Read Gangte DANIEL 2 Bible Online

DANIEL 2 - Gangte bible

DANIEL 2

¹Chun, Nebuknezar chun leng ahih kum nihna achun mang a nei a. Zie chun a lunggil a subuoi a, a ipmu thei ta puoh a.

²Tichun, lengpa chun mitvaidawi thiemte, phunsân thiemte; dawithiemte Kaldai mite a mang chuh amah hilh dinga sap ding thu a pie a. Tichun a hung khawm u a, leng masang achun a hung ding tau a.

³Chun, leng chun a kawm u ah, “Mang ka nei a, ka mang chuh he dingin ka lungthim a buoi tai,” a ti a.

⁴Amau haw chun Aramaic pau in leng kawm achun, “Aw lengpa, kumlekhuo’n dam in: na mang chuh na suokte hi ei hilh inla, tichun a umzie chuh hun hilhchien ing kau,” a tiu a.

⁵Leng chun a kawm u ah, “Ka mang leh a hilhchetna chuh nei hilh dinguh ka tihsa him ahi. Nei hilhchet theih loh u chun na taksateu sat nel vek ing ka ting, na inteu le susie vek ding ka hi.

⁶Mang leh a umzie chuh nei hilhchet theih u chun ka kawm apat kipahman leh limbawlna lopi tak mun lau: zieziekchun mang leh a umzie chuh ei hilh un,” a ti a.

⁷Amau haw chun leng chuh a dâwng kit u a, “Leng chun mang chuh na suokte hi ei hilh inla, a umzie chuh hun hilh ing kau,” a tiu a.

⁸Leng chun a dâwng a, “Hun mawk sukmang maimai ding na hiu hi tih chientakin ka hêi

⁹Ka kawm apat in thu chuh a pawt tai tih na heu hi, mang um zie chuh nei hilhchet theih loh u chun nang u a dingin dân khat mai a um hi; lepchieh gen kuol a ka ma a gen ding zuou thu leh thu mantheihlo na guonggalh uh ahi hi: khutichun, mang chuh ei hilh un, chun, a um zie le nei etsak thei ui tih he ding ka hi,” a ti a.

¹⁰Kaldai mite chun a dâwng u a, “Leng thil nget chu etsak thei ding lei chunga hih khatchale a um puou hi: lengte leh vaihawmte kuomah zie tawbang thil hi mitvaidawi thiemte ahim, phunsân thiemte ahim, dawithiemte ahim a dawng kha ngei puoh ngâl u a.

¹¹Lengpa thil dawtte hi thil haksa tak ahi a, phehlevo neilo pathiente tihloh chun leng etsak thei ding kuomah a um puoi,” a tiu a.

¹²Ziephet chun leng chuh a lungna mah mah ta a; Babulon mipil chengcheng chuh sukmangthai vek ding thu a pie ta a.

¹³Khutichun thupiek chuh a suohdawk ta a, mipilte chuh suklup ding ahi tau a, tichun Daniel leh a guolte chule thah khawm ding ahi tau hi.

¹⁴Chun, Daniel in Babulon miching te that dinga chiehdawk Ariok, leng mi vengte lawiupa chuh lemhe tak leh ching takin a dâwng a,

¹⁵Lengpa veng lawiupa kawm achun, “Bang zieka leng thupiek chuh khuti lâwm lâwma chuh khauh ahim?” ti’n a dawng a. Chun, Ariok chun Daniel chuh thil umdan chuh a hilh ta a.

¹⁶Ziephet chun Daniel chuh a lut a, leng chuh a hilhchetna a etsak theihna dinga hun guot sak dingin a ngên ta a.

¹⁷Tichun Daniel chuh a In ah a chieh ta a, zie thil chuh a guolte Hanania te, Mishael te, Azaria te chuh a hilh ta a:

¹⁸Babulon miching dangte laka Daniel leh a lawite chuh thah khawm a hih lohna ding u a van Pathien kawma lungsietna leh mang umzie hilhchet theihna pie dinga ngên dingin a hilh ta a.

¹⁹Chun, zie thuguk chuh zan kilâkna ah Daniel kawmah suklat in a hung um ta a. Tichun Daniel chun Van Pathien chuh a pakcha ta a:

²⁰Daniel chun, “Pathien min chuh kumsawt kumsawt in pahchak in um hen: Chitna leh thilhih theihna amah a ahi ngâl a.

²¹Hunte leh hunbite a hih lamdang a; lengte a chawnmanga, lengte a tungding a: Miching kawmah chitna leh hetthiemna a pie a.

²²Thil thuk leh thil kiselte a sulang a; thima umte le a he a, amah chuh vak chun a ûmkimvel ahi.

²³Aw, ei suonte Pathien, ka hun pakcha a, ka hun limbawl ahi. Nangin chitna leh hetna nei pie ta ngâl a; Nangin ka pauchamna teu na dâwng a, tichun, leng kawma ka etsak ding u chuh nei hilh ta a,” ti’n.

²⁴Khutichun Daniel chuh Babulon miching te sumangthai dinga leng in a guot Ariok kawm achun a chieh a, a kawmah, “Babulon miching te chuh that ki’n: leng masanga chun ei pui inla, leng kawma chun a hilhchetna etsak ing ka,” a ti a.

²⁵Ziephet chun Ariok chun Daniel chuh kin takin leng masanga chun a pui a, a kawmah, “Juda saltângte lak ah leng kawma a hilhchetna hun etsak ding mi khat ka mu tai,” a ti a

²⁶Leng chun Daniel (Belteshazar le kiti) kawm achun, “Ka mang leh a hilhchetna chuh nei etsak thei die?” a ti a.

