Read Gangte KISIMNA 11 Bible Online

KISIMNA 11 - Gangte bible

KISIMNA 11

¹Chun, mipite chuh LALPA chungah a phunchiek tau a, zie chun LALPA a sukipak hiel puoh a; LALPA’n zie chuh a het phet in a lungnatna chuh a kuong dawk ta a, a lak u chuh a kâng ta a, giehbuk mawng lam chuh a kângtum vek tai.

²Khutichun mipite chun Mosi a sam u a, Mosi chuh LALPA kawmah a paucham a, mei chuh amit ta a.

³Zie mun min chuh Teberah a sa a; LALPA mei chuh a lak u a a hung kuon dawk ziekin.

⁴Israel chate zin na achun, gamdang mi a kitawnpih uh a um a, ziete haw chun sa utchakna nasatak in a nei tau a; Israel te nasan chule a hung phunchiek tau a; “Sa nek ding kuo’n ei pie ta die aw!

⁵Nawpdan dana Aigupta gama nga I nek sek u haw kha I hezing u a, changmai haw, dawnkhawh haw, lothul siel nek zat, lothul bulbâl nei haw, lothul vam haw le;

⁶Himahleh tuhin chuh I hinnau a gaw zo ta a, bangmah kinepna ding a um ta puoi, manna tih loh hi chuh,” a tiu a.

⁷Manna chuh koriander mu tawbang ahi a, a latdan chuh tuikawk chang guola vam ahi.

⁸Zan leh giehbuk vel achun dâitui tawh a kie khawm sek a,

⁹Khutichun, mipite chun a luokkhawm u a, a gawi nêl u a, sum ah a suu a, bel in a huon u a, chângthâk guolin a siem u a, a nek u leh thau a chângthâk kikang bangin alim hi.

¹⁰Chun, mipite chuh a inkuon kuon un, a puon-In kawtkhak chiet u ah a kap ui tih Mosi chun a he ta a, a chungu ah, LALPA a lungnai tih a het phet in Mosi chuh a lungkham mah mah ta a.

¹¹LALPA kawmah, “Bang zieka na suok hi na sukgimtheih ahi? Bang zieka na mitmuh a deihsakna changlo a, zie mipite chunga mawhpuo ahi nei guot ahim?

¹²Ka siem leh ka hinthak ahi puoh ngâl u a! A pileputeu kawma na tiem gama puilut dinga; nausen dawnte’n a bân u a nausen a pawm bang u a, lam tungtawna pui dinga bang zieka nei tih ahim?

¹³Zie mipite deihkhawp ding hi sa khawitak ah ka mu ta die? Amau haw hila sa duh in ka kawmah a kiphin ngâl u a.

¹⁴Zie mipite hi kei chauh in puo zo lo ka hi, kei a dingin a giksak taluoi!

¹⁵Khutibanga hi nei bawl ding chun, ei lungsiet inla, na khut apat in ei that mai in, ti a chuh zie tawbang bawl gimtheihna hi ka thawk sawt loh na dingin” a ti a.

¹⁶LALPA’n Mosi kawmah, “Israel haw upa, mipite leh upa te’n a lawiupau hi a na het mi sawmsagih te kha ka kawmah hun pui in ka umna puon-In ah nangmah tawh ding khawm dingin hun pui in.

¹⁷Tichun hung suk ing ka ting, zie tak achun hun hopih ing ka: chun, thagau ka hun piek chuh amau haw le pie’ng ka, khutichun hun panpih untin, nangmah chauh a puo lo in, mipite puokgik chuh hun puokpih un au.

¹⁸Mipite kawm achun, ‘Zing leh kisuthiengtho un sa nek ding mu ding na hiu hi, LALPA’n na mau gitteu chuh a za a, sa na duh ui tih leh, Aigupta gama hithei na kisaknateu a hêi. Tuhin LALPA’n hun pie ding ahi a, nek ding nei ding na hiu ui.

¹⁹Ni khat ahim, ni nih ahim, ni nga ahim, ni sawm ahim, ni sawmnih ahim, mai le hilo in;

²⁰Tha khat lûm kêi khawp tak leh luoksuok hiel in ne’n lau: na lak u a um LALPA chuh deih lo in, Bang a ti a Aigupta gam a pata kipawt ahim ti a a masanga na kah ziekun, hun ti’n,’” a ti a.

²¹Chun, Mosi’n LALPA kawmah: “Ka umpih mipite hi keng a chieh thei chiet le nuoi gup ahiu a: chun, nangin, tha khat lûm kêi nek ding sa hun pie’ng ka na ti a.

²²Belam guol leh ganguol thah sak mah leng, a vah kham na ding um? Tuipi a nga chengcheng pie lengle a ne kham na ding um?” a ti a.

²³Chun, LALPA’n Mosi kawmah, “LALPA khut chuh sukchawm ahim? Ka gen chuh a guitung em, a guitung puo’m, hun mun la,” a ti a.

²⁴Tichun Mosi chuh a pawt a, LALPA thu chuh mipi haw chuh a hilh ta a, mipite leh upa sawmsagih te chuh a samkhawm a, puon-In kimvel achun a din sak a.

²⁵Khutichun. LALPA chuh meipi lak achun a hungsuk a, a hun hopih ta a, Mosi kawma thagau a piek chuh huntieng a la a, lawiupa sawmsagih te kawm achun a hawmzak ta a. Chun, tihi a hung hi a, a chung u a thagau ahung tun phet chun hilhlawkna thu a gen tau a, himahleh, a velin a phuong kit puou hi.

²⁶Lawiupa sawmsagih te lak a mi nih Eldad leh Medad chuh puon-In apat chun pawtdawk lo in a um zing u a, puon-In achun a chung u ah thagau chuh a um a, thiemgau guolin thu a gen u a.

²⁷Tichun tangval khat chuh a va tai a, Eldad leh Medad in bûk a thu a gen u chuh Mosi a va hilh a.

²⁸Ziephet chun Joshua, Nun chapa a tangval lai apat a Mosi kithuohpihpa chun, Mosi kawmah, “Hepu, amau chuh khap in,” a ti a.

²⁹Mosi’n a dâwng a, “Ka lunglut na hi nei ngaihtuoh pih em? LALPA’n a thagau chuh mipite chengcheng chung ahin sung tha he’n la, thiemgau guolin thu gen vek leu ut ka hi,” a ti a.

³⁰Tichun, Mosi chuh giehbuk achun a lut kita, amah leh Israel lawiupa sawmsagih te tawh.

³¹Khutichun, thakhat in LALPA’n huih a hun nun sak a, tuisuohgiet a kipatin, vamim ahun tawk a, giehbuk leh lampang, ni khat lam, a lehlam pang ni khat lam gêl gêl ah giehbuk vel achun, lei apat a tawng nih chup in a kiek sak a.

³²Tichun, mipite chun zie ni chun, ni tum in, zankhuo’n a zing kit ni tum chan in vamim chuh a luokkhawm u a, a luok tawm pên inle homer sawm a luok hi, bûk kimvel achun amau a ding chiet in a kipho u a.

³³Zie sa chuh a nek lai uh, a nêk zawh mau in mipite chung achun LALPA chuh a lungna ta a, mipite chuh hipi nasatak in a gawt ta a.

³⁴Zie mun min ding chun a Kibroth-hatavah a kisa a; zie tak a chuh tisa utchakna nei haw chuh a kivuih ziekun.

³⁵Kibroth-hatavah apat chun mipite chuh Hazeroth-ah a chieh u a, tak achun giehbuk a siem tau hi.