Read Gangte JOEL 2 Bible Online

JOEL 2 - Gangte bible

JOEL 2

¹Zion achun pengkun mût unla; Pathien tâng thiengtho achun kigalginna thu phuong un. Juda mipite haw, kithingsieu in; LALPA ni chuh hung tung pai ding ahi ta ngâl a; ahun a nai tai!

²Thimna leh vannîm ni, meizin ni leh thim sah ni hi’n tin; Tang chunga meipi thim zeng zung a kai bangin, khaupe hawn hattak, masanga a na um khalo leh, tunung lele um talo hiel ding chuh hung leng un tin, tâng chuh phalvak in a tuom bangin hun tuom un au.

³A malam u leh a nung lam u chuh a kâng thieng zela; a masang u a gam chuh Eden huon bang himahlele, a khel tieng u leh thalek gamgaw a suok zel a, bangmah sit a nei puou hi.

⁴A latdan u chuh sakawl tawbang in a kilang uh a; kidona sakawl tawbang in a tai u a;

⁵Kidona kangtalai bangin tâng chungah a chawm gi sausau u a; buhpawl kuong puotpuot a ka bang leh; Sepaih nasatak, galdo dinga kisazosa bangin a kitieng u a.

⁶A masang u achun mipite a lungdawng u a; a mai hawu chuh a dângtha zo ta a.

⁷Gal hat tak bangin a do u a; kido mi bangin bâng ah a kal uh a. A ma zawn chiet u ah a chieh u a, bangmah cha’n a nang puoi.

⁸A kinektuoh puou a, amau lampi chietah a chieh u a; Matchâkte a susieu a, a tâng diek puou hi.

⁹Khawpi chungah a chawm u a, kulh chungah a tai u a; In sunghaw ah a kal u a, gucha bangin tukvanhaw ah a lut u a.

¹⁰A masang u ah lei a kilîng a; vante a kithing a, Ni leh tha chuh a thim a, aksite’n le a vakuh a suoh ngam puou hi.

¹¹Chun, LALPA chuh a sepaih hawnte thupie’n a kiko a, A sepaih, a thu zawpte chuh a tam u a, a hât u ahi. LALPA ni chuh a lopi a, a lauh-um mah mah ngâl a; Kuo ahim a thuok thei ding?

¹²LALPA chun, “Khutichun, tuhin na lunggil chengcheng u a lungkham in, anngawl in, kap unla kei lam hung ngau in.

¹³Na puon uh hilo in, na lunggil uh bawtthêk un la.” LALPA na Pathien lam u chuh ngau in. Amah chuh mi lungsiet thei tak leh, lainatna a dim, lungnem leh lungsietna hau; thil phalo hihte gawt ding hilo in, ngaidam dinga kisazo zing ahi ngâl a.

¹⁴Khutichun, LALPA na Pathien u chun a lunggil theng in, buh tamtak a hun vangsak in, changbuong thillat leh uain thillat lân thei un lau.

¹⁵Zion achun pengkun mût un la; Anngawlh hun mang thiengtho unla, kikhawppi guntak siem un.

¹⁶Mipi sam khawm un la, kikhawpna thiengtho a dingin, kiguotkhawl sak un la, teksiete, naupangte, nawichep laite sam khawm unla; Moneipa chuh a indan apat hung pawtdawk hen la, mo le a indan sunggil apat chun hung pawt hen.

¹⁷Ho-In hulliep leh maichâm kikala nasem thiempute chuh, kap kawmin paucham u hen la, “Aw LALPA, ka chungu ah zahngai in! Nam dangte chuh, ‘Na Pathien uh khawia um a hi ta?’ ti a, musit tak leh ei nuihsan dingin umsak ki’n,” ti’n gen u hen.

¹⁸LALPA’n gam a ngaihsakna chuh a hun sulang kit a, A mipite chungah lungsietna a hau a.

¹⁹A pauchamnau a dâwng a, “Tuhin buhte, uain te, leh olive thaute hun pie ding ka hi a; tichun, lungbih takin um ta’n lau. Nam dangte chun hun musit ta puo’n au.

²⁰Mâllam sepaihte chuh na kawm u apat chawn mang kêi ka ting; thalek gamgaw ah chiehsak ing ka. A masa lawi chu suohlam Tuipi Thi ah sawl ka ting; a nunung lawi chu tumlam Tuipi ah paih ka ting, hung uih dawk un tin, gimsie takin hung um un au. Na chunguh a thil nasatak a hih tâk ziekun amau haw chuh sumangthai ing ka.

²¹“Aw gamte haw, lau kiu inla, kipâkin lawp un! LALPA chun thil lopi takte a hih ta ngâl a.

²²Gamsate haw, lau kiu in! ham hing munte a hung duoh a, thing chuh a hung gah a, theipi kung leh grep guite chuh a hung duoh ta ngâl a.

²³“Nanguh, Zion chate haw, kipâk un! Nang haw dinga LALPA thilhihte ziek chun kipâk un. Guoh masa chu a hun takin nanguh a hun pie ta ngâl a. Nanguh dingin guoh a zuk sak a, chavang guoh masa leh guoh nunung chuh.

²⁴Buh phuolte chuh buh in dim in tin; uain leh sathau chuh a chilna khuk achun dimlet ina.

²⁵Na lak uh a sepaih hawn tamtak banga ka sawl, khaupete, thingnget te, lungte, thinglungte’n a nek zawh kumteu a a na mansakteu kha hun din kit ing ka.

²⁶Nieng takin ne ta’n na tin uh, thilmak hun hihsak sek pa LALPA na Pathien uh min chuh pakcha ta’n na tin uh: Ka mite chuh zahhuoi himhim ta puo’n au.

²⁷Tichun, aw Israel, na laku ah ka um hi tih leh, LALPA na Pathien uh ka hi a, Keimah lo chuh a dang a um puoi tih he’n lau! Khutichun, ka mite chuh muhsit in um ngei ta puo’n au.

²⁸“Zie hun tieng chuleh hiti hi hung hi’n tin, mi chengcheng chungah ka Thagau sungtha’ng ka ting; tichun, na chapateu, na chanu teu in ka thu gen un tin, na teksieteu in mang in mat untin; na tangval teu in kilâkna mu’n au.

²⁹Zie nihaw achun ka suokpa te, ka suoknu te chunga le ka Thagau sungtha’ng ka ting;

³⁰“Van leh lei ah thilmakte hun muhsak ing ka ting, thisan te, mei te, meikhu nasa tak tawh,

³¹Nisa chuh hung thim intin, tha thisan hungsuok intin; LALPA ni lopi tak leh minthang tak chuh a hungtun ma’n.

³²Chun, tihi hi’n tin, kuole, LALPA min sam tapohte chuh hukdam hin au: LALPA’n a gen bang khan, ‘Zion tâng leh Jerusalem a khenkhat chuh suokchau un tin; ka telte chauh chuh hing dawk un au,’ ” ti’n.