Read Gangte EZEKIEL 8 Bible Online

EZEKIEL 8 - Gangte bible

EZEKIEL 8

¹Chun, ka saltannau kum gupna, tha gupna, zie tha ni ngana ni chun hiti hi ahi a LALPA Pathien khut chuh ka chungah a hung uma.

²Khutichun, ka vak et leh, ngaitie, mi mei guola kilang hi a hung uma; a kâwng dana kilang apat anuoilam chuh mei ahi a; chun, a kâwng apat a chunglam chuh sumeng kinawt val guola val ahi.

³Chun, khut tawbang hi a hun thadawk a, ka chalsam in ei mana, Thagau chun lei leh van kal ah ei dawm kâng ta mai a, Pathien kilâkna’n Jerusalem ah ei pui a, huong sungnung mâllam a kawtpi khakna bul a chun ei puitung ta a; zie tak achun Pathien thikthu susie milim chutna mun chuh a uma, zie chun a thikthu a chawktho seka.

⁴Chun, ngaitie, phaicham a kilâkna ka muh tawbang khah Israel Pathien thupi na chuh zie tak achun a um a.

⁵Khutichun, amah chun ka kawmah, “Mihing chapa, mâllam nga’n na mit vak hak tie leh,” a ti a. Khutichun, mâllam nga a ka mit ka vak hah leh, ngaitie, maichâm kelkawt mâllam a lutna a chun Pathien thikthu susie, zie milim hi ana uma.

⁶Chun, amah chun ka kawmah, “Mihing chapa, a thilhih u kha na mu? Israel insung mite’n thil kihdak-um nasa tak mai, ka In thiengtho apat a gamla taka ka chiehmang lawh pên, zie taka a hih u kha? Zie sanga thil tenum zaw hile hun muh beh in la,” a ti a.

⁷Chun, huongsung pawnung zaw a lutna a chun ei pui a, ka vak et leh, bang a chun a hâwm ana uma.

⁸Khutichun, ka kawmah, “Mihing chapa, bang kha vak sawkuok tie,” a ti a. Chun, ka vak suot leh kawtkhak ana um ta maia.

⁹Chun, amah chun ka kawmah, “Lut inla, zie taka gitlohna kihdak-um tak a bawl u hi va entie,” a ti a.

¹⁰Khutichun, ka va luta, ka mu ta a, ngaitie, thilhing chitin, gamsa kihdak-um lim haw, Israel insung mite milimte, ganhing bawkvak tincheng chuh bang a chun a kimvel in ana chuonga dim kêi a.

¹¹Chun, a masang u a chun Israel inkuon upa haw laka pasal sawmsagih te chuh a ding u a, a lailung tak a chun Shaphan chapa, Jaazaniah, chuh a dinga, mitin chun gimlim hâlna a chawi chiet u a; chun, gimlim khu chuh a chiehto nguoh nguoh zieng a.

¹²Khutichun, amah chun ka kawmah, “Mihing chapa, Israel inkuon upa haw’n thim laka a thilhih u chuh na mu? Mitin in a milim indan sunga a hih u chuh? ‘LALPA chun ei mu puoh a, LALPA chun gam chuh a nutsieh ahi ta hi la’, a ti ngâl u a.

¹³A thilhih uh tenum nasa zaw diek dang le hun mu kit in la,” a ti a.

¹⁴Khutichun, LALPA In mâllam panga kawtpi a lutna kawt a chun ei pui a; chun, ngaitie, zie tak achun numeihaw Tammuz ngaia kap in a chuu a.

¹⁵Chun, amah chun ka kawmah, “Aw, mihing chapa, ziehi na mu? Zie sanga hi tenum zaw diek hun mun la,” a ti a.

¹⁶Khutichun, LALPA In huongsung sungnung zaw achun ei puilut a, ngaitie, LALPA In thiengtho kawt a chun, hulliep leh maichâm kikal ah, mi sawmnih leh nga LALPA In thiengtho lam nungngat in, a mai uh suohlam nga’n ana um u a, suohlam a nisa chuh ana ho u a.

¹⁷Khutichun, amah chun ka kawmah, “Aw, mihing chapa, ziehi na mu? Thil tenum a hih uh, zie a a hih u hi Juda inkawte dingin thil maimai ahim? Gam sung chuh kipawngbawlna’n a sudim u a, ei sulungna dingin a hungkit u a, a nak uh theubawk in a huk u a.

¹⁸Zieziekchun, ken le lungna taka sawisa ding ka hi: gawt loh in kawih puo’ng ka ting, a chung u a zahngai lo hiel ding ka hi; ngeih tak in ka bil ah kiko leu le ana ngaitha puo’ng ka,” a ti a.