Read Gangte JONA 4 Bible Online

JONA 4 - Gangte bible

JONA 4

¹Khutichun, zie chungthu achun Jona chuh a lungkim lo mah mah zieng a, a lungna ta a.

²LALPA kawmah a paucham a, “Aw LALPA, ziehi ka gam u a ka um laia ka gen kha hilo ahim? Zieziek ahih Tarshis lama taimang zieng ka hi kha! Nang hi mi lungsiet thiem leh hehpih thiem Pathien, lungna vak lo; dettaka lungsietna nei zing Pathien, thil phalo apat kisik kit thei Pathien leh mi gawt zieng lo na hi tih ka he a.

³Zieziekchun Aw LALPA, tuhin ka hinna hi ei lâksak dingin ka hun ngên hi. Kei dingin hin sangin thih a phazaw ngâl a,” a ti a.

⁴Chun, LALPA chun, “Lungnatna ding thuneihna banga na neih?” a ti a.

⁵Tichun, Jona chuh khawpi apat chun a chiehdawk a, khawpi suohlam pang achun a chu a, zie tak achun bûk neucha a kisuon a, khawpi chunga thil hungtung ding chuh muh guo’n, a nuoi lîm achun a chu ta a.

⁶Tichun, LALPA Pathien chun um gui ana guonggalh a, a luchang lieh ding leh nuom a sak deuh na dingin; chun Jona chuh um gui ziek chun a kipâk mah mah zieng a.

⁷Himahlele, Pathien in, a zing kal phalvak in, lung a hun peh sak a, zie chun um gui chuh a pettan a, a hung vuoi ta a.

⁸Ni a hung suok phet chun, Pathien in suohlam huih lum a hun nun sak a; tichun, nisa chun Jona luchang chuh a hailum ta a, a thidang a, amah dingin thih a ngên ta a, “Keia dingin hin sangin thih a phazawi,” a ti a.

⁹Himahleh, Pathien in Jona kawmah, “Um gui chungchâng ahin bang lungnatna ding na nei a ahim?” a ti a. Jona chun, “Ka nei na mah hi, thi hiela lungnatna dingin thuneihna ka nei hi!” a ti a.

¹⁰Chun, LALPA chun, “Na gimpih le hilo, na khansak le hi diek lo, zan khat thu a hung um a, zan khat thu a mangthai kit khaugui hi na lainat a.

¹¹Ninevi khuo, khuo lopitak, a sunga mi nuoikhat leh singnih sanga tam, a changlam u leh a veilam uh hekhen lote leh ganguol tamtak umna hi lungsiet lo ding ka him?” a ti a.