Read Gangte DANIEL 8 Bible Online

DANIEL 8 - Gangte bible

DANIEL 8

¹Leng Belshazar vaihawm kum thumna achun ka kawmah, kei Daniel kawm ngêi ahin kilâkna ahung kilang a, a masa a kawma ahung kilat nung in.

²Zie kilâkna achun, Elam gamsung a Susan leng In ah ka na um a, kilâkna achun ka mu a, banga ki-um sunga chun ka na um a. Ulai luipi pang ah ka na ding a,

³Tichun, ka mit ka thawlh to a, ka vak en a, ngaitie, luipi panga chun belamchal, ki nih nei hi ana dinga; chun, ki nih te chuh a sang gêl gêl u a, mahleh, khat chuh khat sang chun a sang zaw a, a sang zaw chuh a hung um dawk nunung zaw a.

⁴Belam chal chun a ki a tumlam leh mâllam leh simlam nawh in ka mu a, a masang achun gamsa mawngmawng ding thei a um puou hi. A thilhih theihna apat a hukdawk thei le a um diek puou a; a nawpdan dân in a tawi a; a chapo mah mah a.

⁵Zie chuh ka ngaihtuoh zing lai chun, ngaitie, tumlam a kipatin lei pumpi chung dâp suok hielin kêlchal hi a hung pawt a, a kenga leituol sukha lo khawpa hât chun a tawi a. Kel chun a mit kikala hin ki challang tak a nei a.

⁶Tichun, belamchal ki nih nei, lui panga um kha a hun zuon phei a, a theihtawp in a bawh ta a.

⁷Chun, Belam chal a vak sit chuh ka mu a. A lungna ta mah mah a, a ki nih te chuh a sukbawt sak ta a. Amah dal zo ding chun belam chun hatna a nei puoh a. Tichun, leituol ah a talhpai a, a chilgawp a, kuomah amah hukdawk thei ding a um puoi.

⁸Ziephet chun, kêlchal chuh a chapo deuh deuh ta a, himahleh a tâwp chun a ki lopi tak chu a hung bawng ta a. A ki bawtna achun ki challang tak li a hung kekdawk a, lei ning li kawk in a hung um dawk a.

⁹Chun, a ki lite laka khat achun, ki neucha khat hi a hung dâwn dawk a, zie ki thilhih theihna chuh simlam leh suohlam leh gamtiem lam zuon chun a hung khang lien ta a.

¹⁰Tichun, van a sepaihte do thei ding khawp hiel chun a hung hât ta a, tichun aksite ngêi leh a laka khenkhatte chuh lei ah a paih tha a, a tawhden ta a.

¹¹A hi, zie a van a lawiupa um te tuk hiel chun a kikawihsang a, a kawma ni chenga kithawihna latte chuh a suktawp sak a. Ho-In chuh minsie takin a bawl ta a.

¹²Chun, zie tak achun mipite chun ni chenga kithawihna lat sang chun, gitlohnate a hih zaw tau a; chun, thutak chuh lei ah a paih tha a. Zie ki chun a thilhihte achun a lawhting to zel ta a.

¹³Ziephet chun, mi thiengtho te aw chuh ka za a, chun mi thiengtho dang kuo ahim in thu hun gen pa kawm achun, “Hâlmang thilpiek um zing sek te, bawhsietna suksiet a um mun thiengtho leh sepaih hawnte chuh tawhden dinga piek a hihna teu chungthu a kilâkna chuh bang chana sawt ahi die?” a ti a.

¹⁴Vânsâwlchâk dangin a dawnna chuh ka vak za kit a, “Ni sangnih leh za thum sung sutzawp hi’n tin, zie hun sung chun zingkal leh nitâk in kithawihna lat hi puo’n a. Zie zawh chuleh mun thiengtho chuh sukthien hi ta’n a,” a ti a.

¹⁵Chun, hiti hi ahi a, kei Daniel ngêi in kilâkna chuh ka muh in, a umzie het ka guo a, ngaitie, ka masang ah mihing tawbanga kilang hi a hung dinga.

¹⁶Ziephet chun, Ulai luipi chunga hin, mihing aw khat hin, “Gabriel, kilâkna umzie chuh a kawmah genchet sak in,” ti a vak gen hi ka za a.

¹⁷Ziephet chun Gabriel chuh a hung a, ka sik ah a ding a, ka lau mah mah ta a, lei tuol ah ka puktha ta a. Amah chun ka kawmah, “Aw mihing chapa, a umzie chuh hethiem in, Kilâkna chuh tawpna hun a ding ahi ngâla,” a ti a.

¹⁸Chun, ei hopih lai chun tuol a bawkkhup in khawhelo in ka na um a, mahleh, ei hun khawih a, ei dinsak a.

¹⁹Himahleh, “Ngaiin, tunung a Pathien lungnatna hungtung ding chuh hun etsak ding ka hi. Kilâkna chun hun tawpa thil ding a gen ngâl a.

²⁰“Belam chal, ki nih nei na muh kha Media leh Persia lalgam etsakna ahi a.

²¹Kelchal khan Grik lalgam a etsak a, a mit kikala ki lopi tak na muh kha leng masapen ahi.

²²Chun, zie a ki masa bawtna muna ki li hung dâwn dawkte khan lalgam li a etsak a, ziehaw lak achun namte chuh kithehdalh untin, lalgam masa bang tak khan hatlo ding ahiu.

²³“Chun, a lalnau hun nunung lama bawhsie mite, a sanna tawp pên uh a tun tieng u leh, leng mel lauh-um tak pu, thu het haksate hethiem mi hung pawt intin,

²⁴Chun, a thilhih theihna nasa mah mah intin, sietna lauh-um takte hih intin; a thilhihte achun lawhting zel in a. Mi thilhih thei takte chung achun sietna hun tun intin, mi thiengthote chung ngeia le hun tun in a.

²⁵A chitgukhahna ziek chun, a mi thepna lam achun lawhting zel in a. A lungthim chun amah leh amah kingaisang intin, hetsak masakna um lo in mi tampi sumangthai in a. Lengte leng kilanpih intin, himahleh khut hilo a sukbawt in um ina.

²⁶Tichun, kilâkna thu na kawma kigen zosa, nitâk lam leh zingkal lama kithawihna haw kha hung dik vek ta’n a. Himahlele kilâkna thu haw chu îm chakkêi ah, ni tamtak nunga hungtung kim ding a hi ngâl a,” a ti a.

²⁷Tichun, ka chau a, ni bang zah ahim chu ka dam puoh a. Zie apat chun ka hung halhdawk kit a, leng na chuh ka sem kit ta a; himahlele, kilâknate chuh mak ka sa mah mah zieng a, mahleh, kuoma’n a hethiem puou hi.