Read Gangte EZEKIEL 7 Bible Online

EZEKIEL 7 - Gangte bible

EZEKIEL 7

¹LALPA thu chuh ka kawmah a hung tung kita,

²“Nang, mihing chapa, LALPA Pathien chun Israel gam kawma chun hiti hin a tii: Tawpna chuh ahi tai! Gam ning li ah tawpna chuh a hung tung tai.

³“Tuhi nang dingin tawpna chuh ahi, na chungah ka lungnatna chuh hun tunsak ing ka ting, na umdan bang zelin na chungah vaihawm ing ka ting, na tenumna cheng chuh hun dit ding ka hi.

⁴Gawt loh in hun kawih puo’ng ka ting, na chungah zahngailo hiel ding ka hi: Na lak u a thil tenum na hih hawu leh na umdan chengcheng chuh hun dit ding ka hi; tieng chuleh LALPA chuh ka hi tih hun he’n lau,” ti’n.

⁵LALPA Pathien in hiti hin a tii. Entiem u, “Sietna apat Sietna” ahung tung hi, ti’n.

⁶Tawpna a hung tung ie, tawpna chuh a hung tung ie; nang dingin a hung kipan tai; ngaitie, a hung tai!

⁷Aw, gam luohpa, na sietna ding na chungah a hung tung ie; ni chuh anai tai, buoina ni, kipaka tâng chunga kikona ni hilo.

⁸Tuhin ka lungnatna chuh na chunga hun buntha vak ding ka hi ta a, na chunga ka lungnatna mang ding ka hi; na umdan bang zelin na chunga vaihawm ding ka hi; na tenumna chengcheng chuh hun dit vek ding ka hi.

⁹Chun, gawt loh in hun kawih puo’ng ka ting, na chunga zahngai lo hiel ding ka hi: Na lak u a thil tenum na hih hawu leh na umdan chengcheng chuh hun dit ding ka hi: khutichun, kei LALPA hi gawt thei ka hi tih hun hen lau.

¹⁰Ngaitie, ni chuh, ngaitiem u, a hung tung tai! Na sietna a hung tai, thu dikloh na chuh a pak lun a, uonna chuh a mûm a.

¹¹Kipawngbawlna chuh nunsietna mawlh a suok ta a; kuomah um ta puo’n au, a thawm ahim, a neihzawh nau ahim le kuoma’n it puo’n au.

¹²Hun chuh a hung tung ta a, ni chuh a nai huoi huoi tai: a chawte le kipâk kiu henla, a zuokte le lungkham kiu hen: lungnatna chuh a bawn u a chungah a tung ngâla.

¹³A chawpa tawh dam khawm zing mahleu, thil zuokpa chun a zawk chuh mu kit talo ding ahi ngâla; kilâkna chuh a bawn u a chunga tung ding thu ahi ngâla; zie chuh vaikit puo’n tin, a gitlohna ziekun khat chale hingdawk puo’n au.

¹⁴Pêngkun chuh mût u henla, thil cheng chengah kisazo ta mahleu, kuomah galdo dingin chieh puo’n au; ka lungnatna chuh a bawn u a chungah a um ngâla.

¹⁵Khawpi pawlam ah chemzâm, khawpi sung ah hipi leh kiel: gamlaka um chuh chemzâm in thin tin, khawpi sunga um chuh kiel leh hipi’n ne zo ina.

¹⁶Ahihziekin, a suokcha a taidawk a um chun, luiphai vakhu guolin tâng chung haw achun muhdawk in um in tin, amau chiet gitlohna ziekin thum leh mau in um in au.

¹⁷Khut chengcheng chuh zawitha zo ta’n tin, khûp chengcheng chuh tui guolin nem zo ta’n a.

¹⁸Kawlladip puon cheng intin un, lauhna’n amau chuh tuom intin, a mel u ah zahchâkna kilang intin, a luchang chengcheng u chuh kawlh vek ina.

¹⁹A tangkaguou leh a sanateu chun LALPA lungnatna ni a chun hukdawk thei puo’n tin, a tangkaguou chuh kawtthêl ah thehthang intin un, a sanateu chuh ninpa tawbang hi’n a; ziehaw chun a hinnau sutai thei puo’n tin, a gil u le suvah thei puo’n a, gitlohna a a puknau ahih zawk sek ziek in.

²⁰A kicheinau sana hawihna chuh a kilek pih u a, a milim tenum hawu leh a thil kihdak-um hawu siemna’n a mang zaw sek ui; zieziekchun ziehaw chuh amau dingin ninpa tawbang phetin ka na siem tai.

²¹“Chun, gâllâk thil dingin nam dang haw khut ah pie’ng ka ting, leia migilote gâllâk thil dingin pie’ng ka ting, amau, chun subuok in au,

²²Amau lak achun va kikum puo’ng ka ting, ka mun zek chuh subuok in au. Tichun, guchate lut intin un, subuok ding ahi ngâl u a.

²³“Thik kikuoi mat diet diet in siem un, gamsung chuh thisan suohna gitlohna’n a dim ta a, khawpi chuh thagum suohna’n a dim ta ngâla.

²⁴Zieziekchun, Jentel te laka gilopen haw hun puilut ing ka ting, a in hawu lâksak in au; a hâtnau a kisuonpih u chuh sutawp ing ka ting, a mun zek hawu chuh sukbuok in um in au.

²⁵Lungzînna a hung tunga, muonna a hawl u a, a um hiel puoh ngâla.

²⁶Sietna chunga siet zawksemna, thuthang chunga thuthang phalo zawsem hung um intin, thiemgau kawmah kilâkna hawl intin un; himahleh, dân chuh thiempu apat in bei intin, upate apat in tatna genna um hiel puo’n a.

²⁷Lengpa chuh lungkham intin, hotu chuh beidawnna puon-In kivan intin, mipi vantâng khut le kithing ina. A umdan bang zel un a chung u ah hih ing ka ting, a thilhih bang zel un vaihawm khum ing ka; khutichun, LALPA chuh ka hi tih hun he ta’n au,” a ti a.