Read Gangte KISIMNA 12 Bible Online

KISIMNA 12 - Gangte bible

KISIMNA 12

¹Aron leh Miriam chun, Mosi’n Kush numei, zi a a neih ziekin a gensieu a.

²Amau chun, “Mosi kawm mai ahin ahim LALPA’n thu a gen chuom? eihaw kawm ahin le a gen tho hilo ahim,” a tiu a. Zie chuh LALPA’n a na he ta a.

³Mosi chuh lei chunga mihing cheng lak a mi kingainiem pên ahi a.

⁴Chun, Mosi leh Aron leh Miriam kawmah LALPA’n, “Na thum un hung pawt unla, Ka um na puon-In ah hung un,” a ti taphut a. Tichun a thum u chun a va chieh u a.

⁵LALPA chuh meipi ding ah a hungsuk a, puon-In kawtkhak ah a hung dinga, Aron leh Miriam chuh a sam dawka, a nih u chun malam ah a chieh u a.

⁶LALPA’n a kawm u ah, “Ka thu hi ngaiun, na lak u ahin thiemgau na um u chun, amah kawm achun kei LALPA hi kilak na’n kihetsak ing ka ting, mang lam in hopih ing ka.

⁷Ka suok Mosi ka hopih dân hi chuom tak ahi, Ka mi Israel te chung a mawhpuo dinga ka kawih ahi.

⁸Zieziekchun a kawm ahin kimaichangtuoh in thu ka gena, chientak leh het haksa um lo in, Ka lim nasan le a mu ahi! bang zieka ka suok Mosi hi gen sie ngam na hiu em?” a ti a.

⁹Tichun LALPA lung chuh a chungu ah a na phut a, a chieh kit ta a.

¹⁰Puon-In chunga meipi chuh a kichawndawk a, Miriam chuh a hung phâk ta a, vuk bang mai in a hung vam ta a; Aron chun Miriam chuh a vak en a ngaitie, phâk a na hi ta a.

¹¹Khutichun Mosi kawmah, “Hepu, ngawlhuoi taka ka thilhih u leh ka gitloh na ziek u hin zie bang gawtna hi ka chung u ah tunsak ki’n.

¹²Thil bang ahim, a thisa a pieng a pheh kimkhat kinezo bang mai in siem ki’n” a ti a.

¹³Tichun Mosi’n, “Aw Pathien, hihdam kit in,” ti’n LALPA chuh a sama.

¹⁴LALPA’n Mosi kawmah, “A pa’n a mai chil a sietkhum mai le ni sagih tieng a zakcha lo ding ahim? daikieng ah ni sagih sel mang hi henla, zie zawh chuleh puihlut kit hi hen,” a ti a.

¹⁵Khutichun Miriam chuh daikieng ah ni sagih a sel mang a, Miriam a puihlut masang sieh u chuh mipite chuh a chieh chawn ta puou hi.

¹⁶Zie zawh chun mipite chuh Hazeroth apat in a pawt u a, chun, Paran thalek ah giehbuk a guonggalh u a.