Read Gangte KISIMNA 15 Bible Online

KISIMNA 15 - Gangte bible

KISIMNA 15

¹Chun, LALPA’n Mosi chuh a hopih a,

²Israel chate a piek na ding gam a tun phat u a, a mat ding un zie dante hi a pie a.

³LALPA kawmah thillat ahim, hâlmang thillat ahim, thutiem subuting dinga kithawihna ahim, nawp thu a thil lat ahim, na kut hunbi u ah ahim, ganguol lak ah ahim, belam guol lak ah ahim LALPA dinga gimlim ding ahim a na piek tiengu chuleh:

⁴LALPA kawma thillat pie taphawt chun, an thillat changbuong nelzat, ephah hawp sawma khena hawp khat sathau, hin mun li a khen a mun khat lat ding ahi. Zie kithawih na chuh LALPA kipah lam ahi.

⁵Ziehaw bân achun, dâwn ding thillat dingin uain tehna hin dim khat, mun li a khena mun khat tawh, hâlmang thillat ding tawh, kithawihna dingin belamno khat chiet tawh kituok dinga na lat khawm dinguh ahi.

⁶Chun, belamchal a lat tieng, changbuong nêl epha hawp sawma khena hawp nih leh thau hin hawp thum a khen hawp khat na guonggalh ding ahi.

⁷Chuleh, dâwn ding thillat dingin uain hin hawp thum a khen a hawp khat tawh a piek tel ding ahi. Zie kithawih na gim chuh LALPA dinga gimlim ahi.

⁸LALPA kawma hâlmang kithawih na ding ahim, Thutiem sukbutit na ding ahim, Kichamna thil lat ding ahim a, bâwngchal piek ahih tieng.

⁹An thillat ding chuh, changbuong nêl hawih tak ephah hawp sawm a khena hawp thum leh thau hin kimkhat,

¹⁰Dâwn ding thillat uain hin kimkhat chuh tawh meia thilpiek na lat ding ahi a; zie chuh LALPA dinga gimlim ahi.

¹¹Zie hi bâwngchal te, belamchal te, belamno a chal te, kelcha te tawh na lat khawm ding ahi.

¹²Gancha khat sang a tam zaw lat ahih tieng leh, a lat khawmpih te chuh a zah zela sukpun ding ahi.

¹³Zie chuh a gamsung a pieng cheng in, mei thil lat, LALPA dinga gimlim a lat tieng u leh a hih ding uh ahi.

¹⁴Chun, nam dang mi, na kawm u a khawsa sek ahim, kuole na kawm u a khawsa zel ding haw ahim, LALPA ding a gimlim mei thillat pie nuom taphawt chun zie dân hi a zuih ding uh ahi.

¹⁵Na suonteu chan a ding leh nam dang um haw a dingin zie dân mah hi na zuih ding uh ahi.

¹⁶Nang haw leh amau haw chuh LALPA mitmuh a kibang na hiu a, dân le muol hih dân kibang na mat gel ding uh ahi.

¹⁷Chun, LALPA’n Mosi chuh a hopih a,

¹⁸Israel mipite’n a piekna gam a tun tieng u a a zuih ding un zie dân te hi a pie a.

¹⁹Gam gah buh chuh nek ahih phat leh, hun tieng chuh LALPA kawma pei thillat a na lat ding ahi.

²⁰Buh thak a kipata chângthâk kisiem masapen chuh, LALPA kawma pei thillat dinga piek ding ahi. Zie chuh pei thilpiek a buh lat guol mah achu bawl ding ahi.

²¹Hun hungtung zel ale, zie pei thilpiek hi chângthâk na siem tieng u leh LALPA kawma na piek zel ding uh ahi.

²²Zie thupiek chengcheng, LALPA’n Mosi kawma a gen hi,

²³kuo ahim khatin tup loh in a na bawhsie leh;

²⁴a hihloh leh kikhawmkhawmte laka le he lo a a na hihkhapalh a um chun, kikhawm khawm haw chengcheng chun LALPA dinga gimlim dingin hâlmang thillat in bâwng tuoi khat lân un tin, a dân ngeina bangin changbuong thillat leh uain thillat tawh gitloh thawihna dingin kêlchal khat le a lat khawm dinguh ahi.

²⁵Thiempu’n kikhawm khawm haw chengcheng dingin gitloh thawihna siem sak intin, ngaihdam hi’nau. Hihkhakpalh a hih ziek leh, a thillat uh LALPA dinga an thillat leh a hihkhelh ziekuh a gitloh thawihna a siem sak tâk ziekin.

²⁶Israel cha kikhawm khawm haw chuh ngaihdam hiu un tin, a lak uh a nam dang um haw le, mipite chengcheng in a hihkhelhnau a tel a hih ziekun.

²⁷Mimal in helo a thil a hihkhelh chun, kelnu khat, kum khat a upa, gitloh thawihna dinga a lat ding ahi,

²⁸Thiempu chun maichâm ah a gitlohna sukthien na ding chun, kithawih na siem sak intin, tichun ngaihdam hi’n a.

²⁹Kuole helo a gitlohna hih taphawt, gamdang mi hileh, Israel gama pieng hileh zie dân hi mat ding ahi.

³⁰Amahvang chuh hesa sa a hih a hih chun, zie gama pieng ahim, nam dang ahim, le hita leh LALPA gensie ahi a; zie mi chuh thah ngêi ding ahi.

³¹LALPA thu gen chuh a musita, a thupiek chuh a bawhsiet ziekin, zie mi chun a thihna mawh chuh kipuok ina.

³²Chun, Israel chate gamthipa a um lai u chun, mi khat chawlhni a thing chawm hi a muu a.

³³A thing chawm mu haw chun Mosi leh Aron kawm leh mipite kawm achun a pui u a.

³⁴Bangtia hih ding ahim tih phuon ahih nailoh ziekin pindan ah a khum u a.

³⁵LALPA’n Mosi kawmah, “Zie mi chuh thah ngêi ngêi ding ahi, daikieng ah mipi chengcheng chun suong a a seh ding uh ahi,” a ti a.

³⁶Tichun LALPA’n Mosi thu a piek bang chun mipi chengcheng chun daikieng ah a pui u a suongin a seplum tau hi.

³⁷Chun, LALPA’n Mosi chuh a hopih a,

³⁸“Israel chate kawmah, a suonteu chan a a puon mawng u a a mawngnel hih ding leh, a tukpâk cheng a adum kawih dingin thu a pie a.

³⁹Zie mawngnel chuh na et tieng u leh, nang u dingin LALPA thupiek cheng na hetzing u a na zawp na ding un,

⁴⁰Na lunggil uh utlam leh na mit uh la theite delh a na umloh na ding u leh, ka thupiek chengcheng te chuh na hetzing u a, na zawp u a, na Pathien ding u a na thientho theihna ding uh ahi.

⁴¹Na Pathien uh hi dinga, Aigupta gam apat a hun puidawkpa LALPA na Pathien uh ka hi. Kei hi LALPA na Pathien u chuh ka hi,” ti’n.