Read Gangte DANIEL 1 Bible Online

DANIEL 1 - Gangte bible

DANIEL 1

¹Juda leng Jehoiakim vaihawm kum thumna achun Babulon leng Nebuknezar chuh Jerusalem ah a hung a, khawpi chu a huol ta a.

²Chun, LALPA chun Juda leng Jehoiakim chuh a khut ah a pie ta a. Pathien In a ûmlebel khenkhatte chuh a la a, tichun, amah chun Shinar gama a pathien in achun a tun ta a.

³Chun, leng chun a miliente laka lawiupa pên Ashpenza chuh Israel chate laka mi, leng suon leh mineizo chate lak apat hun teldawk dingin thu a pie a,

⁴amau chuh tanglak demna bei, melhawih tak, chitna tincheng a lemhe, hetna lama pilval, thilbul sutthiem, leng In a tawihdan thiem sinsak dingin,

⁵Chun, leng chun leng an lim tak nichenga leng in a nek sekte leh uain a dâwn sekte mah chuh ziete kawma chu pie dingin le thu a pie a. Zie tawbanga chuh kum thum sung sinsak a hih nung u chuh leh, leng masanga ahung kilat dinguh ahi.

⁶A mi teldawkteu lak achun Juda nam apat Daniel te, Hanania te, Mishael leh Azaria te a tel u a.

⁷Chun, amau chuh leng miliente lawiupa chun a min uh a sa thak chiet a: Daniel chuh Belteshazar, Hanania chuh Shadrak. Mishael chuh Meshak a sa a, Azaria chuh Abednego a sa ta a.

⁸Himahleh, Daniel chun a lunggil in lengpa an leh a uain dâwn sekte a chuh kisukbuok loh a guo chak kêi a; khutia chu a kisukbuok lohna dingin leng miliente lawiupa kawm achun a ngên a.

⁹Tichun, Pathien in Daniel chuh leng miliente deihsakna leh lungsietna chuh a dâwn sak ta a,

¹⁰Chun, mi tilgeh lawiupa chun Daniel kawmah “Na nek ding u leh na dâwn dinguh guotpa ka lalpa chuh ka kihcha a; tanglak na guolpihteu sang chun na mel u hi sie zaw’n hun mu kha leh ei that mai ding ahi,” a ti a.

¹¹Chun, Daniel leh Hanania, Mishael leh Azaria te enkawl dinga a guot leng miliente kawm achun Daniel in,

¹²“Na suokte hi ni sawm sung ei patep inla, nek ding ancheh leh dâwn ding tuisik chauh ei pie dingin ka hun ngên hi.

¹³Chun, zie zawh chu leh ka mel latdan u leh leng an lim ne tanglakte mel latdan chu etkal hi hen la; tichun na muh dân bang tak un na suokte chung ahin hih nan la,” a ti a.

¹⁴Tichun, zie thu chuh lem a sak pih ta a, amau haw chuh ni sawm sung chu a patep ta a.

¹⁵Chun, ni sawm nung chun lengpa an lim ne tanglak chengcheng te sang bawn chun a mel uh a hawih zaw’n, a thau zaw bawn ui tih a kilang a.

¹⁶Tichun, amau haw enkawlpa chun a nek ding u leh a uain dâwn ding u chu a kawihmang a, ancheh-lohing chauh a pie ta a.

¹⁷Tichun zie tanglak lite hi Pathien in thiemna leh chitna chengah hetna leh bilpilna a pie a, zie ban achun Daniel chuh kilâkna leh manghaw hilhchet thiemna a piek behlap a.

¹⁸Chun, leng in amau haw chuh hun puihdawk na dinga a ni guot hun tawpa chun Aspenaz chun amau haw chuh leng Nebuknezar masang achun a hun puilut ta a.

¹⁹Chun, Leng chun amau haw chuh a na hopih a, a laku achun Daniel te, Hanania te, Mishael te, Azaria te tawbang mawngmawng chu a um puou hi. Zieziekchun amau haw chuh leng vaihawmna In achun a ding tau a.

²⁰Chun, leng in thil chenga chitna leh hetthiemna thu tin chengte a vak dawt chun, a gamsung pumpi a mitvaidawi thiem leh phunsân-thiemte cheng sang chun a zie mi lite hi a leh sawm in a thiem zawu hi tih a mudawk ta a.

²¹Tichun, Daniel chuh leng vaihawmna In achun leng Kura lal kum khatna tieng chun a sem zawm zel ta a.