Read Gangte AMOS 2 Bible Online

AMOS 2 - Gangte bible

AMOS 2

¹LALPA chun hiti hin a tii, “Moab bawhsietna thum ziekin, ahi, li ziekin a gawtna chuh suhai puo’ng ka. Edom Lengte guhhaw chuh zahlo hielin a hâltum ngâl u a.

²Moab chung achun mei sawl ing ka ting, Kerioth kulhpite chuh katum vek ina. Tichun, Moab mite chuh kido thawm leh sepaihte kiko git leh pengkun gitte ziek chun thi’n au.

³Moab vaihawmte leh a mapuiteu cheng chuh amah tawh that vek ing ka,” ti’n.

⁴LALPA chun hiti hin a tii, “Juda bawhsietna thum ziekin ahi, li ziekin, a gawtna chuh suhai puo’ng ka. Ka thuhilhte a musita, ka thupiekte a zawp puoh ngâl a. A pileputeu pathien diklo mah khan a puih mang ziekin.

⁵Zieziek chun, Juda chunga chun mei sawl ing ka ting, Jerusalem khawpi chuh katum vek ina,” a ti a.

⁶LALPA chun hiti hin a tii, “Israel bawhsietna thum ziekin ahi, li ziekin, a gawtna chuh suhai puo’ng ka. Dangkaguo a mi diktat a zuok ziek u leh, kengtawbek tuok khat mana mi tasamte a zawk ziek in.

⁷Mi chagahte chuh tuol tawh a tawhden u a, sukgimtheih a umte chuh a kimuhloh sak u a; pa leh a chapa chun suok numei khat a kuolkhawmpih u a, zie tawbang hin ka min thiengtho chuh a subuok u a.

⁸Maichâm mun chenga chun mi chagahte bat mana puon a lâkteu chuh phah in, a kuol sek u a. A pathien ho-in teu achun a paisa bateu apat a uain a lâkteu chuh a dâwn sek ui.

⁹“Himahleh, amau haw masangah sidar thing banga sang leh, gangpi thing banga khauh Amor te khale ka sumangthai a; a chunglam apat in a gah leh, a nuoi lam apat a a zung te chule ka sumangthai vek a.

¹⁰Chun, Amor te gam luoh dingin, Aigupta gam apat in ka hun puidawk a, gamthip ah kum sawmli sung chuh nanguh ka hun pui a.

¹¹Chun, na chateu laka khenkhat chuh thiemgau hi ding leh khenkhat Nazarit-mi hi dingin na tangvalteu laka khenkhat chule ka siem a. Aw Israel chate haw! khutibang chu hilo ahim? LALPA’n a tii.

¹²Himahleh, Nazarit mite kawmah uain dâwn ding na pieu a, thiemgaute kawmah, ‘Thugen kiu in,’ ti’n thu na pieu a.

¹³Zieziekchun, tuol ah hun chilgawp ing ka ting, bâwng kangtalai chunga buh a dima kisiem gi guolin hâm vengvung un lau.

¹⁴Chun, taih hatte chuh suokcha diek puou un tin; mihatte hatna bei intin, sepaih inle amah hinna hukdawk thei diek puo’n a.

¹⁵Thalpi mang pa le ding thei diek puo’n tin, hât taka tai le kihukdam thei diek puo’n a: sakawl chung chuong mite le kihukdam thei diek puo’n au.

¹⁶Zie ni chuleh, sepaih hangsan pên inle, a gâlvan sep tha’n tai ina,” ti’n, LALPA chun a gen ta ngâl a.