Read Gangte EZEKIEL 45 Bible Online

EZEKIEL 45 - Gangte bible

EZEKIEL 45

¹Chun, gam chuh phung tinte kawma gochan dinga na hawp tiengu leh, huntieng chuh LALPA dinga na sehkhen dinguh ahi: A dunglam chuh tawng singnih leh sangnga, a vailam chuh tawng singnih hi’n tin, a pum in gam thiengtho a hi ding ahi.

²Zie achun, mun thiengtho dingin a dung, a vai tawng zanga gêl gêl, a dung leh a vailam kibang hi’n tin, chun, a kimvelin mun-âwng, tawng zanga a lien a um ding ahi.

³Tichun, zie mun thiengtho apat chun, a dung tawng singnih leh sangnga leh, a vai tawng singkhat tehdawk in na tin, zie achun Mun Thiengtho pên chuh a um ding ahi.

⁴Zie chuh gama dinga mun thiengtho, thiempute, mun thiengtho a nasem sekte a ana sem dinga LALPA naih sekte a ding hi’n tin, a Inmun ding u leh mun thiengtho dinga gam thiengtho hiding ahi.

⁵Chun, mun dang a dung tawng singnih leh sangnga, avai tawng singkhat chuh, Levi te chi mun thiengtho a nasemte a chuom ding leh a khawpiu a dinga a um ding ahi.

⁶Gambung thieng kikhentha zul achun khawpi mun dingin a vai tawng zanga leh, a dunglam tawng singnih leh sangnga na tehdawk dinguh ahi. Zie chuh Israel inkuon pumpite chênna ding hi’n a.

⁷Gam chuh milien vaihawm haw a ding ale tehdawk hi’n tin, zie chuh gam Thiengtho thanglam pang apat chun, Mediterranean tuipi chanin hi’n a, chuleh, thanglam pang gamgi apat in a saklam pang gamgi chanin hi kit intin, a gam chuh Israel chate kawma kipie gam tawh a sauh dân kibang ding ahi.

⁸Zie chuh vaihawm miliente’n Israel gamsunga a chanvo dinguh hi’n tin, khutichun leng chate chun mipite chuh sugimthei ta puou intin, Israel mipite chun a nam dungzui in gam nei un au.

⁹LALPA Pathien chun hiti hin a gen a, “Nang haw, Israel leng chate leh vaihawmte, Na thagum suohnau leh pawngbawlnate chuh haihsan tau un. Thil dik leh, vaihawmna diktak chuh hih zawu un. Ka mite chuh a gam u apat nawhdawk kit ta kiu in, LALPA’n, a tii.

¹⁰“Mitin in bûkna dik leh tehna dik, Ephah dik leh bath diktak chuh mang u hen la,

¹¹“Ephah leh bath chuh a kibûktuok phet hi ding ahi, bath chuh homer mun sawma khena hawp khat dawl mah hi ding ahi. Ephah le homer mun sawma khena mun khat dawl ahih ding ahi. Homer apat a tehdawk ding ahi.

¹²“Chun, sekel chuh gerah sawmnih hi’n tin, sekel nga chuh sekel nga phet phet a hih ding a hi a, sekel sawm chuh sekel sawm phet phet mah a hih ding ahi a, min a chuh sekel sawmnga phet phet a hih ding ahi.

¹³“Chun, ziehi na thillat teu na piek ding dân uh a hi: buh homer khat zela ephah mun gup a hawp a mun khat na piek dinguh a hi: thau lat dingdan chuh,

¹⁴Kor khat zel ah bath mun sawma khena mun khat mah ahi, homer khat chuh bath sawm ahi ngâl a.

¹⁵Israel gan tatna muna belam hawn laka zanih lak ah a no khat zel, An thillat dinga na lat dinguh ahi, tichun, na gitlohnateu chuh ngaihdam hi’n a, tih hi LALPA Pathien kamsuok ahi.

¹⁶“Gam sunga mi chengcheng chun Israel miliente kawmah zie thillat hi pie’nau.

¹⁷Tha thak Kut hunbi nei cheng chengah hâlmang kithawihna te. An thillat te. Dâwn ding thillat te, miliente chun ngaihtuoh untin, gitloh thawihna te, An thillat te, hâlmang kipawlkhawmna thillat te, Israel inkawte gitloh lâkmangna ding chuh a man a piek sak ding ahi,” ti’n.

¹⁸LALPA Pathien chun hiti hin a tii: “Tha khatna, zie tha, ni khat ni chun, bâwngchal tuoi, demna bei mang in na tin, mun thiengtho chuh na sukthien ding ahi,

¹⁹Chun, thiempu chun gitloh thawihna thisan huntieng chuh la’n tin, Ho-In kawtkhak bieng haw leh, maichâm dawhkhâng ning li haw leh, huong sungnung zaw kawtkhak bieng haw achun tat ina,

²⁰Chun, zie tha, ni sagih ni chun tawngpalh ahim, hetlohna ziek ahim a, thil hihkhielte ding chun khutibang mah chun hih in na tin, khutichun, Ho-In chuh na sukthien ding ahi.

²¹“Tha khatna, zie tha ni sawm le li ni chun Chiehkân Kut mang pan un lau; ni sagih sung chuh chângthâk chawl sawhloh na nek dinguh ahi.

²²Zie ni chun, milien chun amah leh a gama mi chengcheng dingin gitloh thawihna dingin bâwngchal tuoi tuok ina.

²³Chun, Kut hun sung ni sagih ni chun, bâwngchal tuoi demna bei sagih leh, belamchal sagih zel LALPA kawma hâlmang kithawihna dingin tuok intin, gitloh thawihna dingin ni chengin kêlchal khat zel tawh.

²⁴Chun, An thillat ding le bâwngchal khat zel chungah ephah khat, belamchal khat chungah ephah khat, ephah khat zel ah thau hin khat zel a tuok ding ahi.

²⁵“Chuleh, tha sagihna, ni sawmlenga ni a kipan guolvakna ding achun le, miliente chun ni sagih sung chuh, gitloh thawihna, hâlmang kithawihna te leh, An thillat te leh thau te chuh a kilân masa zah mah kha a a tuok kit ding ahi,” a ti a.