, thagau in ei dawm kâng a, huong sungnung zaw achun ei puilut a; chun, ngaitie! LALPA lopina chun Ho-In chuh a luoh dim vek ta a.

⁶Amah chuh ka kawma a din zing lai chun, aw khat in Ho-In apat ei hun hopih in ka he a,

⁷Ka kawmah, “Mihing chapa, zie mun hih ka lalchutphah umna mun, ka kêngpêk ngakna, Israel chate laka kumlekhuo a ka chênna ding mun a hi: Ka min thiengtho chuh Israel inkawte’n ahim, a lengteu in ahim pathien dangte hona’n leh a lengteu luong vuihna a mang in, subuok ta puo’n au.

⁸A kawtkhakteu chuh ka kawtkhak bul taka siem in, a kawtbiengteu chuh ka kawtbieng zula kawih in, amau haw leh, Keimah kal achun a bang chauh um sak in, a thilhih uh kihdak-umte chun Ka min thiengtho chuh a subuok tau a. Zieziekchun, ka lungnat na’n amau haw chuh ka sumangthai ta a.

⁹Tu a pat hin a milim pathien hoteu leh, a lengteu thiluong haw chuh, Kei apat in gamla tak ah kawih tau hen; khutichun, a lak u ah kumlekhuo’n chêng ta’ng ka,” ti’n.

¹⁰“Chun, nang mihing chapa Israel inkawte kawm achun Ho-In leh a kilat ding dân leh a kiguonggalh dân chuh hilhchien in, ti a chuh a gitlohna ziek u a a zahchâk theih na dingun!

¹¹Chun, a thilhih dân u chuh zahchâk um a sak u chun, Ho-In umdan etsak in, a kiguoltuok dante, a pawtdawknate, a lutna te, a umdan dingte, a dân tângpi leh a etkawl ding dân amau kawmah hetsak in la; a mitmuh ngei un zik in la, khutia chuh a zuih u a, a danhaw cheng leh a mat dân cheng a chîn u a; a zawp theih na dingun.

¹²Chun, Ho-In a dân ding chuh ziehi ahi: gamsung pumpi a tângsip cheng chuh Mun Thiengtho ding ahi,” ti’n.

¹³Maichâm kimvel letdan chuh hiti hi ahi (tawng khat chuh tawng khat leh khutpêk bawk ahi) a tunna chuh tawng khat a sang, tawng khata lien hi’n tin, a gei kimvel chuh khâp khat a sang hi’n a. Tichun, maichâm san ding dân chuh ziehi hiding ahi.

¹⁴Chun, maichâm san ding dân chuh hiti hi hiding ahi. Leia a kingakna apat a a dawhsawn nuoinung zaw chuh tawng khat hi’n tin, a dawhsawn neu zaw apat a dawhsawn lienzaw chuh tawng li hi’n tin, tawng khata lien hiding ahi.

¹⁵Chun, maichâm chung cham, kithawihna a hâl seknau chuh tawng li hi’n tin, chun, maichâm lailung apat chun ki li chunglam zuonin tawng khat a sangin kikhawh dawk ina.

¹⁶Maichâm chung chuh a ning li hi’n tin, tawng sawmlenih a sau, tawng sawmlenih a lien hi’n a.

¹⁷Chuleh, a dawhsawn chuh a ning li hi’n tin, tawng sawm leh li a sau, tawng sawm leh li a lien hi’n tin; a gei chuh tawng kimkhata lien leia a kingakna chuh tawng khat kimvel hi’n a; chun, maichâm a kalbite chuh suohlam nga ding ahi.

¹⁸Chun, LALPA Pathien chun ka kawmah, “Mihing chapa, ka hun hilh ding hi ngaitha’n; maichâm kisiem zawh tieng a maichâm mat dân ding chuh hitibang hi ahi: ‘Hâlmang kithawihna dingte, kithawihna gancha thisan thehna dingte ahi.

¹⁹Levi chi thiempu Zadok suona mi, ei zenviel dinga ka umna muna hung sekte kawm achun, gitloh zieka kithawihna dingin bâwngchal tuoi na piek ding ahi, LALPA Pathien in a tii.

²⁰A thisan huntieng chuh la’n na tin, maichâm ki lite leh a dawhkhâng ning lite, a gei kimvelin na nuh ding ahi a; khutibanga chuh maichâm chuh na sukthien a, zie dinga chuh tatna na siem ding ahi.

²¹Chun, gitloh thawihna bâwngchal tuoi chuh la’n na tin, Ho-In pawlama a hâlna ding kiguotna mun achun hâl ding ahi.

²²Chun, a ni nih ni chuh leh, kêlchal demna bei, gitloh thawihna ding a na lat ding ahi; tichun maichâm chuh bâwngchal tuoi thisana sukthien mah bang khan na sukthien ding ahi.

²³Maichâm sukthien chuh na hih zawh tieng bâwngchal tuoi demna bei leh gan guol laka belamchal demna bei na lat ding ahi.

²⁴LALPA masangah lân in na tin, thiempu chun achung ah chi theh in tin, LALPA kawma hâlmang kithawihna dinga a lat ding ahi.

²⁵Ni sagih sung chuh ni chengin gitloh thawihna dingin kêlchal leh bâwngchal tuoi leh belamchal demna bei, a hawn lak apat a na mat ding uh ahi.

²⁶Chun, maichâm latna leh sukthienna chuh ni sagih sung hi’n tin, tichun maichâm chuh mat ding a sukthien hi ta’n a.

²⁷Tichun, zie nihaw chuh a hung bukim tieng chuleh, a ni giet ni apat chun thiempute’n na hâlmang kithawihnateu leh chamna kithawihnate chuh maichâm ah lân un tin, tichun, hun na pawm sak ing ka,’ tih hi LALPA Pathien thugen ahi,” a ti a.