Read Gangte EZEKIEL 6 Bible Online

EZEKIEL 6 - Gangte bible

EZEKIEL 6

¹Chun, LALPA thu chuh ka kawmah a hung tung a,

²“Mihing chapa, Israel tâng lam haw khu nga’n la, a kawm u ah thu genlawk inla,

³Nanguh Israel tângte haw, LALPA Pathien thu hi ngaithau in: LALPA Pathien chun muol leh tâng haw leh kawlsie haw leh guom haw kawm a chun” hiti hin a tii: Ngaitiem u, kei, keimah ngêi hin na chung u ah chemzâm hun pan ing ka ting, milim pathien na honau mun sang haw chuh susie vek ding ka hi.

⁴Na maichâm hawu chuh sukchim in um intin, na gimlim hâlnau haw chuh khet gawp in um in au: chun, na mi thah hawu luong chuh na milim pathien haw ma achun paih tha’ng ka.

⁵Israel chate luong haw chuh a milim hawu ma achun kawih ing ka ting, na guh hawu chuh na maichâm kimvel u a chun thehzak ing ka.

⁶Na chênna mun chengcheng u a khawpi haw chuh suksiet hi’n tin, na milim hona mun sang hawu chuh sukchim in um in au; na maichâm hawu chuh suksiet leh sukchim ahih theihna ding leh na milim hawu chuh khet gawp ahih u a sukbeih ahih theihna dingun leh na gimlim maichâm hawu chuh satthâk ahih u a, na thil siemkawm hawu chengcheng chuh a manthai theihna dingin.

⁷Thah a umte chuh na lak u ah puk intin un, khutichun, kei hi LALPA chuh ka hi tih hun he ta’n lau.

⁸“Ahihziekin, na lak u a khenkhatte chuh hinghawih ing ka; gamtina thehzak a na um tieng u leh na lak u a khenkhat in nam haw laka chuh chemzâm a pumpelh theihna dingun.

⁹Zie tieng chuleh, na lak u a suokcha haw chun sala puih a hihnau namtin laka chun ei hun hezing tan au; kei ei nusieh a zawlsai lungthim a putnau ka suksieta, a milim hawu kawma zawl ei saihsannau a mitteu chuh ka sukdûk sak tieng chu leh: a tenumnau a thil phalo ana hih hawu ziek chun amau leh amau ngêi kiten ta’n au.

¹⁰Khutichun, kei hi LALPA chuh ka hi a; zie thil phalo a chung u a tunsak ding ka tih hi mawk a ka gen maimai ahi puoi tih hi hun he tan au.”

¹¹LALPA Pathien chun hiti hin a tii: “Na khut thing in, na keng sek inla, Ta lâwm lâwm an! Israel insung mite tenumna gitlohna zieka maw!, ti’n. Chemzâm leh kiel leh hipi a thi ding ahi ngâl u a.

¹²Gamla taka umte chuh hipi’n thiu in tin, anai a um chuh chemzâm in thi’n tin, chun, a suokcha sun, huol a um chuh kiel in thi’n a; zie tawbanga hi ka lungnatna a chung u a tunsak ding ka hi.

¹³Chun, tâng tin leh muol tin chung leh thing tin leh gangpi bawk tin cheng nuoia a milim hawu kawma gimlim a pieknau muntina a maichâm hawu kimvela a milim hawu laka a mithi luongteu a kizam tieng leh kei LALPA chuh ka hi tih hun he tan au.

¹⁴Khutichun, a chung u ah ka khuttha’ng ka ting, gamthip apat Diblah chanin a chênna gam cheng u chuh gamgaw suoh sak in bangmah keh lohna’n siem ing ka ting: Khutichun, kei hi LALPA chuh ka hi tih hun he tan au,” ti’n.