Read Gangte AMOS 3 Bible Online

AMOS 3 - Gangte bible

AMOS 3

¹Aw Israel chate haw, Aigupta gam apat ka puih dawk inkawte haw! LALPA’n nanguh kalhna thu a gen hi ngaithau un:

²“Nang haw mai hi khawvel a nam chengcheng laka ka het na hiu a: zieziekchun, na manlohna teu chengcheng ziekin hun gawt ding ka hi,” ti’n.

³A kithutuok loh u chun bangti’n mi nih chuh a kitawn khawm thei ding u?

⁴Sakeibaknei in gammânga sa a mat lai chauh lo chun a hum hâm ngei em? Sakeibaknei vanglai in bangmah a mat loh chun a kawhawm sung ah a ngîk dinga ahim?

⁵Thâng-antakchuon umlo in thâng ah vacha a âwk theia ahim? Bangmah awklo in thang chuh lei apat in a pel dinga ahim?

⁶Khawpi a mite sulau lo hielin pengkun a gi ngei em? LALPA’n a sawl loh chun khawpi ah sietna a tung dinga ahim?

⁷Bangakai chunga LALPA chun, a suok thiemgaute kawma a thuguk phuong lo in bangmah a hih ngei puoi.

⁸Sakeibaknei a ngîk tieng leh kuo a lau lo a um? LALPA Pathien in thu a gen tieng leh, kuo a hilhlawk lo a um thei ding?

⁹Ashdod khuo leng Inhaw a leh Aigupta gam leng Inhaw a chun phuong un la, “Samari tâng chunghaw ah kikhawm unla, tichun, zie a buoina lientak umte leh, zie laka bawl sietna umte chuh en un!” ti’n.

¹⁰A kulhpi teu chuh pawngbawl leh thagum a a thil lak teu chun a sudim u a; diktaka bawl a guo hiel puou hi, LALPA’n a tii.

¹¹Zieziekchun, LALPA’n hiti hin a tii. “Melmate chun a gam u chuh ûmkimvel un tin, a kulhpiteu leh a na kivenna dai chuh suchim vek un tin; na kulhpi dettak teu chuh buluh ding ahiu hi.” a ti a.

¹²LALPA chun, “Belampu’n, sakeibaknei kam apat a, a keng thêm ahim, a bil thêm ahim a hukdawk chauh bangin, Samari khuo a zâlkhun ning a leh zâlkhun, lung-êk puonphah khapchâk chunga Israel cha umte chuh hukdawk un au,” a ti a.

¹³“Bangakai hihthei Pathien, LALPA Pathien thu pawt chun hiti hin a tii. Ngaithau unla, Jakob inkawte hetsak un!

¹⁴Israel bawhsietna zieka gawtna chuh amah chunga ka ngak chun, zie ni chuleh Bethel a maichâmte chule susie ding ka hi; tichun, maichâm ning tin chuh sattan untin, lei ah kie tha’nau.

¹⁵Chun, phalbi In leh nipi inte chule khên sie’ng ka ting; saiha inte chuh mangthai intin, In lopite chule sukmangthai in um vek un au,” LALPA’n a tii.