Read Gangte EZEKIEL 48 Bible Online

EZEKIEL 48 - Gangte bible

EZEKIEL 48

¹Ziehaw hi a gam hawp dân dungzui u a, a nam hawu min chuh a hi: Mâllam gamgi, Mediterranean Tuisuohgiet apat Hethlon khawpi ah, Hemath hawhpai in, Damaska gamgi Hemath kieng mâllam pang Hazar-enon tiengin, a sik suohlam leh tumlam chan khat chuh Dan te chan ahi a.

²Dan chan tawh kigamgi’n, suohlam apat a tumlam zuonin chan khat chuh Aser chan ahi.

³Aser tawh kigamgi’n, suohlam apat tumlam zuonin chan khat chuh Naphtali te chan ahi.

⁴Naphtali chan tawh kigamgi’n, suohlam apat tumlam zuonin chan khat chuh Manasseh te chan ahi.

⁵Manasseh tawh kigamgi’n, suohlam apat tumlam zuonin chan khat chuh Ephraim te chan ahi.

⁶Ephraim chan tawh kigamgi’n, suohlam apat tumlam zuonin chan khat chuh Reuben te chan ahi.

⁷Reuben chan tawh kigamgi’n, suohlam apat tumlam zuonin chan khat chuh Juda chan ahi.

⁸Juda chan tawh kigamgi chun, suohlam apat a tumlam zuonin, thil mamawhna chuom a mat dingin gam chuh na khenthâk chuom dinguh ahi. Zie chuh a vailam tawng singnih leh sangnga hi’n tin, a dunglam chuh suohlam apat tumlam zuona teh a, namte kawma na piek tieh mah uh kha hi ding a hi, a lai ah Mun thiengtho um ina.

⁹Chun, gam teh dawk chuom sunga chun, a dunglam tawng singnih leh sangnga, a vailam tawng singnih chuh LALPA dinga na lat dawk dinguh ahi.

¹⁰Chun, zie hi mun thiengtho dinga kawihchuom hi’n tin, zie sung achun mâllam pang a dung tawng singnih leh sangnga leh tumlam pang avai tawng singkhat, suohlam pang avai tawng singkhat, Simlam pang a dung tawng singnih leh sangnga thiempute chanvo dinga piek hiu un tin, a lai ah LALPA mun thiengtho um ina.

¹¹Zie gam chuh thiempu dinga kikawih thiengtho, Zadok chapate, ka thu zawpte a ding ahi. Amau haw chun Israel chate a vak mang lai u a, Levi chite’n thil diklo a hih guol u khan a hih puou ui.

¹²Gam thiengtho pumpi lak apat a Levi-chite dinga tehdawk chuom, bân tak achun cheng un tin, zie chuh “Mun thiengtho pên” hi ding ahi.

¹³Thiempute chan zul achun Levi-chite’n gam nei un tin, a dunglam tawng singnih leh sangnga, a vailam tawng singkhat hi’n a. Abawn a a sauh dân chuh tawng singnih leh sangnga leh a vailam chuh tawng singnih hi’n a.

¹⁴Chun, LALPA kawma kilân thiengtho gamte chuh, a gam phatna mun pên ahi ta a, kuoma’n a zuok un, a theng kuol viel un, mi dangte a piek loh dinguh ahi. A thiengtho a hi ta a, LALPA chanvo a hita ngâl a.

¹⁵Chun, a vailam tawng singnih leh sangnga khel ah, tawng sangnga chuh vantâng chan, khawpi sakna ding, chênna in ding leh daikieng mun-âwng dingte hi’n a: Khawpi chuh a lailung lai tak ah um ina.

¹⁶A gam pumpi huopsung letdan chuh, a mâllam pang chuh tawng sangli leh zanga, a simlam pang ah tawng sangli leh zanga; a suohlam pang ah tawng sangli leh zanga, a tumlam pang ah tawng sangli leh zanga chiet hi’n a,

¹⁷Chun, a khawpi pumpi kimvel achun gam âwng nei intin, mâllam pang tawng zanih leh sawmnga, simlam pang tawng zanih leh sawmnga, suohlam pang tawng zanih leh sawmnga, tumlam pang tawng zanih leh sawmnga a lien a um ding ahi.

