Read Gangte DANIEL 11 Bible Online

DANIEL 11 - Gangte bible

DANIEL 11

¹Chun, kei chuh Media mi Daria lal kum khatna a chun amah sudet ding leh suhat dingin ka uma.

²Chun, tuhin thudik chuh hun etsak ing ka. Ngaitie, Persia gam achun leng thum hung ding dawk nalai un tin, a lina chuh a dang cheng sang khan hausa zaw mah mah in tin, a hauhsakna zieka a hung hât tieng chu leh, Grik lalgam do dingin mi cheng cheng chawktho ina.

³Zie tieng chu leh leng hangsan tak hung pawt kit intin, lalgam lien tak chunga vaihawm intin, a thu thu’n thilhih in a.

⁴Himahlele a hatna tâwp achun a lalgam chuh khenzak in um intin, mun li a khen zak in um in a. Amah muna chun a mah suonte hilo in, leng dangin vai hun hawm untin, himahleh a thilhih theihna tawbang chu nei puo’n au.

⁵“Tichun, simlam leng chuh hung hât intin, a sepaih liente laka khat vang chuh amah sangin hatzaw’n tin, lalgam lienzaw ah vaihawm in a.

⁶Chun, kumte chuh a tâwp nung leh Aigupta leng chun Suria lengte tawh kizawpna siem untin, a chanute chuh a zi dingun neih sak in a. Himahleh a kizawpnau chun sawt daih puo’n tin, amahnu ngêi leh a pasal tawh, a chateu leh a suokteu, amah tawh kitawn khawm cheng chuh thah in um vek un au.

⁷Mahleh, a zung apat a hung sel apat chuh mi khat amah mun ah ding intin, zie chuh sepaih hawn tawh hung un tin, mâllam lengpa kulh achun lut intin, amau do in tin, zo ina.

⁸Tichun, a pathien milimteu leh a dangkaguoteu leh sanate, a pathien kawm u a a piekteu chu tawh Aigupta gam ah pawmang vek un tin, tichun, kum bang zah ahim sung chuh mâllam leng apat chun châwl tadih ina.

⁹Chun, simlam lalgam achun mâllam lengpa chuh hunglut intin; mahleh amah gam ah nawhkit ina.

¹⁰“Himahleh, a chapate chuh kido dingin nasa takin hung kiguo thak kit untin, sepaihhawn tampi sam khawm un au. A lak u a khat chun tui kinawk guolin a melmateu kulh chuh nawh in a.

¹¹Tichun, simlam leng chuh lungna mah mah intin, amah do ding chun kipandawk intin, tichun a sepaihteu tamtak va man un au.

¹²A gâlhât na ziek leh sepaih tamtak a thahna ziek chun kisuong mah mah intin, himahleh guolzawhna chuh chang den puo’n a.

¹³“Chun, mâllam leng chuh vaikit intin, a masa sanga tamzaw sepaih pui khawm in a. A hun lemchâng tak achun sepaih tamzaw leh matchâk phazaw tawh hung kuon kit in a. Chun, hun tâwp, kum tâwp ngêi achun sepaihhawn nasa tak leh van tampi tawh hun zuon ina.

¹⁴Chun, ziehaw nung chu leh mi tamtak Aigupta leng do dingin hung pawtdawk untin: na namte laka mi pawngbawlte chu le kilâkna sukbukimna dingin hung kipan untin, himahleh, guollah un au.

¹⁵Khutichun mâllam leng chun khawpi kulh neite chu hun do intin la vek in a. Aigupta sepaihte chun do zawm ta puou un tin, a lak u a hatpente chun le do zo diek puo’n au.

¹⁶Himahleh, a hun do pa chun a nawp nawp un bawl untin, a masang ah kuomah ding zo puo’n a. Chun, amah chuh gamtiemna gam achun ding intin, a bawnin a thuneihna nuoi ah kawih vek in a.

¹⁷“Tichun, a sepaihhawn cheng tawh hung intin; a melmate lalgam a suksiet theihna dingin kizawpmatna thu siem intin, a chanu te chuh a zi dingun neih sak intin, himahleh lawhting diek puo’n a.

¹⁸Zie nung chu leh tuipi panga namte do intin, a lak u a tamtak chuh zo in a. Himahleh amah chuh gamdang mite lawiupa khatin zo intin. chapo taka a umna chuh suktawp sak in a. A chapona chuh a chung ngêi ah kilehkit ina.

¹⁹Leng chuh amah gama a kulhpi achun kilehkit intin, himahleh, kipal kha’n kipuk in tin, tichun, muh kit hita puo’n a.

²⁰“Tichun amah mun achun mi dang khat hung lal kit intin, amah chun a lalgam hauhsakna sukpunna dinga leiman, mipite kawma pawngbawl a lakhawm dingin a miliente sawl in a. Himahleh, hun sawt lo sungin mipi mitmuh ahim, gâl kidona le hi diek lo in sukmangthai in um in a,” ti’n.

²¹Chun, amah mun achun gam muhsit um tak, gam limbawlna a piek loh chu hung dingdawk in tin, paukam thiem in lalgam chuh chang ina.

²²Chun, a masang a sepaihhawn chu tawhmang in um untin, kek nêl un tin, ahi, thuthun lawiupa chan in.

