Read Gangte HOSEA 2 Bible Online

HOSEA 2 - Gangte bible

HOSEA 2

¹Na suohpih pasalte kawm achun “Ammi” tiu inla, na suohpih numeite kawm achun “Ruhamah” tiu un.

²Na nuu hi bawl diek diek un; amah hi ka zi ahi puoh ngâl a, kei le a pasal ka hi diek puoi. A melput mawngmawng apat a nawhchizuok mel a put hi kawihtha hen la, a anglaia kipatin a zawlsaih zawngsak hi haihsan hen.

³A khutih loh a ahih chun a pienni a sangawn a a um bang khan umsak ing ka ting, a silhlechente lipthâk sak ding ka hi. Gamgaw leh bangmah keh lohna bangin siem ing ka ting, tichun dangchâk a thi ding ahi.

⁴A chapate chunga le lungsietna neilo ding ka hi, zahchâkna bei, nawhchizuok chate ahi ngâl u a.

⁵A nuu chun nawhchi a zuok a; amau haw vawpnu chuh zahchâk-um takin a um a, “Ka an leh ka tui te, ka samul leh ka pat te, ka sathau leh ka dâwn dingte ei pie sek ka deihchakte chuh delhzui zel ing ka,” a ti sek a.

⁶Zieziekchun, ngaitie, na lampi chuh lingbawk in huk ing ka ting, amah dal dingin dai kai ka ting; a lampite chuh mu thei puo’n a.

⁷Chun, a deihchakte chuh delh intin, delhpha diek puo’n a. Amau haw hawl intin mu diek puo’n a. Tichun, “Ka pasal masa kawmah vaikit mai ing ka, tu sang hin tumasang kha kei dingin a phazaw ngâl a,” ti’n a.

⁸Buhte, uain te, thau te, sana leh dangka ka hihpun sakte hi, sana, Baal a ding a a mat haw tawh kei piek ahi tih a he puoh ngâl a.

⁹Zieziekchun, ka buhte chuh a ât tieng leh, ka uain chule a thawk tieng leh lâksak ka ting, ka samul leh ka pat, a sangawn khuhna dingte chuh lâksak kit ing ka.

¹⁰Tichun, a deihchakte mitmuh in a sangawn zahmawh sulang ing ka ting. Ka khut apat in kuoma’n hukdawk puo’n a.

¹¹A lawpna chengte, a kut hunbi te, tha thakte, a chawlhni te leh a guol vak hunbi umsate chu suktawp sak ding ka hi.

¹²A grep gui leh a theipi kung, Ziehaw hi ka deihchakte ei piek, ka lawh chuh ahi, a tih sekte chuh sukmangthai sak vek ding ka hi. Thalek gam suoh sak ka ting, gamsa ten ne zo un au.

¹³Kei ei hengilh a, Baal kawma gimlim a hâl ziek leh, sana kicheinate a kithuoma a deihchakte a zuih zawk ziek chun gawt ding ka hi, tih hi LALPA kamsuok ahi.

¹⁴Zieziekchun tuhin thalek gam ah puikit ing ka ting; zie tak achun lungsietna aw nem takin thêm ing ka.

¹⁵Chun, zie apat chun a grep huonte chuh a kawmah pie kit ka ting, Akor guom chuh kinepna kawt dingin siem ing ka. Zie tak achun a ngaklak hun lai nite, leh a vanglai nite, Aigupta gama pata a hung pawt ni bang khan ei dâwng ina.

¹⁶LALPA chun hiti hin a tii: Zie ni chu leh hiti hi hi’n tin, “Ishi” ei ti’n na tin, “Baal” ei ti ta puon la.

¹⁷A kam apat in Baal minte hi sumang ding ka hi a, a min le lam khâk hi ta puo’n a.

¹⁸Zie ni chu leh gamsate, chung leng vachate leh leia bawkvak te tawh thugawlh siem ing ka ting; thalpite, Chemzâmte leh kidonate hi lei apat in sumangthai ka ting; tichun bit takin hun kuol sak ing ka.

¹⁹Tichun, kumsawt a ka zi dingin hun huol ka ting; Diktak leh ginum takin um ka ting; hehpihna leh lungsietna tawp lo in hun nei zing ka ting, kumlekhuo’n keia dingin hun nei tang ka.

²⁰Ka thutiem ah um zing ka ting, keia hin na tin; tichun LALPA ka hi tih he ta’n la.

²¹Chun, LALPA’n hiti hin a tii, “Zie phat chu leh vante chuh hopih ing ka ting; vante chun le leisiet kawmah thugen un au”

²²Chun, Lei in dâwng intin, tichun buhte, grepte leh thau te sepdawk in a.

²³Chun, amau chuh gamsung achun thaichi guolin tuh ing ka ting; hehpih loh chuh hehpih ing ka ting; ka mi hilote kawm achun “Ka mite na hiu hi” ti’ng ka ting, amau chun ka kawmah, “Ka Pathien na hi” tin au.