¹⁸Khawpi kisak zawh nunga, simlam panga mun thiengtho bân taka gam âwng um nalaite chuh suohlam pang ah tawng singkhat, tumlam pang ah tawng singkhat chuh khawpi a chêngte huon leh lo a bawl dinga khenthak suok ding ahi.

¹⁹Kuole, khawpi a cheng taphawtte, bang nam a kipat hitalele, zie gam chuh lo in bawl thei un au.

²⁰Gam thiengtho dinga sehdawk chuom pumpi chuh, a dunglam tawng singnih leh sangnga, a vailam tawng singnih leh sangnga hi’n a. Gam thiengtho sehdawk chuom chuh a dung a vai kibang, khawpi luoh sung chu tawh teh khawm vek ahi.

²¹Chun, a khel gam thiengtho dinga piekdawk leh khawpi chan sik tuok gel chuh lal chanvo hi’n tin, suohlam pang gam thiengtho dinga khenthak, tawng singnih leh sangnga khel leh, tumlam pang tawng singnih leh sangnga khel gambung dangte zul zul chuh leng chate chanvo hi’n a: tichun, gam thiengtho dinga sehthak leh Ho-In mun chuh a lai tak ah um ina.

²²Zie chuh suohlam zuonin a chieh a, saklam pang gamgi ah, chuleh, thanglam zuonin a chieh a, Tuisuohgiet ah a lut a, tichun, mâllam panga chuh, Juda chan ahi a, simlam panga chuh Benjamin chan ahi.

²³Zie a gam sehthak chuom bîkte, simlam pang chuh, phung um nalaite kawma chuh piek hi’n tin, suohlam gamgi apat a thanglam a Tuisuohgiet tiengin, a nuoia bang hin hawp in um un lau:

²⁴Benjamin te tawh kizawm in, suohlam apat tumlam zuonin chan khat chuh Simeon te chan ahi a.

²⁵Simeon te tawh kizawm in, suohlam apat tumlam zuonin chan khat chuh Issakar te chan ahi a.

²⁶Issakar te tawh kizawm in, suohlam apat tumlam zuonin, chan khat chuh Zebulun te chan ahi a.

²⁷Zebulun te tawh kizawm in suohlam apat tumlam zuonin chan khat chuh Gad te chan ahi a.

²⁸Gad te simlam pang gamgi chuh Tamar apat a Meribah-kadesh tuite tiengin Aigupta luipi hawhpai in, Tuisuohgiet Lien tung ina.

²⁹“Zie hi Israel namte gochan leh gam kihawp ding dân leh a gambungte chuh a hi tih hi,” tih hi LALPA Pathien kamsuok ahi, a ti a.

³⁰Chun, Jerusalem lutna kawtkhak chuh sawm le nih a hi a. A bang lite chuh tawng sangli leh zanga chiet a hi a, zie chun phung tina nam min zelin kawtpi thum chiet a um hi.

³¹Khawpi kawtpite chuh Israel nam min bang zela min vawh ding ahi a; Mâllam kawtpi thum te chuh, Reuben kawtpi khat, Juda kawtpi khat, Levi kawtpi khat hi’n a;

³²Chun, suohlam pang tawng sangli leh zanga achun kawtpi thum, Joseph kawtpi khat, Benjamin kawtpi khat, Dan kawtpi khat hi’n a;

³³Chun, simlam pang tawng sangli leh zanga achun kawtpi thum mah; Simeon kawtpi khat, Issakar kawtpi khat, Zebulun kawtpi khat hi’n a;

³⁴Tumlam pang a tawng sangli leh zanga achun kawtpi thum mah um intin: Gad kawtpi khat, Aser kawtpi khat; Naphtali kawtpi khat hi’n a.

³⁵A kimvel in tawng singkhat leh sanggiet hi’n tin; zie ni apat chun khawpi min chuh “Jehovah Shammah” LALPA umna tih hi ding ahi, ti’n.