²³Kichamna siem in, nam dangte thêm intin, tichun nam neucha chunga vaihawm himahleh hung hât deuh deuh in a,

²⁴Hilh masa se lo in gam hausa gamte chu do intin; a pate leh a pute thil hihkhaklohte chuh hih in a. A mite lak achun gâllâk leh gâllâk thuomphuo te chuh hawmzak in a. Ahi kulh detdote do ding leh suksietna ding chuh ngaihtuoh intin, himahleh a hun chuh hung bei pai in a.

²⁵“Hangsan takin sepaihhawn nasa tak dindawk intin, amah lehnawh kit dinga sepaih nasa tak leh thilhih thei tak a na guonggalh, Aigupta leng chuh hun do in a. Himahleh Aigupta leng chuh thep in um intin, lawhting puo’n a.

²⁶Amah panpih, a kinaihpih diekte ngêi chun amah susie’nau. A sepaihte tamtak chuh thah in um untin, a sepaihte chuh sukmangthai zawh vekin um un au.

²⁷Leng nih te chuh an ne dingin dawhkân khat ah chu khawm untin, himahleh a sunggil tak u a chuh migilo a hih gel ziekun kithem tuoh un au. A hun a tun nai loh ziekin a thil deihteu chuh mu diek puo’n au.

²⁸Tichun, Asuria leng chuh thuomphuo tampi tawh amah gam lam achun vaikit intin, a lunggil chun Pathien mite sakhuo dodal intin, a nawpdan dân in hih intin, amah gam ngêi ah vaikit in a.

²⁹“Zie nung chu leh Aigupta hun do kit intin, himahleh zietum hin thil chuh zatchuom takin um in a.

³⁰Kittim mite chuh amah do dingin kuong in hung untin, hung dodal untin, lau mah mah in a. “Tichun lungna takin vaikit intin, Thuthun Thiengtho chuh sukmangthai vek guon a. Zie sakhuo petmangsante thuhilhna chuh zawp in tin,

³¹chun, a sepaihte laka khenkhatte chun Ho-In chuh subuok un au. Ni chenga kithawihnate chuh sutawp untin, zie tak achun Thil tenum, Luoksuok-um tak chuh dindawk sak un au.

³²A thuthun uh haihsante chuh leng in amah lama pang dingin kamthiem in zawl intin, himahleh Pathien thu zawpte vang chun amah chu do un au,

³³Lawiupate laka miching te chun mi tamtak hetthiem sak untin, himahleh, hun chawmkhat sung chuh a lak u a khenkhatte chuh kidonaa thah ahim, meia hâllup ahim in um untin, khenkhatte chuh suoma um in, suongkul a khum in um in au.

³⁴Kithahna a um zel lai chun Pathien mite chun panpihna neukhat muu untin, zie tawbang utchakna ziek chun mi tampi’n kamthiem thu mai in amau haw chuh hun zawm un au.

³⁵Ziete haw laka lawiupa ching khenkhatte chuh thah in um untin, ziehaw ziek chun mipite chuh sukthientho in um un au. Khutibang thil chuh Pathien in ahun tiem a tun masang cheng chuh hih zawm zel un au.

³⁶“Chun, leng chun a nawp nawpin thil hih intin, amah kichawisang intin, pathien dangte sanga lienzaw leh, pathiente Pathien sanga lienzaw’n hung kikawih in a. Zie tawbang thil chu Pathien in a gawtna hun a tun macheng chu hih thei in a. Pathien in a thil guonggalh lawksa chu hun hih ngêi ding ahi ngâl a.

³⁷Leng chun a suonte pathien chuh khawksak puo’n tin, numeite deih zawng haw pathien himhim khawksak nei puo’n a, pathien dang himhim khawksa puo’n tin, amah chuh mi cheng cheng sanga lienzaw a a kingaih ziekin.

³⁸Ziehaw cheng, sang chun kulh pathien chuh limbawl intin. Tichun, a suonte’n a na ho khâk ngei loh uh pathien kawm achun sanate, dangkaguote, suongmantamte, leh thilpiek pha tampi chuh pie zaw’n a.

³⁹Chun, a kulhte vengbit ding chun gamdang mite pathien ho haw chuh kawih intin; amah vaihawmtu lienpen a kawihte chuh limbawlna sang tak pien tin, dinmun pawimawhte a chut sak in, kipahman in a gamte chuh pien a.

⁴⁰“Chun, simlam leng tawpna ding hun chuh a hungtun ding kuon cha leh, Aigupta leng chun hun do intin, Suria leng chun a thilhih theihna cheng tawh, kangtalaite, sakawlte, leh kuong tampi tawh chinpei bang mai in amah chuh ana do kit un tin, gam haw chuh lut un tin, buluh zo untin, hawh pai ina.

⁴¹Gamtiem gam ngêi chule hun do intin, sangsawm tamtak that intin, himahleh Edom leh Moab leh Ammon gam nutsieh a umte chuh suokcha’nau.

⁴²Zie gam haw chuh a hun do phat leh Aigupta chule suokcha diek puo’n a.

⁴³Himahleh, Aigupta go selguk te, sana leh dangkaguo leh thil mantam dang tampi lamang in a. Libia mite leh Ethiopia mite chun amah nung zui un au.

⁴⁴Himahleh, saklam leh mâllam apat a chanchin hungtung chun sulau intin, lungna takin do intin, mipi tamtak chuh that in a.

⁴⁵Chun, tuipi leh tâng thiengtho kikal, temple dinna mun achun a leng puon-In lien tak chuh zak in tin, himahleh, a tawpna tung hi’n tin, kuoma’n kithuohpih puo’n au.”