Read Gangte EZEKIEL 5 Bible Online

EZEKIEL 5 - Gangte bible

EZEKIEL 5

¹“Chun, nang mihing chapa, chemzâm hiem tak la’n la, sam mette bakcheh chem in mang inla, na sam leh na khamul met in; chun bûkna la’n la, na sam chuh khenzak in.

²Mun thuma khena mun khat chuh huola a um sung nite a bukim tieng leh khawpi laia meia na hâl ding ahi a, mun thuma khena mun khat dang chuh lân na tin, khawpi kimvela chemzâma na sat nêl ding ahi; chun, mun thuma khena mun khat kit chuh huih tawhmang dinga na thehzak ding ahi a, zie nung chuleh ken chemzâm in delh zui ing ka.

³Chun, tawmcha la dawkin na tin, na puonâk chuol mawng a na chun ding ahi.

⁴Chun, zie laka neukhat chuh la kit inla, mei laka na seh lut ding ahi a, meia chuh na hâl ding ahi; zie apat chun Israel insung mite chengcheng achun mei hung pawt ina” a ti a.

⁵LALPA Pathien chun hiti hin a tii: “Zie hi Jerusalem khuo chuh ahi a: namte lailung achun ka kawih a, a kimvel ah gam haw chuh a um u a;

⁶Chun, namte sanga khawk zaw a gitlohna bawl in, ka vaihawm chungah a hel u a, a kimvela gamte sanga khawk zaw’n ka dân siem chung a hel in, ka thutanna haw chuh paih tha’n ka dân siem haw chuh a zui puoh ngâl a.

⁷Zieziekchun, LALPA Pathien chun hiti hin a tii: Na kimvela nam haw sanga buoium zawa na uma, ka dân siem haw guola na um loh a, ka thutanna haw na zuih loh a, na kimvela nam haw dân chuh na zuih zawk ziekin,

⁸LALPA Pathien chun hiti hin a tii: Ngaitie, kei hin, keimah ngêi hin, ka hun lân na hi, namte mitmuh ngêi in na laku ah gawtna hun tunsak ding ka hi;

⁹Chun, na milim tenum haw ziek chun thil ka na hih khâk loh, hih le ka hih kit tâk loh ding chuh na chunga hih ding ka hi.

¹⁰Zieziekchun, na sunga um pate chun a chateu sa neu intin un, chate chun le a pateu sa chuh nen au; chun, na chung uh ah thutanna siem ing ka ting, na sunga dama umsunte chuh muntina thehzak vek ding ka hi.

¹¹“Khutichun, LALPA Pathien chun ziehi a tii: Na buokna haw leh na tenumna hawa ka Ho-In na sukbuok ziekin, a hi’n a ka hin sung chuh, hun vat chap lemlum ing ka ting, sit hun nei lo hiela na chunga zahngaihna neilo ding ka hi.

¹²Mipite mun thuma khena mun khat chuh hipi ahim, kiel ahim in na sung ah thiu intin un; mun thuma khena mun khat dang chuh na kimvel ah chemzâm in thiu intin un; mun thuma khena mun khat kit chuh thehzak ing ka ting, amau chuh chemzâma delhzui nalai ding ka hi.

¹³“Zie tawbang chun ka lungnatna tunsak ing ka ting, a chung u ah ka lungnatna buntha’ng ka ting, ka lung-awi tan a: chun, kei, LALPA hin a chung u a ka lungnatna ka butthak tieng leh thikthusie taka ka gen ahi tih hun hechien tan au.

¹⁴Zielo chun, na kimvela nam haw lak leh na kawm hawh malam cheng chengte mitmuh achun khaw hawm nung leh muhsit-um a hun siem ding ka hi.

¹⁵“Khutichun, lungna tak leh thangtawm taka, nasa taka hilhgaih a, na chunga vaihawmna ka tunsak tieng chuleh na kimvela nam haw mitmuh achun muhsit um leh kizawnhona, kivaulawkna leh thil tizat-um hung hi’n la. Kei, LALPA hin ka gen ta hi.

¹⁶A chung u ah kielna thalchang phalo tak, a manthaina ding u chuh sawl ing ka ting, a hun susie dinga ka hun sawl ding ngêi chuh; na chungah kiel supung ing ka ting, na hinna bulpiu, an chuh susie’ng ka.

¹⁷Chun, na chungah kiel leh gamsa hâng haw hun sawl ing ka ting, na chateu hun thah sak in au; hipi leh thisan suohna’n hun pal zing in tin, chun, na chunga chemzâm mang ding ka hi. Kei, LALPA hin ka gen ta hi,” ti’n.