Read Gangte DANIEL 7 Bible Online

DANIEL 7 - Gangte bible

DANIEL 7

¹Babulon leng Belshazar vaihawm kum khatna achun mang ka nei a, zan chun kilâkna ka mu a. Mang chuh ka zik tha a,

²zan a ka thil muh te chuh zie hi ahi: Kâwlmawng li apat in huih hât tak hi tuipi chungah a hung nung a.

³Chun, tuipi apat chun gamsa lien tak tak li, kibang lo tak tak hi a hung pawt u a.

⁴A khatna chuh sakeibaknei tawbang ahi a, mupi tha tawbang hi a nei a; a tha haw chuh bawhtawt a a um a, lei apat a dawpkang ahih a; mihing banga keng nih a ding dinga siem ahi a, mihing lunggil piek ahih chanin ka en zinga.

⁵Chun, ngaitie, sahang nihna chuh savawm tawbang ahi a, a keng nung lam in a ding a; a kama chun nakguh thum a uma, a pet changa, a kawm achun, “Tho dawk inla, sa chuh na nawp chin in neh,” kitihna aw hi ka za a.

⁶Zie nung chun ka en a, ngaitie, sahang dang khat, keite tawbang, a nungzang a vacha tha li nei hi a hung kilang a. Zie chun luchang li a nei a, a kawm achun vaihawmna piek ahi a.

⁷Khutia ka et zing lai chun, sahang lina, lauh-um leh tizat-um tak leh hât tak mai chuh ka mu a; thik ha lopi tak a nei a, zie chun a sa matte chuh bawttel in a ne zo a, a them haw chuh a keng in a tawhden ta a. A masanga gamsa dangte kha tawh kibanglo takin, ki sawm a nei a.

⁸A kite chuh ka et lai in, a lak apat chun ki dang khat, neucha hi a hung dawk a; a masa thum te chuh abul chin taka bawhthâk in a um a. Zie ki chun mihing mit tawbang a nei a, kam le a nei a, chapo takin thu a gen ta a.

⁹Zie chuh ka et zing lai chun, lalchutphah hi a hung kidawh a. Kumlekhuo a hing zing mi khat hi lalchutphah laka khat achun a hung chu a. A silhlechente chuh vuk guolin a vam a, a sam chuh samul thieng tak bang ahi a. Mei kangtalai chunga a lalchutphah achun mei a ko dawk zawt zawt a,

¹⁰Zie tak apat chun luicha tawbang in mei a luong dawk zungzung ta a. Mipi sang tam takin a na a sep sak u a, a masang achun a singa sing tamtak a ding u a; vaihawmna a hung kipan ta a, lehkhabute chuh phetin a um ta a.

¹¹Zie lai chun ki neucha chun thu nasa taka a gen thawm ziek chun, ka vak en a, sa chuh thah in a um ta a; a sapum suksiet a meia hâl dinga piek ahih chanin ka en zinga.

¹²Himahleh, gamsa dangte kha chuh a thilhih theihnau lâksak in a um u a, a hinnau vang chuh hunbi khat leh hun khat sunga dingin hawih ahi.

¹³Zan a kilâkna hung um achun, mi khat, mihing mel tawbang pu hi ka mu a. Meipi ûmkimvel in, kei lam hun zuonin ka mu a, himahleh amah chuh kumlekhuo a hing zing pa lam achun a chieh a, a kawmah a va um ta a.

¹⁴A kawm achun thuneihnate, lopinate, leh leng thilhih theihnate chuh piek ahi a, mitin te, namtin te, leh pautin te chun a na sep sak un au. A thuneihna chuh kumlekhuo’n um in tin, bei ngei talo ding ahi a, lalgam chun tawp ni neita puo’n a.

¹⁵Kei Daniel hi ka sung ahin ka lungthim a lungkham a, Kilâkna ka muh te chun ei sulau a, nasa takin ei chawkbuoi ta a.

¹⁶Zie a hung dingdawkte laka khat chuh ka va naih a, ziehaw chungchanga thutak chuh ka dawng a. Khutichun, ei hilh a, a thil genchetna haw chule ei hetsak ta a.

¹⁷Ka kawmah, “Zie gamsa lien taktak lite hi, lalgam li, lei chunga hung dingdawk dingte chuh ahiu ui.

¹⁸Himahleh, Chungnung pên pa mithiengtho te chun lalgam chuh chang untin, kumsawt kumsawt in chang den ta’n au,” ti’n.

¹⁹Chun, gamsa lina, a dangte laka zatchuom diek, kihchak-um tak, a kengtin sumeng leh a ha thik manga a sapehte bawttel a, a themte a kêngpêk nuoia tawhden chungchâng chuh het ka nuom ta a.

²⁰Chuleh, a luchang a ki sawm nei leh, a nunga a dang hung pawt a, a masanga a dangte puk ta chungchâng chuh le het ka nuom a. Zie chun mit leh kam a nei a, chapo takin a kisuong a. A dangte sang chun tizat-um diek ahi.

²¹Chun, ka et zing lai chun zie ki chun mi thiengthote a do a, a zo ta a.

²²Ziephet chun, kumlekhuo a hing zing pa chuh a hung a, vaihawmna chuh Chungnung pên pa mi thiengthote kawma piek a hih thu leh, Pathien mite chun lalgam thuneihna a chan hun uh a hungtunna thu chuh a phuong ta a.

²³A hilhchetna ei piek chuh ziehi ahi: “Gamsa lina chuh lalgam li, lei chunga hung dingdawk ding chuh ahi a, a dangte sang chun zatchuom diek in a. Lei pumpi chuh sugawp intin, tawhden in a.

²⁴Chuleh, ki sawmte chuh leng sawm, zie gam vaihawm dingte chuh ahiu ui; zie zawh chu leh leng dang hung dingdawk kit intin; a masate sang khan zatchuom diek kit intin, leng thum te chuh hun paih tha ding ahi.

²⁵Chun, Chungnung pên pa kalh in thu gen intin, mi thiengthote chuh sugimthei in a, hunte leh dân chuh sukdanglam guo’n tin, hun khat leh hunte leh hun kimkhat sung chuh a khut u a piek hi’n a.

²⁶Himahleh, vaihawmna hung um intin, a thuneihna chuh sukmang a suksiet den dingin lâkmang in um ina.

²⁷Tichun, lei chunga lalgam chengcheng thuneihna leh lopina chuh, Chungnung pên pa Pathien mite kawma chuh piek hi ta’n a. A lalgam chuh tâwp ta puo’n tin, lei chunga vaihawmte chengcheng in a nau sep sak un tin, a thuu zawp ta’n au.” ti’n.

²⁸Ziehi ka thilmuh chanchin tawpna chuh ahi. Kei, Daniel hi ka thilmuhte chun ei sulau mah mah a, ka mel a dângtha ta a, himahleh, ka lungthim in thu chuh ka vawp zing hi.