Read Gangte KISIMNA 1 Bible Online

KISIMNA 1 - Gangte bible

KISIMNA 1

¹Aigupta gama pata a hung pawt uh kum nih na, tha nihna, ni khat nin Sinai gamthip ah LALPA’n a umna puon-In apat chun Mosi a hopih a.

²Israel chate kikhawm khawm chengcheng te chuh a chi a chi’n, a kigoluoh dungzui un, a min uh kizawm dân bang zelin pasal chengcheng sim suok in;

³kum sawm nih apat a chunglam, Israel te laka galdo thei cheng chuh nang leh Aron in alawi lawi a na sim suok dinguh ahi.

⁴Chun, ahun panpih dingin nam khat laka mi khat, inkuon lawiupa chuh na kawm a a um dinguh ahi.

⁵Chun, ziehaw hi nam khat laka khat zel na kawma um dingte chuh ahiu hi. Reuben nam apat Shedeur chapa Elizur,

⁶Simeon nam apat Zurishaddai chapa Shelumiel

⁷Juda nam apat Aminadab chapa Nahson,

⁸Issakar nam apat Zuar chapa Nathanel

⁹Zebulun nam apat Helon chapa Eliab

¹⁰Joseph suon Ephraim nam apat Amihud chapa Eliasham; Manasseh nam apat Pedazur chapa Gamaliel

¹¹Benjamin nam apat Gedioni chapa Abidan

¹²Dan nam apat Ammishaddai chapa Ahiezer

¹³Aser nam apat Okran chapa Pagiel

¹⁴Gad nam apat Deuel chapa Eliasaph

¹⁵Naphtali nam apat Enan chapa Ahira ahiu a,

¹⁶Ziehaw hi mipite lak apat a teldawk ahiu a, a pileputeu apat nam laka luchang chiet le ahiu hi.

¹⁷Khutichun, Mosi leh Aron chun amin u a kigen mi sawmlenih te chuh a pui u a,

¹⁸mipite chengcheng chuh tha nihna, ni khat ni chun a sam khawm u a, a phung u leh a inkuon bang zel un a min uh kizawt dân bang zelin a zik tau a. Pasal, kum sawmnih apat a chunglam cheng chuh amau hun suonte min chuh a taklang u a,

¹⁹LALPA’n Mosi thu a piek guol chun Sinai thalek achun a sim ta a.

²⁰Israel chapate gâl kuon thei cheng, upapen Reuben suonte khanggui chuh achi achi’n, a inkuon kuon in, a min uh kizawm bang zelin, pasal kum sawmnih apat a chunglam,

²¹Reuben suonte khanggui galdo thei chengcheng chuh singli leh sanggup leh zanga ahiu hi.

²²Simeon suonte khanggui chuh, a chi a chi’n a inkuon kuon in, a min uh kizawm dân bang zelin pasal kum sawmnih apat a chunglam;

²³Simeon suonte khanggui, galdo thei chengcheng chuh singnga leh sangkuo leh zathum ahiu hi.

²⁴Gad suonte khanggui chuh, achi achi’n, a inkuon kuon in, a min uh kizawm dân bang zelin kum sawmnih apat a chunglam;

²⁵Gad suon, galdo thei chengcheng chuh singli leh sangnga leh zagup leh sawmnga ahiu hi.

²⁶Juda suonte khanggui chuh, achi achi’n, a inkuon kuon in, a min uh kizawm dân bang zelin kum sawmnih apat achunglam;

²⁷Juda suon, galdo thei chengcheng chuh singsagih leh sangli leh zagup ahiu hi.

²⁸Issakar suonte khanggui chuh, achi achi’n, a inkuon kuon in, a min uh kizawm dân bang zelin kum sawmnih apat a chunglam,

²⁹Issakar suon, galdo thei chengcheng chuh singnga leh sangli leh zali ahiu hi.

³⁰Zebulun suonte khanggui chuh, achi achi’n a inkuon kuon in, a min uh kizawm dân bang zelin kum sawmnih apat achunglam;

³¹Zebulun suon, galdo thei chengcheng chuh singnga leh sangsagih leh zali ahiu hi.

³²Joseph nam laka Ephraim chate suonte khanggui chuh, achi achi’n a inkuon, a min uh kizawm dân bang zelin kum sawmnih apat achunglam;

³³Ephraim suon galdo thei chengcheng chuh singli leh zanga ahiu hi.

³⁴Manasseh suonte khanggui chuh, achi achi’n a inkuon kuon in, a min uh kizawm dân bang zelin kum sawmnih apat achunglam;

³⁵Manasseh suon, galdo thei chengcheng chuh singthum leh sangnih leh zanih ahiu hi.

³⁶Benjamin suonte khanggui chuh, achi achi’n a, inkuon kuon in, a min uh tam dân bang zelin kum sawmnih apat achunglam;

³⁷Benjamin suon galdo thei chengcheng chuh singthum leh sangnga leh zali ahiu hi.

³⁸Dan suonte khanggui chuh, achi achi’n a inkuon kuon in, a min uh tam dân bang zelin, kum sawmnih apat achunglam;

³⁹Dan suon galdo thei chengcheng chuh singgup leh sangnih leh zasagih ahiu hi.

⁴⁰Aser suonte khanggui chuh, achi achi’n a inkuon kuon in, a min uh tam dân bang zelin, kum sawmnih apat achunglam;

⁴¹Aser suon galdo thei chengcheng chuh singli leh sangkhat leh zanga ahiu hi.

⁴²Naphtali suonte khanggui chuh, achi achi’n a inkuon kuon in, a min uh tam dân bang zelin, kum sawmnih apat achunglam:

⁴³Naphtali suon galdo thei chengcheng chuh singnga leh sangthum leh zali ahiu hi.

⁴⁴Ziehaw hi ahiu hi, Mosi leh Aron in Israel lawiupa sawmlenih, inkuon lawiupa haw tawh a simteu chuh.

⁴⁵Khutichun Israel suonte a inkuon kuon in, kum sawmnih apat achunglam galdo thei chengcheng, Israel gama um haw chuh a sim u a;

⁴⁶A sim chengcheng teu chuh nuoigup leh sangthum leh zanga leh sawmnga ahiu hi.

⁴⁷Levi chite suon haw chuh a sim puou hi.

⁴⁸A ziek chuh, LALPA’n Mosi kawmah,

⁴⁹“Levi chite chuh na sim ding ahi puoh a, phung dangte laka na simtel ding le ahi diek puoi:

⁵⁰Levi haw chuh ka umna puon-In a na sem ding leh, a matchâk chengcheng leh, zie a thil um chengcheng chuh enkawl dinga na guot zawk ding ahi; puon-In leh a matchâk chengcheng chuh zawn sek un tin, na sem untin, puon-In kimvel ah cheng un au.

⁵¹Puon-In chuh a kichawn ding cheng leh Levi te chun phel un tin, zak kit ding cheng leh Levi te mah chun zak sek un au; midang a vanaih ta chuh suklup ding hi’n a.

⁵²Israel chate haw chun amau haw mun chiet ah, alawi lawi in atam dân bang zel un a puon-In hawu zak untin.

⁵³Levi te vang chun, Israel chate chunga lungnatna a um lohna dingin, puon-In kimvela a zak dinguh ahi a, puon-In chuh a venbit dinguh ahi” ti’n ana gen ta ngâla.

⁵⁴Khutibang chun, Israel chate’n a hih u a; LALPA’n Mosi thu a piek guol chun a hih tau hi.