²⁷Daniel chun leng chuh a dâwng a, a kawmah, “Thil kisel, leng in het a nawp chuh miching te, phunsân-thiemte, mitvaidawi thiemte, aksi lam chanchin hete chun leng kawmah a etsak thei puoh ngâl u a:

²⁸Mahleh thil kiselte phuong theipa Pathien chuh van ah a um a, leng Nebuknezar hi tunung a thil hung um dingte a hetsak ahi hi. Na mang leh na kuol laia na muh kilâknate chuh ziehaw hi ahi:

²⁹“Aw lengpa, nang chun na zalkhun a na kuol lai in tunung a thil hung um ding te chuh na ngaihtuoh a, thil kiselte phuong sek pa chun tunung a thil hung um dingte a hun hetsak ahi.

³⁰Tuhin kei hin mi dangte sanga chitna ka neih zieka zie thil kisel hi ka kawma phuon ahi puoh a, leng kawma a hilhchetna hetsak dingin ahi zawi; na lungthima na ngaihtuohte chuh na het theihna dingin.

³¹“Aw lengpa, ngaitie, milim lopi tak na mu a, milim nasa tak leh vak sengsung chuh na masangah a ding a; a latdan chule tizat-um tak ahi.

³²Zie milim chuh a luchang sana thieng tak ahi a, a âwm leh a bante chuh dangkaguo ahi a, a gil leh a malpi te chu sumeng ahi a;

³³a kênghaw chuh thik, a kêngpêk chuh a kimkhat thik, a kimkhat chuh bellei ahi a.

³⁴Chun, na et zing lai chun, kuomah sukkhak loh a suong hung kilik khat hin zie milim, a kêngpêk thik leh bellei chuh a vak delh a, a delh ngiem dimdem ta a.

³⁵Tichun, thikte, bellei te, sumeng te, dangkaguote leh sanate chuh a bawnin a gawp dimdem ta a, nipi laia phuol a buhsi kithit bang mai in a um ta a. Huih in ziehaw chuh a tawkmang ta a, a umnau mun himhim het ahi ta puoi. Himahleh suong, milim delh khum pên chuh tâng lienpi a hung suok a, tichun lei pumpi hi a dim ta a.

³⁶“Ziehi na mang chuh ahi: a umzie chuh leng masanga hin hun gen ing ka.

³⁷Aw lengpa, nang hi lengte leng, van Pathien in lalgam te, thilhih theihnate, hatnate, lopinate a piek chuh na hi a.

³⁸Zieziekchun, khawia le mihing chate umna taphawt ah gamsate, chung leng vachate, na khut ah a pie a, a bawn u a chunga vaihawm dingin a hun siem a. Sana luchang chuh nangmah ngêi hi na hi.

³⁹Chun, na nunga hin nang sanga lalgam neu zaw hung dingdawk intin, tichun sumeng, lalgam thumna, lei chung pumpi a vaihawm ding chu hung um kit ina.

⁴⁰Chuleh, lalgam lina chuh thik banga khauh hi’n tin: thik chun a sukgawp a, thil chengcheng a sukgawp bang mah hin amah chun sugawp in gawi nêl ina.

⁴¹Chun, a kêngpêk leh a kengzungte chuh a kimkhat bellei, a kimkhat thik na muh bang ngêi khan lalgam chuh kikhen intin, himahleh amah achun thik khauhna chu um tho ina, thik leh bellei kihel na muh bang ngêi khan.

⁴²Chun, a kengzung a kimkhat thik, a kimkhat tung a hih mah bang khan gam chuh a kimkhat hât intin, a kimkhat chuh sie vak tak hi’n a.

⁴³Chun, thik leh tung nem kihel na muh bang ngêi khan amau haw chuh mihing chichuom chuom kihel hiu untin; himahleh thik leh tung a kihel taktak theih loh bangin kizawm det taktak thei puo’n au.

⁴⁴Chun, zie lengte nihaw achun lalgam hun tungdawk in tin, zie chuh sie ngei ta puo’n tin, a lalna le midang a ding a nutsieh hi puo’n a. Zie lalgam chengcheng hi hihgawp in, hih mang zaw’n tin, kumkhuo’n ding zing ina.

⁴⁵Tang apat a suong, kuomah khawih loh a kilik in, thikte, sum-engte, tungte, dangkaguote leh sana te a sukgawp na muh bang mah khan; Pathien lopi tak chun leng kawma hin tunung a thil hung um dingte a phuon ahi: na mang chuh a tak ngêi ahi a, a hilhchetna chu le a dik ngêi ahi,” a ti a.

⁴⁶Ziephet chun leng Nebuknezar chuh a khupbawk a, Daniel chuh chibai a bûk a, a kawma chu thillat leh gimlimte hun pie dingin thu a pie ta a.

⁴⁷Leng in Daniel chuh a dâwng a a kawmah, “Zie thil kisel na phuondawk theih ziek hin na Pathien u chuh pathiente Pathien, latte lal, thil kiselte phuongdawkpa chuh a na hi ngêi hi,” a ti a.

⁴⁸Tichun leng chun Daniel chuh limbawlna sang tak a pie a, thilpiek lopi tamtak le a pie a; Babulon gam pumpi a vaihawm ding leh, Babulon miching te chengcheng chunga lawiupa hi dingin a siem ta a.

⁴⁹Chun, Daniel in a nget bangin leng chun Shadrak, Meshak leh Abednego te chuh Babulon gamsung a lawiupa dingin a kawih ta a, Daniel chu vang leng vaihawmna In achun a um zing zaw ta a.