Read Gangte EZEKIEL 46 Bible Online

EZEKIEL 46 - Gangte bible

EZEKIEL 46

¹LALPA Pathien chun hiti hin a tii: “Huong sungnung zaw lutna kawtkhak suohlam nga chuh, nasep ni, ni gup sung chuh kikhak intin, himahleh, Chawlhni leh tha thak ni, guolvak ni leh kihawng ding ahi.

²Lengpa chuh, huongsung pawnung zaw apat chun, lutna kawtkhak lampi a indan lien achun lut intin, kawtkhaka khuom bul achun ding intin, Thiempu chun hâlmang thilpiek leh chamna thilpiek pie’n tin; kawtkhak bul achun Pathien hona nei intin, a zawh leh a pawt kit ding ahi.

³Chun, mipite chun vang Sabbath ni leh Tha thak ni haw achun zie kawtpi lutna mai achun bawkkhup in LALPA ho sek un au.

⁴Chuleh, leng chun Sabbath ni a LALPA masanga hâlmang kithawihna ding chuh belamno demna bei gup leh belamchal demna bei khat a hun ken ding ahi.

⁵Tichun, belamchal khat tawh An thillat ephah khat, belamno tawh lat khawm ding chuh ahih theih dân bang zel leh ephah khata thau hin khat zel hi’n a.

⁶Chun, tha thak guolvak ni achun, bâwngchal tuoi demna bei tawh, belamno gup leh belamchal khat lân intin, demna bei a hi vek ding ahi.

⁷Chun, bâwngchal cheng leh belam cheng tawh lat dingin an ephah khat gel hi’n tin, belamchal tawh lat ding chuh vaihawm milien in a deih dân dân chuh hi’n a. Zie tawbang an thillat te chuh, ephah khat zel ah olive thau hin khat zel lat khawm ding ahi.

⁸Chun, lal chuh lam in kawtpi In huongcha ah lut in tin, zie tak mah a chuh a pawtdawk kit ding ahi.

⁹“Mipi vantâng haw chuh, guolvakna hunbi nei a LALPA ho dinga a hung tieng u leh, mâllam kawtkhaka hung lut chuh simlam kawtkhaka a pawt dinguh a hi a, simlam kawtkhaka lut chuh mâllam kawtkhaka a pawt ding ahi. A lutnau kawtkhak mah a chuh a pawt kit loh dinguh ahi. A malam uh zuon a a chiehpai zel zawk dinguh ahi.

¹⁰Chun, a lut tieng u leh, leng chuh amau haw tawh lut khawm un tin, a pawt tieng u leh amah le a pawt kit ding ahi.

¹¹Chun, kut ni leh hunbi nei guolvak ni chun An thillat chuh bâwngchal tuoi khat ah ephah khat, belamchal khat ah ephah khat; belamno haw ding chun a piek theih dân dân, ephah khat ah thau hin khat zel hi ding ahi.

¹²“Chun, lal chun amah nawp thu a thillat LALPA kawma a piek ding chun, hâlmanga kithawihna ahim, chamna thillat ahim hita leh, suohlam nga kawt chuh hawn sak hi’n tin, Chawlhni a a hih bangmah in, hâlmanga kithawihna te leh, chamna thillat te chuh hih in tin; tichun, a chieh dawk nung chuh leh kawt chuh khâk hi’n a.”

¹³“Chun, ni chengin LALPA kawma hâlmanga kithawihna dingin belamno kum khata upa, demna bei na lat ding ahi. Zie thillat chuh zingkal chenga hih ding ahi.

¹⁴Chun, zingkal cheng leh An thillat te guonggalh in na tin, ephah mun gup a khena mun khat leh thau hin khat mah, hawp thuma khena hawp khat chuh changbuong nêl sunawm dinga na hel ding ahi. Zie hi kumlekhuo a LALPA kawma hâlmang thillat ding dân chuh ahi.

¹⁵Chun, LALPA kawma thillat ding belamno leh changbuongnel, leh olive thaute chuh zingkal cheng leh na guonggalh ding ahi,” ti’n.

¹⁶Chun, LALPA Pathien chun hiti hin a tii: “Lal in a chapate, kuo kawm ale gochan bang hitaleh a piek chun a chapate a hi’n tin, a goluoh uh ahi mai hi.

¹⁷Himahlele, a gochan lak achun a suok kuo hita leh a piek chun, Jubili a hung tun kit tieng leh amah a chan kit ding ahi. Amah a ahi a, amah leh a chapate chauh chun a chan theih uh ahi.

¹⁸Zielo chun le, lal in mipite gochan chuh a lâksak ngei ding ahi puoi. A chate kawma go a piek chuh, amah gochan laka ngêi hi ding ahi. Khutia chuh ka mite a gam uh lâksak a, a sukgimtheih lohna dingun,” a ti a.

¹⁹Chun, amah chun, kawtpi sika thiempute dinga indan thiengtho, mâllam nga achun ei puilut a, chun, ngaitie, indan thanglam pang chuh ei kâwkmuh a.

²⁰Tichun, ka kawmah, “Ziehi, sukkhelh thawihna thillat leh gitloh thawihna thillat thiempu te’n a huonna mun uh; chângthâk thillat a upna mun uh ahi; zie chuh mipite suna thei ding thil thiengtho bangmah huongsung pawlama chawih dawka a um lohna dingin,” a ti a.

²¹Chun, huongcha pawnung zaw achun ei puidawk a, huongcha sung ning li zul achun ei pui a, a huongsung ning chiet chuh ei kâwkmuh kit a.

²²Huongcha sung ning li achun huongcha neu bang nei, a dung tawng sawmli, a vai tawng sawmthum a na um a, zie a ning lite chuh a kitieh chiet a.

²³Zie huongcha ning li sunglam a chun a kimvelin suong a tieng u a; zie tien pang achun thil huonna ding thukkhuk a um a.

²⁴Chun, amah chun ka kawmah, “Ziehaw hi an huonna In ahi a, Ho-In a nasemte’n mite kithawihna sa a huonna mun u chuh ahi,” a ti a.