Read Gangte EZEKIEL 9 Bible Online

EZEKIEL 9 - Gangte bible

EZEKIEL 9

¹Khutichun, ngeih tak a, “Khawpi enkawlte cheng gâlvan kichawih chietin hung nai un,” a tih ka he a.

²Chun, mâllam nga kawtpi chungnung zaw lam apat chun mi gup a hung u a, gâlvan a chawi chiet u a; chun, a lak u a mi khat pat ngat puona kivan chun lehkhatui bûk a chawi a. A chieh lut u a, chun, sumeng maichâm kawm achun a ding tau a.

³Chun, Israel Pathien lopi na chuh a umna Cherub apat chun Pathien In thiengtho lutna chun a chieh to a; chun, LALPA chun patngatpuon a kivan lehkhatui bûk chawipa chuh a vak sama;

⁴Chun, LALPA chun ka kawmah, “Khawpi chuh tawh viel inla, Jerusalem chuh tawh suok in; a sunga thil tenum kihih haw zieka lungkham a kap sek haw chuh a chalpâng u ah tiemteh in,” a ti a.

⁵Chun, adang haw kawm achun ka hetna ngêi ah, “A nunga khun khawpi chu tawh viel unla, khut thau in, muh khelh nei kiu inla lungsiet hiel kiu in.

⁶Teksie haw, tangval haw, nungak haw, naupang haw leh nupi haw chuh that suok kêi unla; ahihziekin, tiemtehna nei haw vang chuh va naih kiu in; ka mun thiengtho a chun pan un,” a ti a. Khutichun, Ho-In maia upa haw a chun a pan tau a.

⁷Chun, amah chun a kawm u ah, “Ho-In chuh subuok unla, a huongsung haw chuh mithi luong in sudim unla, chiehdawk un,” a ti a. Khutichun, a chiehdawk u a, khawpi a chun mi aban thah tau a.

⁸Chun, hiti hi ahi a, khawpi a mi aban thah lai u chun kei ngawncha a nutsieh in ka na uma; chun, ka bawkkhup a, “Aw LALPA Pathien, Jerusalem chunga na lungnatna buntha a Israel umsun cheng hi sumangthai ding na him?” ti’n ka kiko ta a.

⁹Ziephet chun, amah chun ka kawmah, “Israel leh Juda insung mite gitlohna hi alien bekseka ahi; gamsung chuh thisan suohna’n a dima, khawpi sung chuh diklo taka vaihawmna’n a dim ta ahi; ‘LALPA’n gam chuh a nusieh ta a, LALPA’n bangmah a mu dang e!’, a ti ngâl u a.

¹⁰Ken le muh khelh nei puo’ng ka ting ting, lungsiet hiel puo’ng ka ting, a gitloh nau chuh a bûk-abel in khuksak ing ka,” a ti a.

¹¹Chun, ngaitie, patngatpuon a kivan a lehkhatui bûk chawipa khan chanchin a hung gena, “Na thupiek guol khan ka hih zo tai,” a ti a.