Read Gangte KISIMNA 2 Bible Online

KISIMNA 2 - Gangte bible

KISIMNA 2

¹Chun, LALPA’n Mosi leh Aron a hopih a,

²Israel chate chun kihona puon-In lam nga chietin hobuk kimvel achun puon-In zak untin; a inkuon uh melchikna puonlap tâk chietin, kihona puon-In kimvela a zak dinguh ahi.

³Ni suohna, suohlam pang achun a mi tam dân bang zel a puon-In zak ding chuh Juda suonte hiu untin; chun, Juda suonte lawiupa ding chuh Aminadab chapa Nashon hi’n a.

⁴A mau haw tam dân chuh singsagih leh sangli leh zagup ahiu hi.

⁵Chun, a bana puon-In zak ding haw chuh Issakar nam hiding ahiu hi; Issakar suonte lawiupa ding chuh Zuar chapa Nethanel hi’n a;

⁶Amau haw chuh a kiziklut dungzui in singnga leh sangli leh zali ahiu hi.

⁷Chun, Zebulun namte, Zebulun suonte lawiupa ding chuh Helon chapa Eliab ahi a.

⁸Chun, amau haw chuh a kiziklut dungzui in singnga leh sangsagih leh zali ahiu hi.

⁹Chun, Juda giehbuk a amin uh kizik lutte chuh nuoikhat leh singgiet leh sanggup leh zali ahiu a; A chiehdawk tieng u leh amau hin ma a puih dinguh ahi.

¹⁰Simlam pang achun Reuben te giehbuk chuh um un tin; Reuben suon lawiupa ding chuh Shedeur chapa Elizur hi’n a.

¹¹Amau haw chuh a kiziklut dungzui in singli leh sanggup leh zanga ahiu hi.

¹²Chun, a bana zak ding chuh Simeon giehbuk hi’n tin; Simeon suonte lawiupa ding chuh Zurishaddai chapa Shelumiel hi’n a.

¹³Amau haw laka kizîklut cheng chuh singnga leh sangkuo leh zathum ahiu hi:

¹⁴Chun, Gad namte: Gad suonte lawiupa ding chuh Reuel chapa Eliasaph hi’n a:

¹⁵Amau chuh a kiziklut dungzui in singli leh sangnga leh zagup leh sawmnga ahiu hi.

¹⁶Reuben te a kizîklut cheng chuh nuoikhat leh singnga leh sangkhat leh zali leh sawmnga ahiu hi. A mau hi a nihna a pawt dingte chuh ahiu hi.

¹⁷Chun, kihona puon-In tawh Levi te giehbuk chuh a lailung apat hung kipandawk untin, Levi te chuh alai ah um un tin uh, a umna mun chiet u apat in, a lawi lawi in kipan dawk un au;

¹⁸A thanglam panga chun a tam dân dungzui un Ephraim giehbuk chuh um untin; Ephraim suonte lawiupa ding chuh Amihuda chapa Elishama hi’n a.

¹⁹Amau haw chuh a kiziklut dungzui in singli leh sangnga ahiu hi.

²⁰Chun, aban a chun Manasseh namte giehbuk hi’n tin; Manasseh suonte lawiupa ding chuh Pedazur chapa Gamaliel hi’n a;

²¹Amau haw chuh a kiziklut dungzui in singthum leh sangnih leh zanih ahiu hi.

²²Chun aban kita chun Benjamin namte giehbuk hi’n tin: Benjamin suonte lawiupa ding chuh Gideon chapa Abidan hi’n a:

²³A kizîklut cheng chuh a bawnin singthum leh sangnga leh zali ahiu hi.

²⁴Chun, Ephraim te kizîklut cheng chuh nuoikhat leh singgiet leh zakhat ahiu hi. Amau hi a thumna a pawt dingte chuh ahiu hi.

²⁵Chun, mâllam pang achun Dan te chuh um untin; Dan suon haw lawiupa ding chuh Amishaddai chapa Ahiezer hi’n a.

²⁶A ziklut cheng u chuh a bawnin singgup leh sangnih leh zasagih ahiu hi.

²⁷Chun, a bana puon-In zak ding chuh Aser nam hin au; Aser suon haw lawiupa ding chuh Okran chapa Pagiel hi’n a.

²⁸A kizîklut cheng chuh a bawnin singli leh sangkhat leh zanga ahiu hi.

²⁹Chun, aban kit ah Naphtali namte: Naphtali suon haw lawiupa ding chun Enan chapa Ahira hi’n a.

³⁰A kizîklut cheng chuh a bawnin singnga leh sangthum leh zali ahiu hi.

³¹Dan nam a kizîklut cheng chuh nuoikhat leh singnga leh sangsagih leh zagup ahiu hi. A mau haw hi a nunung pên in kipandawk un tin, a hawnpi a nung dala a pan dinguh ahi.

³²Ziehaw hi Israel khanggui chieh dana mi a ziklut hawu chuh ahi a, abawn a kigawm in nuoigup leh sangthum leh zanga leh sawmnga ahiu hi.

³³LALPA’n Mosi thu a piek bang khan, Levi te vang chuh Israel chate laka simtel ahi puou hi.

³⁴Khutibang chun, Israel chate chun a hih u a; LALPA’n Mosi thu a piek bang zelin alawi-alawi in puon-In a zak u a; chun, achi achi’n a inkuon dungzui un a giehbuk chiet u ah a giek u a; a kipan dawk sek ui.