Read Gangte JOEL 3 Bible Online

JOEL 3 - Gangte bible

JOEL 3

¹LALPA chun, “Ngaitiem u, zie hun achun Juda leh Jerusalem a mite, saltângte chuh lamzang takin umsak kit ing ka ting.

²Nam chengcheng sam khawm ka ting, Jehoshaphat guom ah pui ing ka ting; Ka mipite chunga a thilhih teu ziekin zie tak achun a chungthuu vaihawm ing ka. Israel chate chuh gamdang ah a thehzak uh a, ka gochan Israel chuh a khenzak ziekun.

³Ka mite chungah phun a san u a, pasal naupangte chuh nawhchi man dingin a zuok u a, numei naupang chuh uain man dingin a zuok u a, ti a chu zu a dâwn u a, a kham theih na dingun.

⁴“Nanguh Tura leh Sidon, nanguh Philistia gam chengcheng te haw, ka chunga phulak guo na hiu em? Ka chunga phulak guo na hih u leh vang kin takin na chung u ah phuba leh lak thuk ing ka.

⁵Ka dangkaguo leh ka sanate na lau a, ka thil phatak deihum te, na ho-in sunghawu ah na puo lut ta ngâl u a.

⁶Juda chate leh Jerusalem chate le, a gamgiu apat a gamla taka na chawn mang theihna dingun Grik mite kawmah na zuok mang uh a.

⁷Ngaitiem u, tuhin, na zuok mangnau apat khan chawktho in puikhawm kit ka ting, a chunguh a na hih bangun, na chung u ah hihthuk ing ka.

⁸Na chapateu leh na chanuteu chuh Juda chate khut ah zuok ing ka ting, amau haw chuh gamla tak ah, Sabea mite kawmah amau haw chuh zuok un au! Kei LALPA hin ka gen ta ngâl a.

⁹“Ziehi namte lak ah phuong unla: ‘Kido dingin kiguonggalh un; na gâl hatteu sam un la; na sepaihteu cheng khawm unla, chieh un!

¹⁰Na lei lehnau thikzum chuh chemzâm in sek un la; na theikung thawhhahnau chemchate chuh tiengcha dingin sek un: Mi hatlo in le, Ka hât hi, ti hen.

¹¹A kimvela nam cheng chengte haw, kin unla, hung meng un! luiphai achun kikhawm un,’ ” ti’n. Aw LALPA, zie tak achun na mi hattakte chuh amau haw do sak in.

¹²“Namte chuh kichawktho u hen la, Jehoshaphat guom achun hung u hen. Zie tak achun a kimvela nam cheng chengte vaihawm sak dingin chu ding ka hi!

¹³A nunsie mah mah uh a; zieziekchun, buh ât guolin atthau unla, grep chilgawp guolin chilgawp un la; Grep thawkna khuka uain a dimlet macheng a a chil guol un chil gawp un,” ti’n.

¹⁴Thutanna guom achun mipi sang tamtak a um sausau u a. Zie tak achun LALPA ni chuh hungtung pai ding ahi ngâl a!

¹⁵Ni leh tha a hung thim a, aksite chun a vakuh a suoh ta puou!

¹⁶LALPA chuh Zion tâng apat in kiko in tin; Jerusalem khuo apat in a aw suoh in tin; vante leh lei kilîng ina. Himahlele, LALPA chuh a mite dingin kihumbitna hi’n tin; Israel suonte dingin kulh insang hi’n a.

¹⁷Khutichun, LALPA na Pathien uh, tâng thiengtho Zion a cheng ka hi tih hun he ta’n lau: Jerusalem chuh khawpi thiengtho hi’n tin; malzin kuoma’n a sung tawh ngei ta puo’n au.

¹⁸Zie hun tieng chuleh hiti hi hung hi’n tin, tâng sangte chuh nawitui in luong intin; Tang haw achun ganguolte tau un tin, Juda gam luicha chengcheng achun tui luong dim ta’n a. LALPA Ho-In apat tuinak hung kichikdawk intin; tichun, Shittim luiphaite chuh hihnawm ina.

¹⁹“Juda chate chunga diem lo hiela tawi a; a gam uh a mithiem thisan a suoh ziekun, Aigupta gam chuh thalek gam suok intin; Edom gam chuh thalek gamgaw hung suok ina.

²⁰Himahleh, Juda gam chuh vang kumkhuo’n luoh in um in tin, Jerusalem chuh a khang khang in um ina.

²¹Chun, a thisan phubau chuh la’ng ka ting, gitlohna neite chuh hinghawih lo ding ka hi. LALPA chuh Zion achun a cheng zing ngâla,” ti’n.