Read Gangte JOEL 1 Bible Online

JOEL 1 - Gangte bible

JOEL 1

¹Pethuel chapa Joel kawma LALPA thu hungtung chuh:

²Nang haw teksiepute haw, ziehi heu in, Juda gama um cheng chengte haw, bil dawh un! Zie bang thil hi nanguh hun lai leh nanguh hun suonte hun lai in a na um kha ta a ahim?

³Zie chuh na chateu hilh unla, na chateu chun a chateu hilh sawn u hen. A chasawnteu chun suon dang chuh hilh sawn zel u hen.

⁴Thing nget in a nek mawk tapoh chuh khaupe’n a ne a, Khaupe’n a nek mawk tapoh chuh thing nget in a ne a: Thing nget in a nek mawk tapoh chuh lung in a ne zo tai!

⁵Zukhamte haw, halh unla, kap un; Uain dâwn cheng chengte haw, uain kham in kiko vawk vawk un! na kam uh apat lak mang in a um ta ngâl a.

⁶Nam tamtak, simsenloh, ka gam ah a hung pawt tau a, A hateu chuh sakeibaknei ha tawbang ahi a, sakeibaknei lien tak hapi tawbang le a nei ui.

⁷Ka grep guiteu a susieu a; ka theipi thing hawng teu a khawk uh a; A khawk ngim kei uh a, a paihmang tau a, a bâkte chuh a malngim suok kêi tau hi!

⁸Nungak in a vanglai pasal ding kawlladip puon cheng a, a su’na, a kah bangin kap luoi luoi un!

⁹An thillat dingte, uain thillat dingte chuh LALPA Ho-In apat sukmang a hi ta a; thiempute chuh LALPA Ho-In a thillat ding um tâk loh ziek chun a lungkham tau a.

¹⁰Lo haw chuh suksiet a hi ta a; gam chuh a lungkham ta a, buhte chuh suksiet ahi ta a, grep haw chuh a gaw zo ta a, olive thingte chule a chau zo tau hi.

¹¹Aw nanguh, lonei mite haw, kap un; aw nanguh grep gui enkawlte haw, buh leh buhmanpawlte ziek chun kiko vawk vawk un la; lo a buh ât ding chuh a bei ta ngâl a!

¹²Grep guite chuh a vuoi ta a; theipi kungte chuh a chau tha ta a; vaimimthei kungte, tum thingte leh theikung chengte chuh a gaw zo ta a; Mihing chate laka kipahna chule a muol zo ta ngâla!

¹³Nang haw thiempute haw, kawlladip puon cheng unla kap un! Pathien Ho-In achun chieh unla, zan khuo vakin sûn un; Na Pathien u In apat chun changbuong lat leh dâwn ding lat chuh khap ahi ta ngâla!

¹⁴An ngawlh hun mang thiengtho unla; kikhawppi guntak siem unla, LALPA Pathien In achun teksiepute leh, zie gama chêngte cheng chuh puikhawm un la, LALPA chuh sam un.

¹⁵Zie ni chuh a chung agik hi! LALPA ni chuh a nai ta ngâl a; Bangakai hihtheipa apat sukmangthaina chuh a hungtung ina. Zie ni chuh bang tienga tizat um ahi ta dem!

¹⁶I mitmuh ngei uh ah I lo a thai teu sukmangthai ahi a; I Pathien uh In a kipahna chuh a um ta puoi!

¹⁷Thaichi haw chuh leinuoi gaw achun a muot mang zo ta a; Buh kawihkhâwm ding himhim a um ta puoh a, buh In hawmte chule phiet in a um tai!

¹⁸Ganguol haw chuh a mau nasa nau e! Bâwng hawnte chuh a lînglau u a, hampa pehna mun ding a um loh ziekin; belam hawn chun le a thuok lah tau hi.

¹⁹Aw LALPA, ka hun sam hi, gamsung a hamhing mun haw chuh mei in a katum zo ta a; meikuong chun gam laka thing haw cheng chuh a kâng thieng tai.

²⁰Ahi, luicha tui haw chuh a kan tâk ziek in gamsate nasan chuh nang hun ngaiin a ha huoi huoi u a; gammâng a hamhing mun haw chuh mei in a katum zo ta ngâla.