Read Gangte OBADIA 1 Bible Online

OBADIA 1 - Gangte bible

OBADIA 1

¹Zie hi Obadia kilâkna muh chuh: Bangakai chunga LALPA’n Edom namte chungchâng thu a gen chuh ziehi ahi. LALPA’n namte kawmah palai a sawl a, A thugen chuh na na za tau ui: “Kipan inla Edom te do dingin chieh hitiu,” ti’n.

²LALPA chun Edom te kawmah; “Ngaitie, hatlo takin hun siem ing ka ting, mitin in hun musit un au.

³Aw nang, suongpi kek kal a cheng a, mun sang luohpa; ‘Kuo ahim leia ei luoi tha ding?’ Lungthima tipa, na lunggil uonna chun thepa um na hi tai.

⁴Mupi bangin sang takin lengto in la, na bu chuh aksite laka sieh mahleh chin, zie apat chun hun luoi tha ding ka hi, LALPA’n a tii.

⁵“Na kawmah guchate, suommangte zan in hung leu, a nawp chin un hun gu lo ding ahiu em? Na kawmah grep lakhawmte hung leu, grep lawh ding neukhat bêk nusieh lo ding u maw? Himahleh, na melmate chun vang hun sumangthai vek ding ahiu ui.

⁶Aw Esau suonte thil haw hawldawk ahi ta chuh! A gobawm selguk haw maidawk ahi ta chuh!

⁷Nang lama pang te chengin gamgi tieng hiel a hun nawh u a, kituok taka na umpihte khan a hun thêm tau a; a hun zo tau ui. Na chângthâk nete khan na nuoi ah thang a kam u a: ‘Amah hin hetthiemna banga a neih chuom diek?’ ti’n a hun gen tau hi.

⁸“Edom ka gawtni tieng chu leh, a mipilteu chuh sumangthai vek ka ting; Esau tâng apat hetthiemna sumangthai lo ding ka him? LALPA’n a tii.

⁹Teman kido mite chuh suklauh in um untin, Edom a sepaihte chuh thah in um vek un au.

¹⁰“Na suohpihpa Jakob chunga na hiemngâmna ziekin, zahchâkna’n hun khuh intin, kumlekhuo a ding in sukmangthai in um inla.

¹¹Muong taka na din ni a nam dang mite a kulh kawtkhaka a hung lut u a, Jerusalem hauhsaknate a kihawp lai u khan, nang le amau laka khat tawbang na hi kha.

¹²Himahleh, na suohpihte a vangsiet lai un a sietna chuh nuihsan ki’n la; Juda chate a manthai niu chun a chung u ah kipâk ki’n la, a gimtheih niu in le kisathei takin pau ki’n.

¹³Ka mite a vangsiet niu in amau haw nuihsan dingin a kulh kawtkhak u ah lut kiu in, Ahi, a vangsiet niu in a sumlepai uh chung ale na khut uh nga kiu in.

¹⁴Mi khenkhat taidawkte man ding in le lamthuom ah ding ki’n. A vangsiet niu chun a umsunte chuh a melmateu khut a le pie diek ki’n.

¹⁵“Namte chengcheng chungah LALPA ni chuh a nai ngâla, Aw Edom, na hih bangmah chuh na chunga le hih a um ding ahi. Na piek mah chuh na muh kit ding ahi.

¹⁶Ka mite chun gawtna khawn kha tak chuh ka tâng thiengtho achun a dâwn tau a. Himahleh, na kimvel u a namte chun zie sanga khawn kha zaw chuh dâwn un au; ahi, dâwn untin, valh lut untin, tichun beimang vek un au.

¹⁷Himahleh, Zion tâng chuh hukdawk hi’n tin, zie tak a chun thientho na um intin, Jakob inkawte chun a gochan ngêi u chuh luoh un au.

¹⁸Jakob inkawte chuh mei hiu un tin, Joseph inkawte chuh meikuong hiu untin; Esau inkawte chuh buhpawl tawbang hiu untin, amau haw lak ah kuong intin, katum vek un au: Esau inkawte chuh a suokcha um hiel puo’n au, LALPA chun a ti ngâla.

¹⁹“Chun, simlam mite chun Esau tâng chuh luoh un tin, chun, phaicham a mite chun Philistia gam chang un tin, chun, amau chun Ephraim gam leh Samari gam chuh chang un tin, chun, Benjamin chuh Gilead gam chang ina.

²⁰Khutichun, Israel suon saltâng mipite chun Kanaan te gam chuh luoh un tin, Zarephath chan in chang un tin; Sepharad gama Jerusalem mi saltângte chun simlam khawpite chuh chang un au.

²¹Chun, Zion tâng achun hukdampate hung pawtdawk intin, Esau tâng chuh vaihawm sak intin, tichun, gam chuh LALPA a hi ta’n a.”