Read Gangte KISIMNA 13 Bible Online

KISIMNA 13 - Gangte bible

KISIMNA 13

¹Chun, LALPA’n Mosi a hopih a,

²“Israel suonte chuh a phung tin a lawiupa chiet, phung khat laka mi khat teldawk inla, Kanaan gam ka piek na ding mun chuh entha dingin sawl in” a ti a.

³Chun, Mosi chun LALPA thupiek bangin Israel suonte laka luchang chiet chuh Paran gamthip apat chun a sawl ta a;

⁴Amin u chuh ziehaw hi ahi; Reuben nam apat Zakur chapa Shammua,

⁵Simeon nam apat Hori chapa Shaphat

⁶Juda nam apat Jephuneh chapa Kaleb,

⁷Issakar nam apat Joseph chapa Igal,

⁸Ephraim nam apat Nun chapa Hoshen,

⁹Benjamin nam apat Raaphu chapa Palti,

¹⁰Zebulun nam apat Sodi chapa Gadiel,

¹¹Joseph nam (Manasseh nam a tih uh) apat Susi chapa Gaddi,

¹²Dan nam apat Gamalli chapa Ammiel,

¹³Aser nam apat Mikael chapa Sethur,

¹⁴Naphtali nam apat Vophsi chapa Nahbi,

¹⁵Gad nam apat Maki chapa Geuel.

¹⁶Ziehaw hi gam entha dinga Mosi’n a sawlte min chuh ahiu a; tichun, Mosi chun Nun chapa Hosea chuh Joshua ti’n amin a sanga.

¹⁷Tichun, Mosi’n Kanaan gam entha dingin amau haw chuh a sawl a, a kawm u ah, “Simlam pang ah chiehto un la, chun, tâng gam haw achun kalto unla;

¹⁸Bang tawbang gam ahim tih te, zie a mite chuh mihat ahih u leh ahih loh uh, atawm leh tam dân teu,

¹⁹a umnau gam chuh a phat leh phatloh dante, a um nau khuo chuh bang tawbang ahim, puon-In mai ahim, kulh nei ahim, kulh neilo tih te;

²⁰Chun, a gam chuh gam hausa ahim, gam chagah ahim, chun, a gam achun thing a kek em keklo tih te va enthau unla. Hangsan takin um unla, zie gam a theigah haw chuh hun puou un,” a ti a. Zie hun chuh Grep gah masate min hun lai tak ahi a.

²¹Khutichun a chiehto tau a, a sim lampang gam chuh Zin thalek apat a mâllam Hamath lutna Rehob tieng in a entha suok u a.

²²Chun, sim lam ah a chieh to u a, Hebron a va tung u a, zie tak achun Anak suon Ahiman-haw, Sheshai te haw, Talmai te haw a um u a. (Hebron chuh Aigupta gama Zoan khuo kisat ma kum sagih masanga um ahi tai).

²³Chun, Eshkol guom a va tung u a, zie tak achun Grep gah bawkkhat a bâk pum in a satthau a, mawlh in mi nih in a zawn u a, vaimim thei haw leh Theipi haw le a puou a.

²⁴Zie tak guom chuh Eshkol guom a tiu a; Israel chate’n zie apat achu Grep bawk chuh a satthak ziek uh ahi.

²⁵A gam va etthâknau a, ni sawmli a va châm nung u chun a hung vaikit tau a,

²⁶Khutichun, gam enthate chun Paran thalek a Kadesh achun, Mosi leh Aron leh Israel mipite kawm achun thu a tun kit u a, chun, a gama theigah chule a etsak u a;

²⁷A kawm u ah, “Nei sawlnau gam achun ka va chieh u a, bâwngnawi leh khuoizu a luong gam ahi a; a gam gah haw le ka hun puou hi.

²⁸Amahvang chuh a gama mi um haw chuh mihat taktak ahiu a, khuo haw le kulh nei, a let a lien thei ahi a; ziehaw bân achun, Anak suonte le ka muu hi.

²⁹A simlam achun Amalek te a cheng u a, thingtâng gam achun Hit mite, Jebus mite, Amor te haw chuh a cheng u a; chun, Kanaan mite chuh tuisuohgiet pang leh Jordan luidung ah a cheng ui,” ti’n a hilh u a.

³⁰Himahleh, Kaleb chun Mosi masang achun mipite chuh a suthip a, “Kin takin kipan hiting un, va luoh zieng hitiu, zo thei ding dinmun I hi ngâl u a,” a ti a.

³¹Himahleh Kaleb kitawnpihte chun, “Va zo thei zieng puoi tiu, amau haw chuh eihaw sangin a hât zaw ngâl u a,” a tiu a.

³²Khutichun, a gam va etthâknau chanchin chuh Israel te kawm achun lungkiek um takin a gen u a. “Ka va etthâknau gam chuh a gama chêngte ne zo zieng gam ahi a; ka mi muh teu chuh a lien thei mah mah ui.

³³Zie tak achun Nephilim suonte (Anak te hung kipatna) le ka muu a, amau haw masang achun khaupe tieh phet in ka kilang u a, amau a ding chun ka neu mah mah ui,” a tiu a.