Read Gangte KISIMNA 10 Bible Online

KISIMNA 10 - Gangte bible

KISIMNA 10

¹Chun, LALPA’n Mosi a hopih a,

²“Dangkaguo’n pengkun nih siem inla, a seka sek thawh in siem in; mipite sap khawmna ding leh, giehbuk chawnna dinga na mat ding ahi.

³Zie pengkunte nih chuh na mût tieng leh, mipite chengcheng chuh, na kawma puon-In kawtkhak bul achu a hung khawm dinguh ahi.

⁴Himahleh, pengkun chuh khat mût ahih tieng leh, lengte, Israel Inkuon khata luchangte chauh nang kawmah hungkhawm in au.

⁵Kigalginna lama a kimut chun, suohlam panga umte a pawt dinguh ahi.

⁶Lauh-um lama na mût kit u chun, simlam panga umte a kipat dinguh ahi; a kipatdawk ding cheng u leh lauh-um hetsakna mût a na mût dinguh ahi.

⁷Amahvang chuh, mipite hung khawmna dingin mût phawt un na tin uh, kido ding mût a mût loh ding ahi.

⁸Aron chapa thiempute haw chun pengkun chuh a mût dinguh ahi. “Zie dân chuh nang haw dingin na suon hawu chana na kumlekhuo dân dinguh hi’n a.

⁹Na gam u a melma hun nuoisieh haw do dinga na chieh tak u leh, kido ding mût a pengkun haw chuh na mût dinguh ahi; tichun LALPA na Pathien u masang achun hetzing hi’n na tin uh, na melma teu laka pat in hukbit hi’n lau.

¹⁰Na kipah niu haw ah, na kut hun bithieh niu haw ah, na tha thak kipat niu haw ah, na hâlmang kithawihnau thillat leh, kichamna thillat kithawihna ni te achun, pengkun chuh na mût dinguh ahi. Khutichun hun panpih ding ka hi, kei hi, LALPA na Pathien uh ka hi,” ti’n.

¹¹Mipite’n Aigupta a nutsieh nung uh, kum nihna, tha nihna, zie tha ni sawmnih ni chun, meipi chuh Thuthunna Hobuk apat chun a hung kilapsang ta a.

¹²Tichun, Israel chate chuh a chieh dân ngei na bangun, Sinai thalek apat chun a pawt u a, Paran gamthip achun meipi chuh a ding ta a,

¹³Mosi manga LALPA thupiek bangin a Inkuon tiemtehna dungzui zel in a pawt u a.

¹⁴Juda nam chuh a Inkuon tiemtehna dungzui zelin a pawt masapen u a; a lawiupa chuh Amminadab chapa Nashon ahi.

¹⁵Issakar namte lawiupa chuh Zuar chapa Nethanel ahi a,

¹⁶Zebulun namte lawiupa chuh Helon chapa Eliab ahi.

¹⁷Chun, Hobuk chuh a phiet tak u leh, Gershon chapate leh Merari chapa te, puon-In zawn haw chuh a kipan ui.

¹⁸Chun, Reuben namte chuh a Inkuon uh tam dân bang zelin a pawt u a, a lawiupa chuh Shedeur chapa Elizur ahi.

¹⁹Simeon namte lawiupa chuh Zurishaddai chapa Shalumiel ahi a,

²⁰Gad namte lawiupa chuh Deuel chapa Eliasaph ahi.

²¹Chun, Levi suon Kohath te chun matchâk thiengtho chuh a zawn u a, a pawt u a; A dangte chuh a tun phet un hobuk chuh a na zak kit tau hi.

²²Ephraim te chuh amau tam dân bang zelin a pawt u a, a lawiupa chuh Ammihud chapa Elishama ahi.

²³Manasseh namte gâl makai chuh, Pedazur chapa Gamaliel ahi a;

²⁴Benjamin namte lawiupa chuh Gideon chapa Abidan ahi.

²⁵A nunung pên in, Dan namte chuh amau tam dân bang zelin a pawt u a; a lawiupa chuh Ammishaddai chapa Ahiezer ahi.

²⁶Aser namte lawiupa chuh Okran chapa, Pagiel ahi a,

²⁷Naphtali namte lawiupa chuh, Enan chapa, Ahira ahi.

²⁸Ziehi Israel chate’n giehbuk a chawn tak u a a kizawt dân u chuh ahi.

²⁹Mosi’n, a puzawnpa Midian mi, Reuel chapa Hobab kawm achun, “LALPA’n, hun pie ding ka hi ti a ei tiem na gam achun chieh ding ka hiu ui. Israel chate chuh khawsathei taka siem dingin thu a tiem a, hung inla zie hauhsakna chuh hun kikawppih ung kau” a ti a.

³⁰Hobab chun a kawmah, “Hung dah mai ing ka, keimauhaw gam ah ka inkawteu kawmah chieh zaw’ng ka,” a ti a.

³¹Amah chun, “Ei taihsan hiel ki’n, gamthip a giehmun ka guonggalh na dinguh na he zaw ngâl a, kei u dingin mit hi ding na hi.

³²Kei u kawma na hung chun, LALPA’n thilpha ei hihsak bang zelin hun hihsak ung kau,” a ti a.

³³Khutichun, LALPA tâng apat a ni thum lam achun a chieh u a; LALPA Thuthun bawm chuh a giehbuk mun ding uh lemchâng hawl chun a masang u achun a chieh zel a.

³⁴Giehbuk a a kichawn dungzui u chun, LALPA meipi chuh sun leh a chung u achun a um zel a.

³⁵Chun, hiti hi ahi a, Thuthun bawm chuh pat dawk ahih cheng leh, Mosi chun, “LALPA, kipan inla, na melmate chuh delhzak inla, Nang hun hawte chuh do in!” a ti zel sek a.

³⁶Chun, a kingak na taphawt ah, “Aw LALPA, Israel mipi sang tamtak te kawm ahin hungkit in,” a ti sek a.