Read Gangte EZEKIEL 47 Bible Online

EZEKIEL 47 - Gangte bible

EZEKIEL 47

¹Tichun, Ho-In kawtkhak achun ei leh puihkit a, chun, ngaitie, Ho-In kawtkhak bul nuoi apat chun, suohlam zuon in tui a hung luong dawk a; ho-In chuh suohlam nga ahi ngâla, tichun, tui chuh maichâm simlam a Ho-In sik changlam apat chun a hung luong tha a.

²Chun, mâllam nga kawtpi In achun ei puidawk a, pawlama chun suohlam nga kawtkhaka, in pawnung zaw tiengin ei pui viel a; chun, ngaitie, changlam pang achun tui a hung luong dawk a.

³Chun, amah chun tehna khau chawiin suohlam nga’n a chieh a, tawng sangkhat a teh a; chun, tui chuh ei pui galkai a, siekmit tieng achup a.

⁴Chun, tawng sangkhat a teh kit a, tui chuh ei pui galkai kit a, tui chun khûp tieng achup a. Chun, tawng sangkhat a teh kita, tui chuh ei pui galkai kita; tui chuh kâwng tieng achup a.

⁵Chun, tawng sangkhat a teh kit a, ka palkaih zawh loh luipi a hung hi ta a, tui chuh a hung khang zel a, a pala pal guol loh, a zap a zap khawp hiel luipi ahung hi ta a.

⁶Amah chun ka kawmah, “Mihing chapa, zie haw hi na mu kha ta?” a ti a. Tichun, lui pang lama chun ei lehpuih kit ta a.

⁷Chun, ka vak tun kit phet chun ngaitie, lui pang tuok gel a chun thing atam a tam hi ka mu a.

⁸Amah chun ka kawmah, “Zie tui suohlam gam lama luong hi Arabah gama luong lut ding ahi. Tuipi Thi ah luong lut intin, tichun, Tuipi tui-al chuh, tui thieng suok sak ina.

⁹Chun, hiti hi hung hi’n tin, luicha chuh a luonna taphawt ah, ganhing tin chengin hinlawh un tin, ngate le um sausau un au. Tuipi Thi tui chuh a thien na ding leh a luonna tâk chenga ganhingte’n a hinlawhna dingun zie lui hi luong ahi ngâl a.

¹⁰En-gedi luicha apat in, En-eglaim tiengin, luipi panga chun ngaman mite um un tin, a len hawu chuh pho gawt dingin zak un au. Nga chuh chi tamtak hi’n tin, tuipi a nga bang mai in tam un au.

¹¹Himahlele, lui panga buonthuok na mun leh dâwpte chuh sukthien hi puo’n tin, chi khuk dinga taihsan hi zaw’na.

¹²A lui pang tuoka chun theikung chi tin kek intin, ziehaw chuh a nah vuoi ngeilo in, gah loh tih le um ngei puo’n tin, mun thiengtho apat a lui hung luong dawkin a chawm a hih ziekin tha chengin gah ina, a gah chuh nek ding hi’n tin, a nah chuh sukdamna ding hi’n a.”

¹³LALPA Pathien chun hiti hin a tii, “Ziehaw hi Israel nam sawmlenihte laka gam kihawp dân ding chuh ahi a, Joseph phungte chan nih chang in au.

¹⁴Na pileputeu kawmah zie gam hi, a goluoh ding u a piek dingin ka na kipautiem ta ngâl a, zieziekchun, tuhin, na laku ah kibang chiet a na kihawp dinguh ahi.

¹⁵“Zie hi a gam pumpi gamgi ding chuh ahi: mâllam achun Tuisuohgiet apat in, Hethlon hawhpai in, Hameth lutna guoma Zadad khawpi tiengin;

¹⁶Berothah khawpi te, (Damaska leh Hamath lalgam kikala um) Sibraim te Hauran gamgi bula um, Hezerhalhikon tiengin.

¹⁷Khutichun, mâllam gamgi chuh Mediterranean tuisuohgiet apat a Damaska gamgi zula Hazar-enon tiengin hi’n tin, mâllam a chun Hamath tawh kigamgi ahi a. Zie hi mâllam gamgi chuh ahi.

¹⁸“Chun, suohlam gamgi chuh, Hauran leh Damaska kikala Gilead leh Israel gam kikala Jordan luidung hawh ina; mâllam gamgi apat in suohlam ah Tuipi Thi ah Tamar tung in a. Zie hi suohlam gamgi hi ding ahi.

¹⁹“Chun, simlam achun Tamar apat in Miriboth-kadesh tiengin mâl thanglam ah, Aigupta gamgi zul ah, Tuisuohgiet tung in a. Zie hi simlam gamgi ding chuh ahi.

²⁰“Chuleh, tumlam achun, Tuisuohgiet hi a gamgi ding hi’n tin, mâllam zuonin thanglam gamgi apat in Hamath lutna guom zawn tiengin hi’n a. Zie hi tumlam gamgi hi ding ahi.

²¹“Khutichun, zie gam hi Israel te nam dungzui zelin na laku ah hawm un lau.

²²Chun, hiti hi hi’n tin, na gam chan ding u leh na lak u a nam dang cheng, zi le cha neisate gam chan ding chuh na hawp dinguh ahi. Amau haw chule, Israel cha a piengte banga a um dinguh ahi a, Israel chate lak ah, nangmau haw bang mah a chan a neih dinguh ahi.

²³Chun, kuo nam lak ale nam dang chuh ana cheng leh zie tak achun a gam chan ding na guot sak dinguh ahi, tih hi LALPA kamsuok ahi.”