Read Gangte KISIMNA 24 Bible Online

KISIMNA 24 - Gangte bible

KISIMNA 24

¹Khutichun, Israel te vangsak chuh LALPA nawp lam ahi tih Balaam in a het chun, ni danga a hih bang khan dawih ngawlna lam thil hih dinga chieh ta lo in, thalek lam a zuon zaw ta a.

²Chun Balaam chuh a dâk to a, Israel mite a nam uh bang zela kikulh chuh a mu ta a; Pathien thagau a chungah a hung tung a, hiti hin a gen ta a;

³zie hilhlawk na thu hi a gen ta a, “Beor chapa Balaam, thu puok leh, kichien taka thil muthei pa chuh,

⁴Pathien thugen he theipa thu gen chuh. Mit vak tak chun, puon-In achun, Pathien apat a kilâkna ka mu ta a.

⁵Aw Jakob na puon-In chuh bang tienga hawih ahi ta’m? Aw Israel na puon-in chuh a hawihna e!

⁶Tûmbâk sautak zum bang leh, lui pang a huon bang mai in, LALPA phuh gimlim thing bang leh lui pang a sidar thing bang ahi.

⁷A tuibel apat guohtui phatak in muu intin, A thai teu chuh lo tui phatna mun ah ding un au. A lengteu chuh Agag leng sangin a lien zaw a, A vaihawmna chuh muntin ah um in a.

⁸Pathien in Aigupta apat in a puidawk a; zangsiel bangin a mau dingin a do sak a, A melmateu chuh sumangthai untin, a guhteu chuh sugawp untin, a thalpi teu chuh suksiet sak un au.

⁹Namte chuh sakeibaknei banga hât ahiu a, A ihmut chuh kuoma’n a phawng ngam lo uh ahi. Kuole Israel te vangsak chuh vangsak in um intin, kuole hansie lawh ta chuh hansie lawh in um un au,” a ti a.

¹⁰Tichun, Balak chuh a lungna ta a, a khut a nuoituoh a, Balaam kawmah, “Ka melma te hansie lawh dingin ka hun sama, thumvei hiel na vangsak ta a.

¹¹Zieziekchun na umna lam ah chieh mang mai in: kipahman hun piek ding ka ngaihtuoh ahi a; himahlele, LALPA’n ka hun piek ding a hun dal ta a hi hi,” a ti a.

¹²Balaam chun Balak kawmah, “Balak hin dangka leh sana a In dim ei pie ding hilele, a phalam ahim, a sie lam ahim, keimah lungthim puok dawk in LALPA thugen khel lam chuh bangmah ka hih thei puoi.

¹³LALPA gen taphawt chuh gen ing ka, ti’n na mi sawlte kawm a khan le ka gen mawng hilo ahim?” a ti a.

¹⁴Tichun, Balaam chun Balak kawmah, “Tuhin, ka mite kawma vaikit ding ka hi ta a, ka chieh masang in, Israel mite hin tunung a na mite chung a ahih dinguh hun hilh malam ing ka,” a ti a.

¹⁵Tichun, Balaam chun zie hilhlawkna hi a gen dawk ta a: “Beor chapa Balaam thupuok leh, mihing kichien taka thil muthei pa chuh,

¹⁶Pathien thugen he theipa thugen leh, Chungnung pên pa apat a hetna mu pa thugen chuh. Mit vak tak puon-In apat, Pathien Bangakai hihtheipa apat a kilâkna ka mu ta a.

¹⁷Ken amah chuh mu ding ka hi a, tuhin chuh hilo, ken amah chuh en ing ka ting, naicha vang hi puo’n a. Jakob apat Aksi khat hung pawt intin, Israel a kipatin Lal tieng hung ding dawk ina; Moab chalpâng khên intin, Seth suonte cheng khên pai ina.

¹⁸Edom achun a melmate zo intin, a gam u chuh amau dingin siem in a, Israel chate guolzawh sung cheng in.

¹⁹Israel namte chuh sukchimit vek in um un au.”

²⁰Balaam chun, kilâkna achun Amalek le a mu a, zie kilak na chuh a gen ta a: “Amalek namte chuh namte laka a masapen ahiu a, himahleh a tawpnau chuh kumkhuo a dinga mangthai ding ahiu ui,” ti’n.

²¹Ken mite le kilak na achun a mu a, tihin a hilhlawk ta a: “Na umna a um chuh a muon-um mah mah a, Suongpi kal a vacha bu bang mai ahi.

²²Himahleh Ken mite sukmangthai a um ding na hiu a, Asuria te chun sala a hun puih tieng u leh,” a ti a.

²³Balaam chun zie hilhlawkna thu hile a gen a; “Tamaizen an, Pathien in zie chuh ahun hih tieng leh kuo a hing zo ding?

²⁴Himahleh, Kittim gam apat in lawng haw chuh hung kitawl in tin, Ashur leh Eber chuh sugimthei untin, Himahleh, amau haw chuh kumsawt a dingin mangthai un au,” ti’n.

²⁵Tichun Balaam chuh a kisa a, In lam ah a chieh ta a. Balak chu le a khaw lam ah a chieh ta a.