Read Gangte AMOS 1 Bible Online

AMOS 1 - Gangte bible

AMOS 1

¹Juda Leng Uzia vaihawm lai leh, Israel Leng Joash chapa Jeroboam vaihawm laia, leiling um ma kum nihna a chun, Tekoa muna ganguol vengte laka Amos in Israel te chungchâng thu a muh chuh:

²Amos chun, “LALPA chuh Zion tâng apat chun kiko intin, Jerusalem apat in a aw chu gi dawk intin; gancha tatna munte chuh gaw zo intin, tichun, Karmel tânga hampa haw chuh vuoi zo ina,” a ti a.

³LALPA chun hiti hin a tii; “Damaska khuo bawhsietna thum te ziekin ahi, li ziekin, a gawtna chuh suhai puo’ng ka; Gilead gam chuh buh gawihna thik haw a chuh a gawt ziekin.

⁴Khutichun, Leng Hazael in leng-In a sak chunga chun mei sawl ing ka ting, Benhadad kulhte chuh hâl chim ing ka.

⁵Damaska khawpi kawtkhak chuh khen gawp ka ting, Aven luiphai a chêngte leh, Beth-eden vaihawmte chuh ladawk ing ka. Tichun, Suria mite chuh Kir gam ah sala puih mang in um un au,” a ti a.

⁶LALPA chun hiti hin a tii, “Gaza khuo a mite chuh, a bawhsietnau thum ziekin ahi, li ziekin ka gawtna chuh suhai puo’ng ka; Nam pumpi chuh suok banga Edom mite kawma a zuok ziekun.

⁷Khutichun, Gaza khawpi kulh bâng chunga chun mei sawl ing ka ting, tichun, a kulhte chuh katum zo ina.

⁸Ashdod khawpi vaihawmte leh Ashkelon vaihawmte chuh sumangthai ing ka. Ekron khawpi chuh gawt ing ka ting, Philistia mi, nutsieh a umte chuh thi vek un au,” a ti a.

⁹LALPA chun hiti hin a tii, “Tura khuo bawhsietna thum ziekin ahi, li ziekin ka gawtna chuh suhai puo’ng ka. Nam pumpi chuh Edom gama sala a puih ziek un leh, chamna thutiem a siem uh a nit loh ziek un.

¹⁰Zieziekchun, Tura khawpi kulh bâng chunga chun mei sawl ing ka ting, a kulhte chuh katum vek ina,” a ti a.

¹¹LALPA chun hiti hin a tii, “Edom mite bawhsietna thum ziekin, ahi, li ziekin ka gawtna chuh suhai puo’ng ka. A suohpihteu Israel te chuh delh zinga, a chung u a zahngaihna himhim a suklat loh ziek un. A lungnatnau chun tâwp a nei puoh a, a thihsan ngeiloh ziekun.

¹²Khutichun, Teman khawpi chunga chun mei sawl ing ka ting, Bozrah khuo kulh chengcheng chuh katum vek ina,” a ti a.

¹³LALPA chun hiti hin a tii, “Ammon chate bawhsietna thum ziekin ahi, li ziekin, ka gawtna chuh suhai puo’ng ka. Gam deih beh zieka a gâl bawlnau a, Gilead numeite nauvawp lai haw nasan a phil zak ziekun.

¹⁴Khutichun, Rabbah khawpi kulh bâng chunga chun mei sawl ing ka ting, a kulhte chuh katum vek ina. Tichun, kido ni chun kiko thawm um intin; kidona chuh huihpi bang mai in um ina.

¹⁵A lengteu leh a milienteu chuh sala puih in um vek un au,” a ti a.