Read Gangte HOSEA 11 Bible Online

HOSEA 11 - Gangte bible

HOSEA 11

¹LALPA chun, “Israel chuh a naupan lai apat in ka lungsiet a, Aigupta gam apat ka chapa dinga ka sap dawk ahi.

²Himahleh, ka hah sap phawt leh, kei apat in a taimang gamla zaw deuh a. Baal kawmah a kithawi u a, milim siemkawmte kawmah gimlimte a hâl u a.

³Ephraim chuh ka bân a dawm in chieh ka sinsak a; Himahleh, amau haw enkawl ka hi tih a he puou hi.

⁴Mihing khauhuol, lungsietna khaugui haw chun amau ka kai a. Dawm sangin, ka bieng tawh ka sutuoh a; a masang u a kun in nek ding ka pie a.

⁵“Himahleh, a kihei kit nawp loh ziekun, Aigupta lam ah vaikit untin; Asuria te chun a chung u ah vaihawm un au.

⁶A khawpiteu achun kidona um intin, khawpi hawih takte chuh suksiet in um in a. Amau haw ngaih a dika a hetteu chauh chuh a hih ziekun ka mipite chuh sukmangthai in um un au.

⁷Ka mite chun ei kihei mangsan guo zing u a. A chung u a namkawl kibat ziek chun Chungnung pên pa chuh sam untin, mahleh kuoma’n lakthak sak puo’n a.

⁸“Aw Ephraim, bangti’n ahim ka hun paih thak theih ding? Aw Israel, bangti’n ahim ka hun taihsan theih ding? Admah ka sukmangthai bang khan na chungah bangti’n a ka hih ding? Zeboiim bangin ka hun bawl thei dinga ahim? Ka sung ah ka lunggil a kilek a, ka lungsietnate chuh a kimut âm zaw ta a.

⁹Ka lungnatna nasa tak chuh muolsuoh puo’ng ka ting; Ephraim chuh sukmangthai dingin dawi kit ta puo’ng ka. Kei chuh mihing hilo in, Pathien ka hi ngâl a. Kei, Mi thiengtho hi na kawmah ka um a, Lungna takin na kawmah hung ta puo’ng ka.

¹⁰“LALPA chuh zui un tin, sakeibaknei banga ngîk ding chuh: ahi, hun ngîk ngêi intin, chun, tumlam apat in a chate chuh hung tai duom duom un au.

¹¹Aigupta apat in vacha bangin kin takin hungtung untin, Asuria apat in vakhu bangin tha zap gi sieu sieu in hung un au. ‘A In lam uh a puikit ding ka hi’ tin Kei, LALPA hin ka gen ta ngâl a.” ti’n.

¹²LALPA chun, “Israel chate chuh lepchieh leh thepna’n a ûmkimvel a; Juda mipite chuh Kei, Pathien ginum leh thiengtho do in a kiphin zing uh ahi.