Read Gangte HOSEA 14 Bible Online

HOSEA 14 - Gangte bible

HOSEA 14

¹Aw Israel, LALPA na Pathien uh lam ah hung vaikit un! Na manlohna ziekin na kisui a, na puk ta ngâla.

²LALPA kawm lam achun vaikit unla, ziehi pauchamna na lat ding dân u chuh hi hen: “Ka gitlohnateu cheng ei ngaidam inla, ka hihphat taphawt u chuh pawm in; tichun, ka mûk hawu gahte chuh bâwngchal sik in hun pie’ng kau.

³Asuria te chun ei hukdam thei ta puou a, kidona sakawlte chun le ei hukbit thei diek puoi. Ka khutsuok teu kawm achun, ‘Ka pathien uh na hiu,’ ti kit ngêi ta puo’ng kau. Nauchagahte chun nang ah zahngaihna a mu sek ngâl u a,” ti’n.

⁴“A nungchawn nau chuh hih dam ing ka ting, amau apat a ka lungnatna a kithiel dawk tâk ziekin; ka lungthim pumpi’n ka lungsiet ngâl a: a chung uh ale lungna ta puo’ng ka.

⁵Israel a ding chun van dâichîm tawbang hi’ng ka ting, lili bangin vul un tin, Lebanon tânga thing bangin det takin zung khawh un tin;

⁶A bâk haw chuh bawk lieiluoi un tin, olive thing banga hawih in um un au. Lebanon tâng bangin gimlim ina.

⁷Khatvei ka humbitna nuoi ah cheng kit un tin, huon thai bangin kiduoh hut hut un tin, grep huon bangin gah suong un tin, Lebanon a uain bangin hung minthang in a.

⁸Aw Ephraim, milim pathien tawh kimatna banga ka neih? Kei hi na pauchamna dâwng pa chuh ka hi a, a hun tung ding pa le ka hi: Kei chuh châk thing hing dep dup tawbang ka hi a, A vangsaknau chengcheng nak chuh ka hi ngâl a,” ti’n.

⁹Kuole, miching taphawt chun zie thu haw hi hethiem u hen la, a lungthim ah kawih hen. LALPA lampite chuh a dik a, mi diktatte chun a zui uh a, a hin lawh sek ui. Himahlele, migilo chun a ngaihsak loh ziek un a kisuipai un au.