Read Gangte JONA 1 Bible Online

JONA 1 - Gangte bible

JONA 1

¹Amittai chapa Jona kawmah LALPA thu a hungtung a,

²“Kipan in la, Ninevi khuo, khuo lopi tak achun chieh in la, a chungchâng thuu va kikopih ah; a nunsiet nau chuh ka masangah a hungtung to ta ngâl a,” ti’n.

³Himahlele, Jona chuh LALPA masang apat chun Tarshis gama taimang dingin a kipan ta a; chun, Joppa khuo ah a chieh suk a, Tarshis zuon ding kuong a mu a, tichun, a chieh man ding chuh a pie a, LALPA masang apat chun Tarshis zuon dingte chu tawh kitawn dingin kuong achun a lut suk ta a.

⁴Himahlele, LALPA chun huihpi nasatak mai Tuisuohgiet achun a hun tun sak a, Tuisuohgiet achun huihpi nasatak a nung ta a, tichun kuong chuh kek ding bang mai in a um ta a.

⁵Ziephet chun, kuong-pute chuh a lau tau a, a pathien uh a sam chiet tau a. Kuong chuh a zân deuh na dingin kuong sunga thuomphuo haw chuh Tuisuohgiet achun a paih tha tau a. Himahleh, Jona chulah, kuong sungnung pên achun ana lut ta a; a kuol a, a na ipmu dap kêi ta a.

⁶Khutichun, kuong hotupa chuh a kawmah va chieh a, “Nang, ipmupa, bangti dana ipmu mai thei na hi? Tho inla, na Pathien panpihna ngenin paucham ah. Pathien chun ei uh ei khawksak in ei hinghawih kha mawh die,” a ti a.

⁷Chun, kuongpute chun, “Hung tiem u, zie thil phalo, I chung u a hungtung hi kuo ziek ahih I het theihna dingun phunsân hitiu,” ti’n a kiho u a. Tichun, phun a san tau a, a phunsân u chuh Jona chung ah a chu ta a.

⁸Tichun, a kawm achun, “Zie thil phalo, I chung u a hungtung hi kuo ziek ahi nei hilh ah. Khawi gam mi na hi? Khawi apat a hung na hi? Bang nasem na hi? Bang nam na hi?” ti’n a dawng u a.

⁹Jona chun a kawm u ah, “Hebrai mi ka hi a; Tuisuohgiet leh leisiet siempa Pathien chuh ka lau a ahi,” a ti a.

¹⁰Ziephet chun, kuongpute chuh a lau mah mah tau a, a kawmah, “Zie thil na hih chuh bangti dân ahi ta leh?” a tiu a. Amau chun LALPA apat taimang ahi tih a he ngâl u a.

¹¹Tichun, huihpi chuh a hât deuh deuh mai a, ziephet chun kuongpute chun, “Huihpi a haih theihna dingin na chungah bangti’n a ka hih dinguh?” a tiu a.

¹²Jona chun a kawm u ah, “Ei dawm kâng un la. Tuisuohgiet a hin ei seplut un: khutichun, Tuisuohgiet kinawk hi hung hai ina. Keimah dikloh ziekin na chungu ah zie huihpi hattak hi nung ahi tih ka he ngâl a,” a ti a.

¹³Himahlele, mite chun kuong chuh lui pang lam zuon dingin hah tawl in a tawl u a: himahleh, ahi thei puoh a; Tuisuohgiet chuh a kifawn a, huihpi chu la a hât deuh deuh ngâla.

¹⁴Ziephet chun, LALPA chuh a sam u a, “Aw LALPA, zie pa mihinna ziek hin ei sumangthai ki’n la, mithiem thisan mawh ka chung u a ngalo hâm dingin tihtak zetin ka hun ngên ui; Aw LALPA: nangin na nawp banga na hih ahi ngâl a,” a tiu a.

¹⁵Khutichun, Jona chuh a dawm kâng u a, Tuisuohgiet achun a paih tha tau a. Ziephet chun, tui kinawk phul but but lai chuh a hai ta a.

¹⁶Tichun, kuongpute chun LALPA chuh nasatak in a lau tau a; LALPA kawm achun kithawihnate a lân u a, a nasem dingin thute a tiem tau a.

¹⁷Chun, LALPA’n Jona valh ding chuh ngapi lien tak ana guot ta a, tichun ngapi sung achun Jona chuh ni thum leh zan thum a um a.