Read Gangte EZEKIEL 44 Bible Online

EZEKIEL 44 - Gangte bible

EZEKIEL 44

¹Tichun, amah chun mun thiengtho kawtkhak pawnung zaw, suohlam nga lam achun ei leh puih a, khaksa a na hi a.

²LALPA chun ka kawmah, “Zie kawtpi hi kikhak zing in tin, kihawng ngei puo’n a, kuomah le lut puo’n a: kei LALPA, Israel Pathien hi ka lut tâk ziekin kikhak zing ding ahi.

³Lengte vaihawmte vang chuh ka masang achun an thiengtho ne dingin zie tak a chun chieh thei un au; indan lien kawtkhak achun lut in tin, zie tak mah achun pawt kit in a,” a ti a.

⁴Tichun, amah chun mâllam pang kawtkhak achun ei puilut kit a. Ka vak et leh, ngaitie, LALPA Ho-In chuh LALPA umna vak lopitak chun a dim ta a. Tichun, bawkkhup in tuol ah ka puk ta a.

⁵LALPA chun, ka kawmah, “Mihing chapa, LALPA Ho-In mat dân leh a dân chengcheng na kawm a ka gen chungchâng achun na bil dawh in la, na mitin en in la, na lunggil in tiemteh phah, a Ho-In lut dante, a Mun Thiengtho apat a pawt dante chuh na lunggil in tiemteh pha’n.

⁶“Kiphin hat Israel te kawm achun gen ah: Kei bangakai chunga LALPA hin thil kihdak-um tak a hihteu chuh thuok peih talo ka hi.

⁷Ho-In chuh gamdang mi, zektan loh te chuh lut sak in a hihbuok uh a, kithawihna thau leh thisan te chuh ka kawma lat a hihlai in, ka thu ngailote chuh Ho-In achun a lut u a. Khutichun, ka mite chun, a thil kihdak-um hihteu chun ka thugawlh a bawhsieu hi.

⁸Chun, ka thil thiengthote chuh na enkawl puou a, zie gamdang mite hi ka mun thiengtho ah nanguh sik in na etkawl sak zaw tau hi!

⁹“LALPA Pathien chun hiti hin a tii; gamdang mi kuomah, phehlevo leh lunggil zektan lohte, Israel chate laka gamdang mi mawngmawng chuh ka mun thiengtho a a lut loh dinguh ahi.”

¹⁰Himahleh, “Levi te, Israel te milim pathien delh a a vakmang lai u a kei apat a gamla taka chiehsate chun vang a manlohnau kipuok un tin,

¹¹Ka mun thiengtho ah nasem in vang pang thei un au. Mipite’n hâlmang thillat ding leh, kithawihna dinga gancha a hun kaihteu chuh that un tin, mipi a dinga nasema a pan dinguh ahi.

¹²Aziek chuh, Israel mipite chuh milim hona lama a pui u a, mite chuh gitlohna lama a puih mang ziekun, a chung u ah ka khut ka tha a, a manlohnau chuh kipuok ngêi un au, tih hi Bang cheng chunga LALPA Pathien thugen ahi.

¹³Tichun, Keia dingin thiempu na sem ta puou un tin, ka thil thiengthote le hun naih ngei diek ta puo’n au. Zie chuh a thil kihdak-um hihteu zieka gawtna ding chuh ahi.

¹⁴Ho-In enkawl in ka siem a, nasep chengcheng leh, hih ding um taphawtte chuh hih dingin ka guot ngâl a,” ti’n.

¹⁵Bangakai chunga LALPA chun, “Israel chate, kei apat a a vakmang lai un le, Levi phung a thiempu, Zadok suonte chun Ho-In ah ginum takin ka na a na sem zel u a. Zieziekchun, tuhin le, amau haw hi ka na sem ding leh, ka umna a hung a, thau leh kithawihna thisan te lân ding ahiu ui.

¹⁶Amau haw chauh hi, Ho-In sung ah lut un tin, Ka maichâm ah tawiviel untin, Ho-In a Pathien hona ma kai un au.

¹⁷Chun, huong sungnung zaw kawtkhaka a lut tieng u leh, puonâk chuol, patngatpuon a siem chun kithuom untin, huong sungnung zaw insung lama zenvielna a sep tieng u leh, samul puo’n a a kivan dinguh ahi puoi.

¹⁸A luchang uh ah patngatpuon diel kawp untin, patngatpuon pheika cheng un tin, khawsa-ul supawt thei mâwng mâwnga chuh a kivan loh dinguh ahi.

¹⁹Chun, huongsung pawnung zaw a mipite laka a hung pawt masang u chun, a zenvielnau silhlechen chuh suoh untin, indan thieng achun a kawih dinguh ahi. Silhlechen dangin a kivan dinguh ahi, khutia chuh mipite chuh a silhlechen thiengtho u chun suknat a a um lohna ding un.

²⁰“Thiempute chun a luchang uh a met kawlh dinguh a hi puoh a, a sam u le a hawih sau dinguh a hi diek puoi, a sau hun phet a a met dinguh ahi.

²¹Thiempu chun, huong sungnung zaw a a lut tieng u leh, uain a dâwn dinguh ahi puoi.

²²Thiempu chun meithai ahim, mi mâksa nung ahim le a kichênpih dinguh ahi puoh a: Israel inkawte ngêi, nungak thiengtho ahim, thiempute thihsan meithai ahim a neih zawk dinguh ahi.

²³“Ka mite chuh thil thiengtho leh, mipi thilte a kibatloh dân a sinsak dinguh ahi a, sakhuo dana thil thieng leh thil thienglo a khenchuom sak dinguh ahi.

²⁴Kinielkalhna ah, thiempute chun ka dân banga thu a tan dinguh ahi: ka guolvak hunbi nei chengcheng achun ka dante leh, ka dân siemte a zawp dinguh a hi a, Sabbath le a nit dinguh ahi.

²⁵“Thiempute chun amau leh amau kisubuok dingin mithi luong a va sukkhak dinguh ahi puoi. A nu ahim, a pa ahim, chanu ahim, chapa ahim, suohpihpa ahim, suohpihnu ahim, pasal neilo ahim te thihna chungchâng a hihloh ngâl chun.

²⁶Chun, thiempu chuh a kisukbuok nung chun, ni sagih sim in tin; tichun thieng ina.

²⁷Tichun, mun thiengtho achun chieh intin, huong sungnung a Mun thiengtho achun lut intin, mun thiengtho a na a sep theih na dingin amah a ding in gitloh thawihna siem intin, khutichun, Ho-In achun na sem thei kit in a, LALPA’n a tii.

²⁸“Go chan bangmah nei puo’n a; Kei hi a gochan uh ka hi, ziehi Israel chate a khang a khanga a kipiek sawn zel dingu a ka piek chuh ahi.Israel te lak ah gochan bangmah a neih dinguh a hi puoi. A go chan u chuh Kei ka hi ngâl a.

²⁹Amau chun an thillat te, gitloh thillat te, sukkhelh thillat te chuh a nek dinguh ahi; Chuleh, Israel gama thil thieng tin cheng chuh amau chan ding ahi.

³⁰Gah masate laka a phapente, chun, na thillat teu laka a phapente, leh na thillat tincheng teu chuh thiempute a ding ahi: Chun, na In u a vangsakna a um zing theih na dingin na chângthâk mêk masak pên teu laka a masapente chuh thiempu kawma na piek dinguh ahi.

³¹Thiempute chun vacha hileh, gamsa hileh, a pûl thih ahim, ganhing dangin a thah ahim chuh a nek loh dinguh ahi.”